දළදා පුදට ලියැවුණු ගී

බුදුරජාණන් වහන්සේගේ අනන්ත අප‍්‍රමාණ වූ බුදු ගුණයන් වෙනුවෙන් 

බෞද්ධයන්ගේ භක්ත්‍යාදරයට පාත‍්‍ර වූ පූජනීය ස්ථාන කීපයක් වේ. 

ඒවා අතර ශ‍්‍රී දන්ත ධාතුන් වහන්සේ වැඩ සිටි සෙංකඩගලපුර දළදා මාලිගාව සුවිශේෂී වෙයි. ඒ හා අනුබද්ධ ජාතික චාරිත‍්‍ර ධර්ම අධ්‍යයනය කර බලන විට සුවිශේෂ වශයෙන් ඒ තුළ දක්නට ලැබෙන ජාතික හර පද්ධතිය හඳුනාගත හැකි වේ.

මෙහිදී අපගේ අවධානය යොමු වන්නේ වර්තමාන ගීත රචකයන් පූජනීය ස්ථානයක් වූ දළදා වහන්සේ ඇසුරු කර ගනිමින් බිහි කර ඇති නිර්මාණ පිළිබඳව අධ්‍යයනය කිරීමයි. ජාතික හදවත වූ දළදා වහන්සේගේ අතීත පුරාවෘත්තය දාඨාවංසය නම් වූ කෘතියේ අවධාරණය කරනු ලබන අතර වර්තමාන ගීත නිර්මාණකරුවන් විවිධ දෘෂ්ටි කෝණ වලින් මේ දෙස බලා තිබේ.

සුනිල් සරත් පෙරේරා අතින් රචනා වුණු සංගීත් නිපුන් සනත් නන්දසිරිගේ සංගීතය මුසුවූ ඔහු ගයන යට දැක්වෙන ගීතය මගින් ශ‍්‍රී ලංකාද්වීපයම දළදා වහන්සේගේ නායකත්වය යටතේ ගොනුවන බව පවසයි. දළදා වහන්සේගෙන් තොර ලංකා දිවයිනක් සිතීමටවත් අපහසුය.

 

මගේ රටට දළදා හිමි සෙවනයි

මගේ දැයට දළදා හිමි සරණයි

සැපතින් සපිරුණු නිවහල් දෙරණයි

උපතින් මා හට මේ සැප උරුමයි

රටද ජාතියද සැපතින් ආඪ්‍ය වී නිවහල් බවින් යුක්ත වූයේ දළදා වහන්සේ නිසාවෙනි. උපතින්ම මට උරුම වූ මේ අභිමානය මගේ පුණ්‍ය මහිමය නිසා සිදු වූවකි. දළදා හිමිගේ සෙවණ නිතර හිතට සැනසුමක් ලඟා කරවයි.

 

දළදා මැදුරේ රන්කොත මුදුනේ

මිණි කිරණින් මුළු රටම අවදිවේ

දෙදහස් වසරක මහරු අතීතය

සීහ තේජසින් යළි පිබිදේ

මේ හැම මේ දැන් එක ලෙස බැඳුණේ

සිත් තුළ බිය සංකා දුරු කෙරුණේ

වර්තමාන සමාජය තුළ මෙම ගීතය අතිශයින් ජනප‍්‍රිය වූවක් විය. සිංහල ජාතියේ අභිමානයද රටෙහි පෞඩත්වය කියාපාන මෙය මුළු රට අවදි වන්නෙ දළදා මැදුරේ රන්කොත මුදුනේ මිණි කිරුළින් බව කීම දළදාව හා බැඳුණු ජාතිකත්වය කෙබඳු ද යන්න වටහා ගත හැකි වේ.

ආචාර්ය අජන්තා රණසිංහයන්ගේ පද රචනයක්වන උත්තම මුණි දළදා ගීතය සනත් නන්දසිරිගේ සංගීත නිර්මාණයට ධර්මදාස වල්පොළ ගායනා කරනු ලබයි. එහි පළමු පදය මෙසේ දැක්විය හැකිය.

 

උත්තම මුණි දළදා වඩම්මන

මොක්පුර රන් නෞකා බලන් සකි

සත් සමුදුරු ගැඹරේ

උදේනි රජ පුත් දන්ත කුමරුවන්

උදේනි රජ දූ මාලි කුමරියන්

කෙස් කළඹේ සඟවා හිසින් ගෙන

උත්තම මුණි දළදා වඩම්මන

දළදා වහන්සේගේ අතීත පුරාවෘත්ත හා කෙමෙන් කෙමෙන් ස්ථාන මාරු වී ගිය අයුරුත් ගෞරවාන්විත පසුබිමක ලා විවරණය කරයි.

 

තඹවන් වැල්ලේ මල් වැහි වස්සන

නිසි කල රන්ගොයමේ කිරි වද්දන

යනාදී පද මගින් තම්බපන්නි දීපය අසිරිමත් දිවයිනක් බවට පත්වූයේද නිසි කළ කුඹුරු පිටි අස්වද්දන යායක් පිරුණේත් දළදා අනුහසින්බව කවියා කියයි. ආචාර්ය අජන්තා රණසිංහයන් දළදා මැදුර තේමා කරගෙන සුවිශේෂ ගීත රචනා කීපයක්ම රචනා කර ඇති බව පෙනේ.

රඹුකන සිද්ධාර්ථ හිමියන්ද දළදා මැදුර පිළිබඳව ගීත කීපයක් රචනා කරනු ලැබූහ. ඉන් එක ගීතයක තේමා වී ඇත්තේ ශ‍්‍රී දළදා මැදුරට එල්ල වූ ත‍්‍රස්තවාදී ප‍්‍රහාරය පිළිබඳවයි.

දළදා මැදුර යනු බෞද්ධ ප‍්‍රජාවගේ ආගමික හදවතය. දළදා මැදුරට හානියක් කිරීම පවා එබදු සිතිවිල්ලක් සිතට නගා ගැනීම පවා බෞද්ධ කෙනෙකුට අකැප සිතිවිල්ලක්ය. නමුත් එබඳු දෙයක් සිදු විය. බුදුරජාණන් වහන්සේ ජීවමානව වැඩ වාසය කරන සමාජයේ උන් වහන්සේ මරණයට පත් කිරීම සඳහා ගල් පෙරලණු ලැබුවේ දේවදත්ත හිමියන් විසිනි. දුනුවායන් යෙදීම සහ නාලාගිරි ඇතා එවීම වැනි කි‍්‍රයාවන් පිළිබඳව මෙසේ සඳහන් වෙයි.

මැරුව මුණි මහතා - බුදු බව ලැබෙයි සිතා

කළ අනුවණ සිතා - ඇරවී නාලාගිරි මතැතා

දළදා මැදුරත් අපට බුදු හාමුදුරුවන් වගේය. දළදාවට යමෙක් හානියක් කරනවා නම් ඒ දේවදත්ත පරපුරේ කෙනෙක්ම විය යුතුය. මන්ද අන්‍ය කෙනෙකුගෙන් එබන්දක් සිදු විය නොහැකි නිසාය.

