සාහිත්‍ය ප්‍රශ්න පත්තරය - අනුලා ද සිල්වා

සාහිත්‍ය ප්‍රශ්න පත්තරය

පොත් කියැවීමේ පුරුද්ද විමසන මෙම ප්‍රශ්න මාලාව ඇරැඹෙන්නේ, පාඨක ඔබටත් ගත හැකි යමක් එහි ඇති බැවිනි.

ඔබේ ප්‍රියතම ප්‍රබන්ධ කෘතිය...

අනුලා ද සිල්වා

ජයසේන ජයකොඩිගේ ‘පිච්ච මල’ නවකතාව. අවිචාරවත් තරුණියකගේ නොහික්මුණු චර්යාවත් සුපින්වත් බුද්ධ පුත්‍රයකුගේ තිරසාර ගුණ යහපත්කමත් කියැවෙන ‘පිච්චමල’ මගේ හිත තදින්ම ඇද බැඳගත් කෘතියක්.

අද කාලෙ තරුණියන් ජීවිත පාඩම් ඉගෙන ගන්නෙ මට්ටු වුණාට පස්සෙ. නමුත් පිච්චමල කියවන ඕනෑම තරුණියකට පුළුවන් යමක් වෙන්න කලින්, හැඟීම් දැනීම් පාලනය කර යහපත් ජීවිතයක් ගොඩනඟා ගන්න.

ප්‍රබන්ධ නොවන කෘතිය...

පන්සිය පනස් ජාතක පොත. එහි එන චරිත 550 ම එකිනෙකට වෙනස්. ඒ වෙනසම ඇති මට ඒ පොතට කැමැති වෙන්න.

මේ දිනවල ඔබ කියවන්නේ...

මගේම පොතක් වන ‘නව වසර'. තමන්ගේ සැමියාගේ අවජාතක දරුවාට ආදරණීය අම්මෙක් වන ගැහැනියක් ගැන කියැවෙන මේ පරිවර්තන කෘතිය යළි යළිත් කිහිප වරක්ම මුද්‍රණය කළා. නමුත් එහි යම් යම් සංශෝධනයන් සිදුකළ යුතුව තිබෙනවා. ඒ නිසයි, මේ කෘතිය නැවත මා කියවන්නේ.

පර්ල් එස්. බක් ගේ ‘The New Year’ මුල් කෘතිය ඇසුරින් පරිවර්තනය කළ නව වසරට පාඨකයින්ගෙන් තවම තියෙන්නේ හොඳ ඉල්ලුමක්.

කෙනකුට කියවන්න යැයි ඔබ නිර්දේශ කරන කෘතීන් තුනක්...

ගම්පෙරළිය - මේ පොතේ එන චරිත එකක්වත් දඩබ්බර ඒවා නෙවෙයි. බොහෝම සංවේදීයි. ඒ චරිත විකාශය වෙන්නේ සියුම් ලෙස. බොහොම හෙමිහිට. ඒ නිසාම ඒ චරිත පිළිබඳ හුඟක් දේ හිතන්න අපිට වේලාව ලැබෙනවා.

හමුවීම් - වෙන්වීම්, දරා ගැනීම්, වෙනස් වීම් මේ හැම දෙයක්ම ගලා යන්නේ ඉතාමත් සියුම්ව හා සංයමයකින්. ලේඛකයන් හෝ පාඨකයන් වන කවුරුත් ජීවිතයේ එක්වරක් හෝ ගම්පෙරළිය කියවා තිබිය යුතුයි.

ගොලු හදවත - කරුණාසේන ජයලත්ගේ ගොලු හදවතත් කියැවිය යුතුම පොතක්. නිශ්ක්‍රීය චරිතයක් වූ සුගත් ක්‍රම ක්‍රමයෙන් සක්‍රීය වන, වෙනස් වන ස්වභාවය හරි අපූරුවට මෙහි ලියැවී තිබෙනවා. දම්මි හා සුගත්ගේ ඒ පසුකාලීන වෙනස්වීමට මං හුඟක් ප්‍රියයි.

පෙත්සම - ලීල් ගුණසේකර විසින් රචිත පෙත්සමට පසුබිම් වන්නේ නුවර කලාවියේ ජන ජීවිතයයි. මෙය ඉතාම රසවත් කෘතියක්. හොයාගෙන කියවන්න වටිනා පොතක්.

පොතක ඔබ වඩා වැදගත්කොට සලකන්නේ ‍රචනා ශෛලිය ද... අන්තර්ගතය ද... නැතිනම් අවසානය ද...

