‘රූපවාහිනි-ගුවන් විදුලි මැද මාවත’ ප්‍රේමකීර්තිගේ නමට කැප වෙයි

‘රූපවාහිනි-ගුවන් විදුලි මැද මාවත’ ප්‍රේමකීර්තිගේ නමට කැප වෙයි

උළෙල ජනපති ප්‍රධානත්වයෙන්

ධනුෂ්ක ගොඩකුඹුර

විසිපස් වසරකට පෙර ජ.වි‍.පෙ‍. තුවක්කුකරුවන්ගේ ඉලක්කයක්ව අවසන් ගමන් ගිය ප්‍රවීණ ගීත රචකයකු, මාධ්‍යවේදියකු හා නිවේදකයකු වූ ප්‍රේමකීර්ති ද අල්විස් මහතා නමින් නම් කළ මාවත ජනාධිපති මහින්ද රාජපක්ෂ මහතාගේ අතින් ඊයේ (31) විවෘත කෙරිණි. රූපවාහිනී, ගුවන් විදුලි හා ගීත මාධ්‍යයන් එකලු කළ මේ අසහාය ජනහිතකාමී කලාකරුවාගේ 25 වන ගුණ සමරුව නිමිත්තෙන් ප්‍රේමකීර්ති ද අල්විස් ගුණසමරු පදනමේ ඉල්ලීමක් මත ජනාධිපතිතුමාගේ මැදිහත් වීමෙන් කොළඹ නගර සභාව ප්‍රේමකීර්ති ද අල්විස් මහතාගේ නමින් මෙම මාවත නම් කර තිබේ.

ශ්‍රී ලංකා ගුවන් විදුලි සංස්ථාව අසල පිහිටා තිබෙන මේ මාවත විවෘත කිරීමට පැමිණි ජනාධිපතිතුමා පිළිගනු ලැබුවේ එම සංසදයේ සභාපති ප්‍රවීණ ගායක වික්ටර් රත්නායක මහතා ඇතුළු පිරිස විසිනි. අනතුරුව නාම පුවරුව නිරාවරණය කරමින් මාවත නිල වශයෙන් විවෘත කළ ජනාධිපතිවරයා ප්‍රේමකීර්ති ද අල්විස් මහතා වෙනුවෙන් පැවැත්වෙන ප්‍රදර්ශනය නැරැඹීමට ද එක් විය.

මාවත විවෘත කිරීමෙන් අනතුරුව පැවැති කෙටි උත්සව සභාවට එක් වූ ජනාධිපතිවරයා ප්‍රේමකීර්ති ද අල්විස් මහතාගේ ආදරණීය භාර්යාව වන නිර්මලා ද අල්විස් මහත්මිය ඇතුළු ඥාතී මිත්‍රාදීන් සමඟ කථා බහක ද නියැළුණේය.

වසර ගණනාවක් මුහුණ දුන් භීෂණයෙන් රට මුදාගෙන ජාතියට නිදහස උරුම කර දීම සම්බන්ධයෙන් නිර්මලා ද අල්විස් මහත්මිය මෙහිදී ජනාධිපතිවරයාට සිය ස්තිතුය පුද කළාය.

ලොවින් එකෙක් එක් දෙයකට වෙයි සමත යන පැරැණි සිංහල කියමන බොරු කරමින් ක්ෂේත්‍ර රැසක සුවිශේෂී දස්කම් පෑ ප්‍රේමකීර්ති ද අල්විස් මහතා 1947 ජූනි මස 02 වැන දින කොළඹ දී මෙලොව එළිය දුටුවේය. මාලිගාකන්ද මහා විද්‍යාලයෙන් කොළඹ ආනන්ද විද්‍යාලයට සිප්සතර හැදෑරීමට පැමිණි ප්‍රේමකීර්ති සිසුවාගේ ජීවිතය වෙනස් වූයේ 1961 වසරේ දී කරුණාරත්න අබේසේකර සූරීන්ගේ ඇසුරට පත් වීමත් සමඟය.

ශ්‍රී ලංකා ගුවන් විදුලි සංස්ථාවේ ළමා වැඩසටහන්වල පිටපත් කියවන්නකු වූ ප්‍රේමකීර්ති 1966 වසරේ දවස පුවත්පත් ආයතනයේ සිනමා ප්‍රකාශනය වූ විසිතුර පුවත්පතට එක් විය. අනතුරුව 1967 සහය නිවේදකයකු ලෙස ගුවන්විදුලියට බැඳුණු ප්‍රේමකීර්ති 1989 වසරේ ජූලි 31 වැනි දින ඝාතනයට ලක් වූයේ ගුවන් විදුලියේ වැඩසටහන් නිෂ්පාදකවරයකු ලෙස සේවය කරමින් සිටියදීය.

වසර 42ක ජීවිත කාලය තුළ ඔහු අතින් රචනා වූ ගීත සංඛ්‍යාව 1600ක් පමණ වේ. රූපවාහිනීයේ විකාශය වූ ශනිදා සාදය ප්‍රේමකීර්ති ද අල්විස් මහතාගේ නිවේදන ප්‍රතිභාව පෙන් වූ සුවිශේෂී වැඩසටහනකි.

ප්‍රවෘත්ති හා ජනමාධ්‍ය ඇමැති කෙහෙළිය රඹුක්වැල්ල, අධ්‍යාපන ඇමැති බන්දුල ගුණවර්ධන, සංස්කෘතික ඇමැති ටී. බී. ඒකනායක, පාර්ලිමේන්තු මන්ත්‍රී තිලංග සුමතිපාල, කොළඹ මහ නගර සභාවේ නගරාධිපති ඒ. ජේ. එම්. මුසම්මිල්, ජනමාධ්‍ය අමාත්‍යාංශයේ ලේකම් චරිත හේරත් මහත්වරුන් ප්‍රමුඛ මැති ඇමැතිවරුන්, කලාකරුවන් ඇතුළු පිරිසක් ද මේ අවස්ථාවට එක් වූහ.

http://www.dinamina.lk/2014/08/01/