 

සිරි සම්බුද්ධ සාසනේ

වන්දනීය පූජනීය

දන්ත ධාතු රාජනේ

සමාවෙන්න දෙව්දතුන්ට යළිත් වරක්

වැරදීමක් වෙන්න ඇති අනේ

පද – රඹුකන සිද්ධාර්ථ හිමි

හඬ - සුනිල් එදිරිසිංහ

ස්වර - රෝහණ වීරසිංහ

සසර දනව්ව පිට – 45

මිනිසා විසින් තමන්ගේ කුරිරුකම නිසා මෙබඳු හිංසා පීඩා කරනු ලබයි. තමා සිදු කර ගනුලබන පාපයෙහි වරද ඔහුට නොවැටහෙයි. නොදැන කළාවූ වරද වෙනුවෙන් සමාවී වදාරණ සේක්වා. මෙම සාවද්‍ය කි‍්‍රයාව සිදුවී ඇත්තේ දේවදත්ත පරපුරේ කෙනෙකුගෙන් විය යුතුය. එදා බුදුන් දවස ද දේවදත් හට වැරදි සිදු වුණේය. මෙවරත් මේ සිදුවී ඇත්තේ එබඳුම කි‍්‍රයාකාරීත්වයකි. ගීතය පුරාම කියවෙන්නේ සාමාන්‍ය මිනිසා තුළ දළදා මාලිගාව පිළිබඳ ඇති ශ‍්‍රද්ධා භක්තියත් මේ සිදු වූ සංහාරයේ පාපතර කි‍්‍රයාවත් පිළිබඳවය. පූජනීය අර්ථයට වඩා ගීතය මගින් අවධාරිත වන්නේ සිදු වූ වරද වෙනුවෙන් සමාව අයැදීමය.

රඹුකන හිමියන් විසින් ලියන ලද යට දැක්වෙන ගීතය ද ලියවී ඇත්තේ දළදා වහන්සේ පිළිබඳව ඇති අනන්ත අප‍්‍රමාණ භක්තිය හෙළිදරව් වන ආකාරයටය. බෞද්ධයන්ට දළදා වහන්සේ දැකීම ජීවමාන බුදුහිමියන් දැකීම වැනි කි‍්‍රයාවකි. බුදුරදුන් දුටුවා සේ අචල භක්තියක් බෞද්ධයකු හට ඇති වන්නේ

 

සම්බුද්ධ රාජ ධර්ම මණ්ඩලේ සරනා

දන්ත කුමරු හේමමාලි සිහසුන වටිනා

මහපෙරහර දෙව්ලොව සිරි මිහිබට ලෙසිනා

බලන් ඇසල සඳපානේ

දළ ඇතු පිට දා කරඬුව බුදුරජ සේමා

පද – රඹුකන සිද්ධාර්ථ හිමි

ස්වර - රෝහණ වීරසිංහ

හඬ – කරුණාරත්න දිවුල්ගනේ සහ දිස්නා අතපත්තු

දළදා වහන්සේගේ අයිතිය පවතින්නේ කා සතුවද ලක්දිව රජකම ලැබෙන්නේද ඔහුටය යන මතයක් ශ‍්‍රී ලංකාව තුළ පවතී. වර්තමානයේ වුවද ජනපති පදවියට පත් වූ කෙනෙකු පත්තිරිප්පුවේ සිට ජනතාව අමතන්නේ එම අදහස පෙරදැරි කර ගෙනය. රජ කෙනෙකු සතු විය යුතු ධාර්මික රාජ්‍ය සංකල්පය ජනතාව පිළිගනු ලබන්නේ එම රජ පදවිය ලැබූ පුද්ගලයා දළදා වහන්සේට දක්වන සැලකිලි පුද සත්කාර අනුවය. යට දැක්වෙන ගීතය ද එකී සංස්කෘතික ප‍්‍රවාහය අනුව රචනා වූවකි. බෞද්ධ සිතක තැවුල් නිවී සුවපත් වන්නේ දළදා සෙවණෙහිය.

 

ගෞතම මුණි සිරි දළදා

හිමි නමදිමු සිත පහදා

බුදු රැස් සඳ කිරණ ගලාලා

තැවුල් නිවී සුවපත් වේවා

පද – මහින්ද දිසානායක

ස්වර - රොහණ වීරසිංහ

හඬ – කරුණාරත්න දිවුල්ගනේ

දළදා වහන්සේ ආරක්ෂා කරනු ලැබුවේ රාජ රාජ මහාමාත්‍යවරුන්ය. ලංකාවේ සිවු දිසාවෙන්ම පැතිරී ඇත්තේ දළදාවේ රශ්මී කිරණයි. යට දැක්වෙන මෑතක ලියවුණ දළදා ගීතය මගින් අවධාරණය වන්නේ මෑතක බිහි වූ රජෙකු විසින් දළදා සංස්කෘතිය නගා සිටුවීම සඳහා ගනු ලබන වෙහෙස මහන්සිය පිළිබඳවයි. මේ දේශයට එම රජුගේ සෙවන නිසා නිදහස් නිවහල් සුළඟ හමයි.ගීත බොහෝමයක් ලියා ඇති ප‍්‍රකට ගීත රචකයකු වන චන්න ජයනාත් විසින් ලියා ඇති මෙය එම රචකයා ලියූ නිර්මාණ අතර සුවිශේෂත්වයක් ගෙන එයි.

 

සිරි දළදා හිමි සරණයි

සිරි දළදා හිමි සරණයි

සෙංකඩගලපුර සිරි දළදා හිමි

සමිඳුගේ උත්තම සරණයි

උතුරින් දකුණට නැගෙනහිරට

බටහිර ට ගලා යන සුවඳයි

නිදහස් නිවහල් සුවඳයි

පද - චන්න ජයනාත්

ස්වර - ප‍්‍රියාන් පතිරණ

හඬ - දමිත් අසංක

මහාචාර්ය සුනිල් ආරියරත්නයන් ලියූ බොහෝ ගීත වල දළදා මැදුර පිළිබඳ යම් යම් සංසිද්ධි ඇතුලත්ව ඇති බව පෙනෙයි.

‘ලේලිගේ නරක මිතුරන්’ ගීතයේ බෝගම්බර හිර ගෙදර දළදා මැදුරේ තේවා හඬ ඇහෙන බව කියයි. පානම් පත්තුවේ ඩිංගිරි අම්මාය ගීතයේ දළදා වැදීම පිණිස ගමේ චණ්ඩි ස්ටැන්ලිට යාළු නිලමෙලා දොර ඇදුරන් නිසා ඔහු ළඟටම ගොසින් දළදා වැන්ද බව කියයි. දළදාව බඳු උතුම් පූජනීය පරිසරයක වුවද සමාජ අසාධාරණය සිදු වන බව රචකයා දුටු අයුරු අසිරිමත්ය.

ප‍්‍රවීණ ගීත රචක

පාතේගම ඤාණිස්සර හිමි

ජ්‍යෙෂ්ඨ කථිකාචාර්ය භික්ෂු විශ්වවිද්‍යාලය අනුරාධපුරය

http://www.dinamina.lk/2009/07/31/dalada/_art.asp?fn=d09073111&p=1

Read More

උසස් පෙළ විභාගය හෙට ඇරැඹේ

උසස් පෙළ විභාගය හෙට ඇරැඹේ

සුභාෂිණී සේනානායක

අධ්‍යයන පොදු සහතික පත්‍ර උසස් පෙළ (2014) විභාගය හෙට (5) ආරම්භ කෙරේ.