අන්තර්ගතය ඉතාම වැදගත්. එය දිගටම කියවාගෙන යන්න හිතෙන තරමේ භාෂා ශෛලියක් ඒ තරම්ම වැදගත්. අවසානය මා එතරම් තකන්නේ නැහැ.

ඔබ ළමා කාලයේ කියැවූ හොඳම පොත...

‘Bright Story Readers’ පොත් පෙළ ඇසුරින් ආ ‘Black Tulip'. රතු පැහැ ලස්සන මලක් කළු ටියුලිප් මලක් බවට පත් කරන්න දරන වෑයමක් පිළිබඳවයි ඒ පොත.

අවුරුදු 10 ක ළමා කාලයේ මේ පොත මගේ හිතට තදින්ම කා වැදුණා. අම්බලන්ගොඩ ප්‍රජාපතියේ පුස්තකාලයෙනුයි එය මා කියෙව්වේ. ඒ කාලේ අපිට කියවන්න තිබුණේ ඉංග්‍රීසි පොත් විතරයි.

ඔබ කියැවීමට කැමැති විශේෂ වර්ගයක ග්‍රන්ථ තිබෙනවා ද...

සාහිත්‍ය විචාර, අධ්‍යාපනික, නවකතා, කෙටිකතාවලට ප්‍රියවී සිටි මං, දැන් ආගමික පොතුත් හොය හොයා කියවනවා. ඒක මගේ වයසත් එක්ක සිදුවූ දෙයක් වෙන්න ඕනේ.

මෙතෙක් කියැවූ පොත්වලින් ජීවිතයට ලැබුණු දේ...

මගේ දෙමවුපිය ගුරුවරුන් ගෙන් ඇරුණම ජීවිතයේ ලද හැම දෙයක්ම ලැබුණේ පොත පත නිසායි.

ඉවසීම, උපේක්ෂාව වගේ ජීවිත පාඩම් වගේම පොතක් කියැවීමෙන් නොනැවතී, ඒ චරිත හරහා උකහා ගත් දේ බොහෝමයි. දැනුමත් එක්ක ජීවත්වන ක්‍රමය හඳුනා ගැනීම, ජීවන මාර්ගය තෝරා ගැනීම වගේම අපේ ජීවිත හරි මඟට යොමු වුණේ පොත් නිසා කීවොත් තමයි, වඩා නිවැරැදි.

ඔබට අනුව පොතකින් තැනුණු හොඳම චිත්‍රපටය...

මහගමසේකරයන්ගේ ‘තුංමං හන්දිය.’ තුංමං හන්දිය පොත කියවා තිබූ අපි චිත්‍රපටිය තුළින් දුටුවේත් පොතින් අපිට මැවුණු චිත්ත රූපමයි.

පොතින් විඳපු රසයට කිසිඳු හානියක් නොවී එහෙම චිත්‍රපටියක් හදන්න පුළුවන් වුණේ සමහර විට පොතේ රචකයාම චිත්‍රපටයේ අධ්‍යක්ෂවරයා වූ නිසා වෙන්න ඇති.

ඔබ ඉහළින්ම අගයන කතුවරයා...

රටක් වෙනස් කළ ලේඛකයකු වන රුසියානු ජාතික ලියෝ ටෝල්ස්ටෝයි. ධනවාදයට, වහල් සේවයට පහර ගැසුවා වගේම ඔහු එරට පෑගුණු ජනතාව අවදි කළේත් සිය පොත්වලින්.

අද එහෙම උදාර අරමුණු ඇතිව පොත් ලියන අය නැහැ. ටිකක් හරි එහෙම ලියු අපේ කෙනෙක් වෙන්නේ පියදාස සිරිසේන මහතා විතරයි. සිංහල බෞද්ධකම රැකගන්නත් සුද්දන් ගෙන් රට බේරා ගන්නත් ඔහු සිය පොත්වලින් වෑයම් දැරුවා.

ඔබේ ප්‍රියතම සම්භාව්‍ය කෘතිය...

ලියෝ ටෝල්ස්ටෝයිගේ යුද්ධය හා සාමය.

ඔබේ ප්‍රියතම පරිවර්තන කෘතිය...

ඩොනල්ඩ් වුඩ්ස් ගේ මුල් කෘතියෙන් සුනිල් මාධව ප්‍රේමතිලක පරිවර්තනය කළ ‘හඬනු මැන නිදහස'.

http://www.silumina.lk/2014/06/08/_art.asp?fn=cr1406085