අගෝස්තු මස 29 වනදා දක්වා පැවැත්වෙන විභාගය සඳහා අයදුම්කරුවෝ 2, 96, 313ක් පෙනී සිටිති.

පාසල් අයදුම්කරුවෝ 2,34,192ක් ද පෞද්ගලික අයදුම්කරුවෝ 62116ක්ද විභාගයට පෙනී සිටීමට නියමිතය.

දිවයින පුරා පිහිටි විභාග මධ්‍යස්ථාන 2120ක විභාගය පැවැත්වෙන අතර සම්බන්ධීකරණ මධ්‍යස්ථාන 295ක විභාගය සම්බන්ධීකරණ කටයුතු සිදු කෙරෙයි

විභාගයේ උත්තර පත්‍ර ඇගයීම් කටයුතු අගෝස්තු 29 දා ආරම්භ කෙරේ.

විභාගය පැවැත්වෙන කාලසීමාවේ විභාග වංචා සිදු කරන අය කොටු කර ගැනීමේ විශේෂ වැඩපිළිවෙළක් දියත් කොට ඇතැයිද වංචා සිදු කර හසුවන්නන්හට දැඩි සේ නීතිය ක්‍රියාත්මක කරන බවද විභාග කොමසාරිස් ජනරාල් ඩබ්ලිව් එම් එන් ජේ පුෂ්පකුමාර මහතා දිනමිණට ප්‍රකාශ කළේය.

http://www.dinamina.lk/2014/08/04/_art.asp?fn=n1408046

Read More

1959 - ජාතික රෝහලේ තොරතුරු

ජාතික රෝහලේ තොරතුරු 1959 ඇමතීමෙන්

කොළඹ ජාතික රෝහලෙන් සපයන සේවාවන් සහ රෝහලෙන් තොරතුරු ලබා ගත හැකි පරිදි මධ්‍යස්ථානයක් ලබන සඳුදා (04) ජාතික රෝහලේදී විවෘත කෙරේ.
මෙම තොරතුරු මධ්‍යස්ථානය මඟින් මහජනතාවට කඩිනමින් හා විශ්වාසදායක ලෙස අවම කාල සීමාවක් තුළ අවශ්‍ය තොරතුරු ලබා ගත හැකිය.
මෙම තොරතුරු ඒකකය ජාතික රෝහලට වසර 150ක් පිරීම නිමිත්තෙන් පිහිටුවන බව රෝහල් අධ්‍යක්ෂ වෛද්‍ය අනිල් ජයසිංහ මහතා පවසයි.
ඔබට අවශ්‍ය තොරතුරු 1959 දුරකථන අංකයට කථා කිරීමෙන් ලබා ගත හැකිය.

චන්ද්‍ර ශ්‍රී සෝමසිරි

Read More

Dinamina City FM news broadcasting service

Dinamina City FM news broadcasting service launch today

The “Dinamina City FM” news broadcasting service, a joint venture by “Lake House” and the “Sri Lanka Broadcasting Corporation” will go on air from today.

The new service will broadcast the latest breaking news on an hourly basis using the frequencies of 89.6 - 89.8, from 9.30 am to 5.30 pm through the popular SLBC news channel “City FM”. The ceremonial launch of this new service will be held under the patronage of Associated Newspapers of Ceylon Limited (Lake House) Chairman Bandula Padmakumara and SLBC Chairman Hudson Samarasinghe today.

The aim of this program is to provide real time breaking news to listeners courtesy the “Dinamina” newspaper. The news broadcasts will be conducted by Lake House journalists. 

http://www.dailynews.lk/?q=local/dinamina-city-fm-news-broadcasting-service-launch-today

Read More

දිනමිණ Fm

පත්තර මහ ගෙදර සිට කතා කරමි!

ලෝකයේ පවතින අති ප්‍රබල ජනමාධ්‍යය ගුවන් විදුලිය යි. එය සනාථ කළ හැකි සූත්‍ර දෙකක් අපට පෙන්වා දිය හැකි ය. පළමුවන්න ජනගහනයෙන් විශාල පිරිසක් ඇසුරු කරන මාධ්‍ය කුමක්දැ’යි සමීක්ෂණයක් මඟින් සොයා බැලීම ය.

දෙවන්න ජන මාධ්‍ය අතර වැඩිම විශ්වාසයක් පවතින මාධ්‍යය කුමක්දැ’යි සමීක්ෂණයක් මඟින් සොයා බැලීම ය. සමස්ත අප්‍රිකාව ඇසුරු කරන්නේ ගුවන් විදුලිය යි. ඔවුන් විශ්වාස කරනුයේද ගුවන් විදුලිය යි. ආසියාවේ, ලතින් අමෙරිකාවේ හා යුරෝපයේ ද එය අඩු වැඩි වශයෙන් පවතී.

අපට ගුවන්විදුලිය ගැන කතාකරන්නට සිත් වූයේ ශ්‍රී ලංකාවේ සන්නිවේදන ක්ෂේත්‍රයේ විප්ලවීය ආරම්භයක් ඊයේ ඇති වූ නිසා ය. එය හැඳින්විය හැක්කේ අපේ රටේ පත්තර මහ ගෙදර හා ගුවන්විදුලි මහගෙදර එකට එකතුවීමක් ලෙස ය. ලේක්හවුස් ආයතනය, දිනමිණ කන්තෝරුව හෙවත් පත්තර මහ ගෙදර ශ්‍රී ලංකාවේ ඇති පරමාදර්ශී පත්තර ආයතනය යි. ගුවන් විදුලි සංස්ථාව යනු අපේ රටේ ඇති පරමාදර්ශී ගුවන් විදුලි ආයතනය යි. පත්තර මහ ගෙදරට වයස අවුරුදු එකසිය හතරකි. රේඩියෝ මහ ගෙදරට වයස අවුරුදු අසූ අටකි.

මේ ආයතන දෙක එකතු වී අලුත් එෆ්.එම්. නාලිකාවක් ආරම්භ කර තිබේ. එහි මූලික අරමුණ අපේ ජනතාව දැනුමෙන් හා ප්‍රඥාවෙන් සන්නද්ධ කිරීම ය. ඒ හැරුණුකොට ජනතාවගේ රස වින්දනය දියුණු කිරීම,අපේ ජාතික උරුමයන් සංරක්ෂණය කිරීම, සාංස්කෘතික සංවාද ඇතිකිරීම යන විවිධ අරමුණු මේ නාලිකාවට තිබේ. එය මුළුමනින්ම ගත් කළ ජාතීය අරමුණක්ඇති ව මෙහෙය වන වගවීමක් සහිත ජනමාධ්‍ය ආයතනයක් ලෙස හැඳින්විය හැකි ය. පෙරැළිකාර සංකර සන්නිවේදන විප්ලවවලට එහි ඉඩක් නැත.

ඉතාලි ජාතික මාර්කෝනි ගුවන් විදුලි තාක්ෂණය සොයා ගත්ත ද; එහි ඇති සන්නිවේදන ප්‍රබලත්වය හඳුනාගත්තේ නැත. ඉන් අදහස් කරන්නේ ගුවන් විදුලියේ දැවැන්ත සමාජ කාර්යය ගැන පුළුල් දැක්මක් මාර්කෝනිට තිබුණේ නැති බව ය. ඒ නිසාම ඔහු තම තාක්ෂණය මහා බ්‍රිතාන්‍යයට අලෙවි කළේය. මහා බ්‍රිතාන්‍යය එය නව තාක්ෂණයෙන් ද පෝෂණය කොට යටත්විජිතකරණය සඳහා යොදා ගත්තේ ය. ලෝකයේ ප්‍රථම ගුවන් විදුලිය ඉතාලියේ බිහි විය යුතුව තිබුණ ද එය ස්ථාපිත වූයේ මහා බ්‍රිතාන්‍යයේ ය.

ගුවන් විදුලිය මිනිස් සමාජයේ ප්‍රයෝජනය සඳහා යොදාගන්නේ නම් ඒ සඳහා හොඳම ආදර්ශ ලබා ගත හැක්කේ අප්‍රිකාවෙන් ය. ඉංග්‍රීසිකාරයා අඳුරු මහාද්වීපය ලෙස හැඳින්වූ අප්‍රිකාව අඳුරෙන් එළියට ආවේ ගුවන් විදුලිය නිසා ය. අප්‍රිකාවේ මහා ප්‍රබන්ධකථාකරු ලෙස හඳුන්වන චිනුවා අචෙබේ අප්‍රිකානු ගුවන් විදුලියේ උපදේශක තනතුරක සිටියේය. ඔහු හැමවිටම එය මහත් ඉහළින් අගය කරමින් කටයුතු කළේය. කෙන්යාවේ විමුක්ති ව්‍යාපාරය වූ මො - මෝ සංවිධානයේ නායක ඩෙඩෑන් කිමානි කියා සිටියේ අප්‍රිකාව දැනුවත් කළ හැක්කේ ගුවන් විදුලියෙන් පමණි යන්න ය.

අප්‍රිකාවේ ගුවන් විදුලි මාධ්‍යවේදීන් පුහුණු කරන වැඩමුළුවක් 1960 ගණන්වලදී පැවැත්විණි. එක්සත් ජාතීන්ගේ සංවිධානය හා පොදු රාජ්‍ය මණ්ඩලයද ඊට සහයෝගය ලබා දුන්හ. මේ වැඩමුළුවල දී අප්‍රිකානු ගුවන් විදුලි ශිල්පීන්ට ප්‍රධාන කරුණු හතරක් අවධාරණය කරන ලදී. පළමුවන්න වැඩමුළුවලට යන්න එහි සිට වාර්තා කරන්න යන්න ය. දෙවන්න හඬක් නැති මිනිසුන්ට හඬක් දෙන්නත් සඳහා පාරට යන්න කියා ය. තෙවන්න රටේ සංස්කෘතික උරුමය රකින්න නැතහොත් රට විනාශ වේ යන්න ය. හතරවන්න හැකිතාක්දුරට දිළිඳු ජනතාව අමතන්න ඔවුන් රටේ ජීවනාලිය යන්න ය. මේ හැම උපදේශනයකින් ම අපට පාඩම් උගත හැකි ය.

ශ්‍රී ලංකාවේ ප්‍රධාන ගුවන් විදුලිය ආරම්භ වී වසර අසූ අටක් ගත වී ඇතැ’යි අපි මුලින් සඳහන් කළෙමු. මුලින් ම ආරම්භ වූ ගුවන් විදුලි විකාශය “සියැක්” ලෙස හැඳින් වේ. එය විධිමත් ගුවන් විදුලියක් හෝ ජනමාධ්‍යයක් හෝ නොවේ. කොළඹ ගුවන් විදුලිය, ලංකා ගුවන් විදුලි සේවය, ශ්‍රී ලංකා ගුවන් විදුලි සංස්ථාව යන ලෙසින් එය විකාශය වූ අතර පසුකලෙක රටේ ප්‍රධාන ජනමාධ්‍ය බවට පත්විය. දේශපාලනය, අධ්‍යාපනය, ආර්ථිකය ආදී කුදු මහත් විෂයය පිළිබඳ නියම සංවාද පැවැතියේ ද ඒවා පිළිබඳ ඇතැම් තීන්දු ගනු ලැබුයේ ද ශ්‍රී ලංකා ගුවන් විදුලි සංස්ථාවය. එය රටේ තීරණාත්මක සාධකයක් ලෙස පැවැතිණි.

විසිවන සියවසේ අග භාගය වන විට ශ්‍රී ලංකාවේ මාධ්‍ය ක්ෂේත්‍රයට ගුවන් විදුලි නාලිකා කඩා වදින්නට පටන් ගත්තේ ය. රූපවාහිනී නාලිකා කඩා වදින්නට පටන් ගත්තේ ය මේවායේ ප්‍රතිඵලය ලෙස සමාජය බෙහෙවින් සංකරවූයේ යැයි චෝදනා නැගිණි.

අපරාධ වැඩිවුණේ යැයි චෝදනා නැගිණි. භාෂාව හා සංස්කෘතිය විනාශ වූයේ යැයි චෝදනා නැගිණි. එහි සත්‍යයක් තිබේ. ජනමාධ්‍ය ආචාර ධර්ම ඉක්මවා ගිය සන්නිවේදන ක්‍රියාවලියක් මේ නාලිකා ඔස්සේ දකින්නට ලැබිණි. දිනමිණ එෆ්.එම්. නාලිකාව ඒ සියල්ලට වඩා වෙනස් ජාතික වගවීමක් ඇති නාලිකාවකි. එය කොළඹ පත්තර මහ ගෙදර සිට ශ්‍රී ලංකාවේ හෘද සාක්ෂියට කතා කරනු ඇත.

Read More

දිනමිණ සිටි FM හඬ ගුවනට මුදාහළ වගයි....

 දිනමිණ සිටි FM ප්‍රවෘත්ති විකාශය ඊයේ (23) උදේ සුබ මොහොතින් ආරම්භ වූ අවස්ථාව. ගුවන් විදුලි සංස්ථාවේ සභාපති හඩ්සන් සමරසිංහ සහ ලේක්හවුස් සභාපති ප්‍රවීණ මාධ්‍යවේදී බන්දුල පද්මකුමාර මහත්වරුන් විසින් ප්‍රථම ප්‍රවෘත්තිය ගුවනට මුසු කෙරුණු අවස්ථාව. කර්තෘ මණ්ඩල අධ්‍යක්ෂ ප්‍රවීණ මාධ්‍යවේදී සීලරත්න සෙනරත්, මෙහෙයුම් අධ්‍යක්ෂ උපුල් දිසානායක, නීති අධ්‍යක්ෂ රසාංග හරිස්චන්ද්‍ර මහත්වරු සහ ශ්‍රී ලංකා ගුවන් විදුලි සංස්ථාවේ අධ්‍යක්ෂ ජනරාල් සමන්ත වැලිවේරිය, 
අතිරේක අධ්‍යක්ෂ ජනරාල් ටී. ඩී. කේ. ඒ. ජයන්ත සහ ඉංජිනේරු වජිර ධර්මකීර්ති මහත්වරු මෙහි වෙති. 
ඡායාරූපය - සුදත් මලවීර

Read More

අපි කනබොන තැන්වල නටන්නේ නෑ

කලාකරු චිත්‍රසේන නව වැනි ගුණ සැමරුම

චිත්‍රසේනට නර්තනය පූජනීය දෙයක් වුණා

ශෘංගාරය මතු කරන්නේ නර්තනය නොදන්න අය

අපි කනබොන තැන්වල නටන්නේ නෑ

චිත්‍රසේනගේ නර්තන මෙහෙවර ගැන වජිරා කතා කරයි

නර්තන‍යේ අපූර්ව මිනිසා ආචාර්ය චිත්‍රසේනයන් විසින් උර දෙන ලද ඓතිහාසික කාර්යය වන්නේ අපේ දේශීය නැටුම් කලාව වෙනස් වන සමාජ රටාවන්ට උචිත වන ආකාරයට එහි මුල් නොසි‍‍ෙඳෙන සේ, නව ආරකින් පවත්වාගෙන යාමේ අභියෝගයයි. කලාව මෙන්ම කලාකරුවාද ස්වාධීන විය යුතුය යන්න චිත්‍රසේනයන් ඔප්පු කළේ භාවිතාවෙන්මය. මේ ගෙවෙන්නේ චිත්‍රසේනයන්ගෙන් තොර නව වන වසරයි.

ශ්‍රි ලාංකික නර්තන කලාවේ අභිමානය ලොවට ගෙන ගිය ප්‍රමුඛ කලාකරුවා වන චිත්‍රසේනයන්ගේ නවවන සැමරුම අදට යෙදි තිබේ. දේශීය නර්තන කලාවේ ආභාෂය ලබමින් චිත්‍රසේනයන් නවතම කලා මාධ්‍යයක් ලෙස මුද්‍රා නාට්‍ය ගොඩනැංවූ ආකාරය හා නර්තන කලාවේ අනාගතය, සමකාලින ප්‍රවණතා ගැන චිත්‍රසේනයන්ගේ නර්තන සහකාරිය හා ජීවන සහකාරිය වූ ප්‍රවීණ නර්තන ශිල්පිනී වජිරා චිත්‍රසේන දැක්වූ අදහස් මෙසේය.

l චිත්‍රසේනයන් සිය ‍රංගනයේ මෙහෙවර හැටියට සැලකුවේ කුමක්ද?

එයාට වුවමනා වුණේ අපේ නර්තනය වෙන කිසිම රටක තියෙන නර්තනයට දෙවෙනි නොවන උත්තම කලාවක් කියල පෙන්වන්නයි. චිත්‍රා, අපේ සම්ප්‍රදායික නර්තනයත් ඉන්දියාවට ගිහින් පෙරදිග නර්තනයත් හැදෑරුවා. ඊට පස්සේ ඒ දැනුම යොදාගෙන නව නිර්මාණ කළා.
අපේ සම්ප්‍රදායික නර්තනය ගැන වගේම නැටුම් ගුරුවරුන් ගැනත් චිත්‍රාට විශාල කැක්කුමක් තිබුණා. ඔවුන් රැකගත යුතුයි කියලා එයා කල්පනා කළා. බලාපොරොත්තු තැබිය හැකි ගුරුවරුන් හා ශිල්පීන් හඳුනාගන්න එයාට හැකියාවක් තිබුණා. ඔවුන්ගේ කුසලතා වර්ධනය කර ගැනීමට උදව් කළා.
නර්තනය ඉගැන්වීම පිළිබඳ පුහුණු ක්‍රම දියුණු කිරීම ඔහුගෙන් ඉටුවූ තවත් මෙහෙවරක්. මේ සියල්ල අතරින් මම හිතන්නේ ඔහු නර්තනය‍ට දැක්වූ ලොකුම උපහාරය තමයි එහි ගෞරවණීයත්වය ආරක්ෂා කිරීම. ඒ වගේම නර්තන ශිල්පීන්ට වෘත්තික පදනමක් ඇති කිරීම.

l චිත්‍රසේන නර්තන ආරම්භයේදි එයට පාරම්පරික ශිල්පීන්ගේ දායකත්වය ලබා ගත්තෙ කොහොමද?

චිත්‍රා... පිට පළාත්වල තියෙන ශාන්ති කර්ම බලන්න යනවා. ඒවායේදි හමුවෙන දක්ෂ නර්තන ශිල්පීන් අපේ කණ්ඩායමට බඳවා ගත්තා. ජේ.ඊ. සේදරමන්, අම්බලන්ගොඩ ආරියපාල ගුරුන්නාන්සේ ඒ විදිහට අපේ කණ්ඩායමට සම්බන්ධ වූ සාමාජිකයින්.
පහතරට නර්තනය අපේ නර්තන කණ්ඩායමට එක් කළේ ආරියපාල ගුරුන්නාන්සේ. සේදරමන් ගුරුන්නාන්සේගෙන් උඩරට නැටුම් ගැන නිපුණතාව ලැබුණා. ඔවුන් ප්‍රචලිත නැට්ටුවන්. ඒ විදිහට අපි සමඟ සම්බන්ධ වූ පාරම්පරික නර්තන ශිල්පීන්, ඔවුන්ගෙන් පසු පරම්පරාත් අප සමඟ වැඩ කළා. විදේශ සංචාරයන්ට සම්බන්ධ වුණා. එයින් ඔවුන්ගේ නම පිටරටවලත් ප්‍රසිද්ධ වුණා.

l මේ වන විට නර්තනය මුළුමනින්ම පාහේ ස්ත්‍රීන් නිරත වන කලාවක් බවට පත්වීම ගැන ඔබේ අදහස කුමක්ද?

ඒක දෛවයේ සරදමක්. ආරම්භයේදී නර්තනය ස්ත්‍රින්ට තහනම් කලාවක්. නර්තන ශිල්පිනියන් දිහා සමාජය බැලුවේ වපර ඇහින්. ඒ තත්ත්වය වෙනස් කරන්න අපේ දායකත්වයත් බලපාන්න ඇති. බාලිකා පාසල්වල නර්තනය විෂයක් හැටියට ඉගැන්නුවා තමයි.
මමත් මුලින්ම නැටුම් ඉගෙන ගත්තේ කොල්ලුපිටිය මෙතෝදිස්ත පාසලෙන්. නර්තනය පාසැල්වල ඉගැන්වුවත් වෘත්තික නර්තන ශිල්පින්යන් වෙන් කවුරුවත් කල්පනා කළේ නැහැ. නර්තනයේ පුරුෂ පක්ෂයේ සම්මාදම නැත්නම් තාණ්ඩව ස්වභාවය මතු වෙන්නේ නැහැ. ඒනිසා නර්තනයේ පැවැත්මට නැට්ටුවන් බිහිවිය යුතුයි. මම හිතන්නේ නර්තනයට පිරිමි පක්ෂය සම්බන්ධ නොවීමට හේතුව ආර්ථික කාරණාවක්.

l මේ තත්ත්වය දිගටම තිබුණොත් පාරම්පරික නර්තනය පවත්වාගෙන යන්න දක්ෂ ශිල්පීන් නැතිවේවි. ඔවුන් නර්තනය තුළ රඳවා ගන්න කිසියම් වැඩපිළිවෙළක් අවශ්‍යයි කියලා ඔබ කල්පනා කරනවද?

ඒ වගේ වැඩපිළිවෙළක් අවශ්‍යයි කියලා අපි කල්පනා කරනවා. ඒ වගේම අපි තරුණ දක්ෂ නිර්මාණකරුවන් ගොඩනඟා ගන්න හා ඔවුන් ආරක්ෂා කර ගන්න ‘ගිෆ්ට් ඔෆ් ඩාන්ස්’ හා ‘ප්‍රෙසව් ද ඩාන්ස්’ නමින් වැඩසටහන් දෙකක් ක්‍රියාත්මක කරනවා.

l මේ වැඩසටහන යටතේ ඉගෙන ගන්න ශිෂ්‍යයන් තවදුරටත් චිත්‍රසේන පදනම සමඟ වැඩ කරනව කියලා එකඟතාවක් තියෙනවද?

ඔවුන් අපි එක්ක දිගටම වැඩ කරනවා කියලා දෙයක් නැහැ. ඔවුන්ට අවශ්‍ය නම් අපේ කණ්ඩායමට සම්බන්ධ වෙලා වැඩ කරන්න පුළුවන්. එහෙම නැත්නම් තමන් ජීවත්වන පළාත්වල කලායතන ආරම්භ කරන්න පුළුවන්. අපි ස්වාධීනව වැඩ කරන්න තියෙන ඉඩ අහුරලා නැහැ. ...... ‍ ‍‍‍‍‍කුරුල්ලෝ කොහොමත් ඉගිලිලා යනවා. නමුත් ඔවුන් දිගටම නර්තනයේ රැ‍ඳෙනව නම් ඒක අපේ බලාපොරොත්තු ඉටු කිරිමක්.

l කාන්තාවන්ට වෙස් බැඳීම තවමත් සමාජයේ විවාදයට ලක්ව තිබෙන මාතෘකාවක්. එය තවදුරටත් තහනම් දෙයක් විය යුතුය කියලා ඔබ විශ්වාස කරනවාද?

ඒ කාලේ වුණත් ඒකට අභියෝග කරපු අය හිටියා. චන්ද්‍රලේඛා නාටිකාංගනාව වෙස් බැන්දා. නමුත් මම උඩරට නැටුම් ‍ඉගෙන ගන්නට වෙස් බඳින්න ගියේ නැහැ. අපි වෙස් තට්ටුව වෙනුවට නලල් පටක් බැන්දා.

l නර්තනය වර්තමානයේ ස්ත්‍රී ශෘංගාරය මතු කරන කලාවක් බවට පත්වීම ගැන ඔබ හිතන්නේ කුමක්ද?

ආරම්භයේ සිටම අපේ පරමාර්ථය වුණේ අපේ නර්තනය දියුණු කිරීම ගැනයි. සෙක්සි ඩාන්ස් පෙන්වලා මිනිස්සුන්ව ආකර්ෂණය කරගන්න අපි කල්පනා කළේ නැහැ. ඇත්තටම ඒවා බාල උපක්‍රම.
කලාවක නිපුණතාව නැති අය‍ ප්‍රේක්ෂකයන් ආකර්ෂණය කරගන්න අවසානයේ පිහිට පතන්නේ විජ්ජාවල. ශෘංගාරය මතු කිරීමත් ඒ වගේ දෙයක්.

l නර්තනය වාණිජකරණය වීම ගැන ඔබේ අදහස කුමක්ද?

නර්තනය කියන්නේ පූජනීය දෙයක්. ඒක චිත්‍රසේනත් විශ්වාස කළා. ‘කන බොන තැන්වල නටන්නේ නැහැ’ කියන දේ චිත්‍රසේනගේ ප්‍රධාන ප්‍රතිපත්තියක්. අපි ඒක තදින්ම පිළිගන්නවා.

l චිත්‍රසේන පදනම දේශීය වශයෙන්ම මෙන්ම අන්තර්ජාතික වශයෙනුත් දේශීය නර්තනය නියෝජනය කරමින් විවිධ රඟ දැක්වීම් කර තිබෙනවා. ඒ අතර සාද තිබුණේ නැද්ද?

අපි නැටුවේ නැටුමට ගෞරවයක් ලැබෙන අපිට ගෞරවයක් ලැබෙන තැන්වල පමණයි. අපි කවදාවත් ‘කන බොන තැන්වල නටලා නැහැ’.
නේරු, චෝ එන්ලායි, ඉන්දිරා ගාන්ධි වගේ රාජ්‍ය නායකයන් පැමිණි අවස්ථාවල බණ්ඩාරනායක අගමැතිතුමා නර්තන ඉදිරිපත් කරන්න අපිට ආරාධනා කළා. අපි ඒ අවස්ථාවලදී අරලියගහ මන්දිරයේ වෙනම මණ්ඩපයක වේදිකාවක් මත නර්තන ඉදිරිපත් කළා. ඒක නර්තන දර්ශනයක්.
ෂෝ එකෙන් පස්සේ වෙනත් තැනක අමුත්තන්ට ආහාර ගැනීමට පහසුකම් සලසා තිබුණා. අපි සාද අතර නටන්න නොගියෙ එයින් කලාවෙ ගෞරවය නැති වෙන නිසයි.

l ප්‍රභූන් පිළිගැනීම සඳහා නර්තනය යොදා ගැනීම ගැනත් ඔබ දරන්නේ ඒ අදහසම ද?

චිත්‍රසේනත් කවදාවත් ඒ වගේ දේවල් කළේ නැහැ. මම වුණත් ඒක අනුමත කරන්නේ නැහැ. අපි හැමදාම නැටුවේ වේදිකාව මත පමණයි. තාමත් යන්නේ ඒ පිළිවෙළටම තමයි. සල්ලි කීයක් දෙනවයි කිව්වත් අපි කවදාවත් ‘කන බොන තැන්වල’ නටන්නේ නෑ. ඒ වගේම ‘උපහාර පෙරහැර’ සඳහා නර්තනය යොදා ගන්නෙත් නැහැ.

l චිත්‍රසේන වජිරා පදනම මෙරට ඉහළම වෘත්තික නර්තන කණ්ඩායම හැටියට විදේශ සංචාරවලදී ඉහළ ආදායමක් උපයා ගැනීමට හැකියාව තිබුණා නේද?

එවැනි ඉඩක් තිබුණා. නමුත් අපි මුල් තැන දුන්නේ මුදල් ඉපැයීමට නෙවෙයි. අපි නර්තන දර්ශන පැවැත්වුවේ නොමිලේ කියලා මම කියන්නේ නැහැ. අපි මුදල් අය කළා. ඒත් ඒක ඉහළ මිලක් නෙවෙයි. චිත්‍රාවත් මමවත් කවදාවත් නර්තනයෙන් හම්බ කළේ නැහැ. අපි දෙන්නගෙන් එක්කෙනෙක්ටවත් කවදාවත් රංගනයට දීමනා ලැබුණේ නැහැ. අපි ඒවා ගැන හිතුවා නම් මේ කාර්යය කරන්න ලැබෙන්නේ නැහැ.

l චිත්‍රසේන කලායතනය විවිධ දේශීය රංග සම්ප්‍රදායන් ඒකරාශී කොට නව නිර්මාණ බිහි කිරීමට උනන්දුවක් දැක්වූවත් වෙනත් රංග කණ්ඩායම් සමඟ හවුල් නිර්මාණ කිරීම සඳහා උනන්දුවක් දැක්වූයේ නැත්තේ ඇයි?

එකතුවීම සමානයත් සමඟ විය යුතු දෙයක්. අපි ඒ විදිහට සමාන අදහස් දරන අයත් එක්ක එකතුව වැඩ කරලා තියෙනවා. ඉන්දියාවේ නේත්‍රග්‍රාම් නාට්‍ය කණ්ඩායම සමඟ එකතුව අපි දැනටත් නිර්මාණ කරනවා. ඔවුන් විශේෂිත ගුරුකුලයක්. ඒ අය වාණිජ පරමාර්ථ සමඟ නර්තනය පටලවා ගන්නේ නැහැ. එහි සාමාජිකයන් ග්‍රාමය තුළම ජීවත් වෙමින් නර්තනයේ යෙදෙනවා.
අපි ඔවුන් එක්ක වැඩ කරන්න අනිත් හේතුව තමයි ඔවුන් නියෝජනය කරන නර්තන සම්ප්‍රදාය. නේත්‍රාග්‍රාම් නර්තන කණ්ඩායම වැඩ කරන්නේ ඔරිස්සා රංග සම්ප්‍රදායත් එක්කයි. ඒ නැටුම් ශිල්පය හරියට උඩරට නැටුමේ ස්ත්‍රී නැටුම කියන්න පුළුවන්. ඉතින් අපිට තේරුම් ගියා ඔවුන්ගේ නැටුමත් අපේ නැටුමත් සම්මිශ්‍රණය කිරීම ඵලදායි කියලා.
අපේ දක්ෂ ශිල්පීන් නේත්‍රාග්‍රාම්වලට ගිහින් ඉගෙන ගන්නවා. නවාතැන් පහසුකම් වියදම් ඔවුන් දරනවා. අපි වරකට මේ වැඩසටහන සඳහා යොමු කරන්නේ 7 - 8 දෙනෙක්. මොකද ඒ මිනිස්සුත් වැඩ කරන්නේ දුෂ්කරතා මධ්‍යයේ. කරදර කරන එක හරි නෑනේ.

සංවාදය

චන්දන ජයවීර

---

නර්තනයේ අනාගතය

පරපුරු තුනක් වජිරා - උපේකා - උමදන්ති ඡායාරූපය - ලක්ෂ්මන් නඩරාජා

චිත්‍රසේන කලායතනය ශ්‍රී ලංකාවේ සම්ප්‍රදායික නර්තනය පිළිබඳ පැරැණිම හා වඩාත්ම ප්‍රසිද්ධ පාසලය. එය ආචාර්ය චිත්‍රසේනයන් විසින් ආරම්භ කරන ලද්දේ 1944 දී ය. දේශීය නර්තන කලාව වෙනුවෙන් දැඩි සේ ඇප කැප වූ නර්තන ශිල්පීන් හා ප්‍රාසාංගික කලාකරුවන් බිහිකිරීම හා ඒ සඳහා අවශ්‍ය ශිල්පීය නිපුණතාව හා පුහුණුව ලබාදීම කලායතනයේ අරමුණයි. ශ්‍රී ලංකාවේ සම්ප්‍රදායික නර්තනය ඉගැන්වීම පිළිබඳ පළමු විෂය නිර්දේශය හා ව්‍යුහගත පුහුණු වැඩසටහන සකස් කරන ලද්දේ චිත්‍රසේන, වජිරා දෙපල විසිනි.
චිත්‍රසේන කලායතනය, චිත්‍රසේන නර්තන සංසදය පාලනය කරනු ලබන්නේ 1982 සමාගම් පනත යටතේ ලියාපදිංචි පුණ්‍ය ආයතනයක් වන චිත්‍රසේන වජිරා පදනම මඟිනි.
ශ්‍රී ලාංකේය සාම්ප්‍රදායික නර්තනය අන්තර්ජාතික වශයෙන් සම්භාවනීයත්වයට පත් කලා මාධ්‍යයක් බවට පත්කිරීම සඳහා වෙහෙසුණු මෙම දෙපළගේ මඟපෙන්වීම යටතේ නර්තනයේ විශිෂ්ටත්වයට පත් ශිල්පීන් දහස් ගණනක් ඉකුත් දශක හත තුළ බිහිව ඇත. පදනම විසින් ලබා දෙන ලද නිවැරැදි මඟපෙන්වීම යටතේ පෝෂිත වූ ඔවුන් සංස්කෘතික තානාපතිවරුන් බවට පත්ව ශ්‍රී ලාංකේය නර්තනයේ අභිමානය දසත රැගෙන යාමේ භාරදූර කාර්යයෙහි නියැලෙති.

චිත්‍රසේන උරුමය

ශ්‍රී ලාංකීය දේශයේ නර්තන කලාවේ උරුමය සොයා පාදා ගැනීමේ පු‍රෝගාමී කටයුත්තට මුලික වූයේ ආචාර්ය චිත්‍රසේනයන්ය. එතුමන්ගේ දැක්මට අනුප්‍රාණයක් වු වජිරාවන්ගේ හා දියණියන් වන උපේකා හා අංජලිකාගේද මිණිබිරියන් වන හේෂ්මා හා උමි, තාජිගේ කැපවීම මත චිත්‍රසේන පදනම සිය මෙහෙවර අභිමානවත් ලෙස සිව්වන පරපුර දක්වා ද රැගෙන යාමට සමත්ව ඇත. සප්ත දශකයක් ඉක්මවා ගිය එම මෙහෙවර චිත්‍රසේන ලේ උරුමයෙන් ඔබ්බට ගෙන යාමේ අවශ්‍යතාව චිත්‍රසේනයන්ගේ අනුප්‍රාප්තිකයන් හඳුනා ගැනීම සම්ප්‍රදායික නර්තනයේ ආයුෂ තවත් කලකට සහතික කරවයි.
නර්තනයේ ඉදිරි පැවැත්ම අරභයා මතුව ඇති අභියෝග ගැඹුරින් වටහාගත් චිත්‍රසේන දෙවන හා තෙවන පරපුර නර්තනය ව්‍යාප්ත කිරීම සඳහා සිය මෙහෙවර පුළුල් කොට ඇත.

“නර්තන සුරක්ෂාව” වැඩසටහන

මෙරටට අනන්‍ය සම්ප්‍රදායික නර්තනය අඛණ්ඩව පවත්වාගෙන යාමේ වැදගත්කම මනාව වටහාගත් චිත්‍රසේන පදනම ඒ සඳහා නව පරපුර නර්තන ක්ෂේත්‍රයට යොමු‍වීමේ අවශ්‍යතාව හැඳින ගනී. නව පරපුර නර්තනයට යොමුවීමට නම් එය ඔවුන්ට සුරක්ෂිත වෘත්තියක් බවට පත්විය යුතුය. නිපුන ශිල්පියෙක් බිහිකිරීම දින හෝ සති අනුව තීරණය වන කාර්යයක් නොවන හෙයින් ඒ සඳහා වසර ගණනාවක දුෂ්කර ව්‍යායාමයක යෙදිය යුතුය. ශිල්ප ඥානය සොයා යාමේ දැඩි කැපවීමකින් පැවැති තරුණ තරුණියන් සොයා ගොස් ඔවුන්ට නොමිලේ නර්තන දායාදය ලබා දෙන අතරම පුහුණු කාලය තුළ සුරක්ෂිත ආර්ථික පදනමක් ඇති කිරීමටද චිත්‍රසේන පදනම අදහස් කරයි. මේ යටතේ දැනට සිසුන් දස දෙනෙක් තෝරාගෙන පුහුණුව ලබා දෙන අතර ඔවුන්ට වසර දෙකක (2) පුහුණු කාලය සඳහා මසකට 3000 ක දීමනාවක් ලබා දේ.

“නර්තන දායාදය” වැඩසටහන

වෘත්තික නර්තන ශිල්පීන් ලෙස හා ගුරුවරුන් ලෙස කටයුතු කිරීමට අදහස් කරන ශිල්පීන් සඳහා මෙම වැඩසටහන ක්‍රියාත්මක කෙරේ. මෙහිදී සතියට දින 03ක් නර්තනය හා බෙර වාදනය ඉගැන්වෙන අතර වසර දෙකක අධ්‍යයන කාලයකින් යුක්තය. පුහුණු කාලයේ දී ඔවුන්ට මසකට 10,000ක දීමනාවක් ලබාදේ. පුහුණුවෙන් පසු පදනමට සම්බන්ධව කටයුතු කළ හැකි අතර සිය කැමැත්ත අනුව ස්වාධීන ශිල්පීන් ලෙස නිර්මාණකරණයෙහි යෙදීමේ අවස්ථාවද හිමිවේ.
මෙම වැඩසටහන් සඳහා සම්බන්ධවීමට ද එය පවත්වාගෙන යාම සඳහා ද නර්තන හිතෙෂීන්ගෙන් චිත්‍රසේන වජිරා පදනම සහය බලාපොරොත්තු වෙයි.

- චන්දන

---

ලාංකේය මුද්‍රා නාට්‍යයේ චිත්‍රසේන මුද්‍රාව

රබින්ද්‍රනාත් තාගෝර්යන්ගේ නෘත්‍ය නාටකය වූ “ශාප්මෝචන්” ඔස්සේ ඇති වූ නෘත්‍ය නාටක පිළිබඳ ප්‍රබෝධය ලාංකේය මුද්‍රානාට්‍ය කලාවක් සඳහා පසුබිම සකස් කළේය. මුද්‍රානාට්‍ය කලාව මෙරට ස්ථාපිත වීමටත්, ප්‍රචලිතවීමටත් හේතු වු‍ෙය් චිත්‍රසේන වජිරා දෙපළ කළ නිර්මාණයන්ය. දශක හතක් ඉක්මවා යන ඔවුන්ගේ නිර්මාණ මුද්‍රාවේ ඉසියුම් තැන් කිහිපයක් මෙසේ දක්වමු.
විදුර - 1943 දී ප්‍රදර්ශනය විය. චිත්‍රසේනගේ මුල්කාලීන මුද්‍රා නාට්‍යයකි. විදුර ජාතකය ඇසුරින් සකස් වූවකි. ඉන්දියානු නෘත්‍ය නාටක හා භාරතීය නර්තනයේ බලපෑම දක්නට ඇත.
චණ්ඩාලි - චණ්ඩාලි කුලියේ තරුණියක් ආනන්ද හිමියන්ට ප්‍රේම කිරීම හා එයින් ඇතිවන ගැටුම මුල් කරගත් බෞද්ධ පුරා වෘත්තය ඇසුරින් නිර්මිත මුද්‍රා නාට්‍යයකි. චිත්‍රසේනයන්ගේ මුල් කාලීන (1952) නිර්මාණයකි. එහි නව නිෂ්පාදනය 1996 දී වජිරා විසින් කරන ලදී.
නල දමයන්ති - චිත්‍රසේනයන්ගේ මුල් කාලීන නිර්මාණයන්ගෙන් වඩාත්ම ජනප්‍රියත්වයට පත්වූහ. පරිනත නිර්මාණය මෙයයි. මහාභාරතයේ පෙම්කතාව මෙයට පාදකව ඇත. 1951 දී මුල්වරට නිෂ්පාදනය කළ අතර එහි නව නිෂ්පාදන කිහිපයක්ද බිහිව ඇත.
සාම විජය - විදේශ රටක රඟ දක්වනු ලැබූ ප්‍රථම ලාංකේය මුද්‍රා නාට්‍ය නිර්මාණය මෙයය. රුසියාවේ හා චෙකොස්ලෝවැකියාවේ රඟ දක්වා ඇත. පිටපත තේජා ගුණවර්ධනයෝය. ලෝක සාමය තේමා කරගත් මෙම නිර්මාණයෙන් මුල්ම මිනිසා හා ගැහැනියගේ සිට ලෝකය විකාශය වූ අයුරුත් මිනිසාගේ බල තණ්හාව නිසා යුදවාදී තත්ත්වය මත න්‍යෂ්ටික විනාශයක අභිමුවට ජගත් ප්‍රජාව පත්ව ඇති අයුරුත් මෙම නිර්මාණයෙන් කියවේ.
කරදිය - ශ්‍රී ලාංකික අනන්‍යතාව ප්‍රබල ලෙස නිරූපණය කෙරෙන නිර්මාණය මෙන්ම දිවයිනේ සෑම ප්‍රදේශයකම පාහේ වේදිකාගත වූත් අතිශයින්ම ජනප්‍රිය වූ නිර්මාණය කරදියය. ධීවර ජීවිතයේ ඛේදජනක තත්ත්වය මෙයින් නිරූපිතය. රුසියාවේ “බොල්ෂෝයි” රඟහල ඇතුළු විදේශීය රඟහල ගණනාවක ප්‍රදර්ශනය කෙරී ඇත. අවස්ථා කිහිපයකදී නව නිෂ්පාදන බිහිව ඇත.
කිංකිණි කෝලම - ජන නාට්‍ය ලක්ෂණ සහ ලාංකික නර්තන උඩ, පහතරට නර්තන සම්ප්‍රදායන්ගේ ලක්ෂණ මනාව උකහාගත් උපහාස මුද්‍රා නාට්‍යයකි. නාට්‍යමය ඉදිරිපත් කිරීම අතින් ඉදිරිගාමී උත්සාහයකි. දුරස්ථිකරණ ලක්ෂණ යොදා ගෙන ඇත. කුල භේදය පිළිබඳ ගැටලුව සාකච්ඡාවට ලක් කෙරෙන මෙම චිත්‍රසේන නිර්මාණය මුල්වරට වේදිකාගත වූයේ 1975 දීය.

ශිවරංග - මෙහි නැටුම් නිර්මාණය කිරීමේදී ඉන්දීය නර්තන රටාවලට අමතරව නිදහස් ශෛලියේ චලන රටාද යොදාගෙන ඇත. සති පූජාවට මුල්වූ හින්දු සමාජයේ එන ශිව - සති පෙම් පුවත හා සතී සෑයට පැන දිවි පිදීම පිළිබඳ පුවත ඇසුරින් නිර්මාණය වී ඇත. මෙහි සංගීතය සඳහා රවි ශංකර් ලන්ඩන් සංධ්වනි කණ්ඩායම සමඟ එක්ව නිම වූ නිර්මණයක් යොදා ගෙන ඇත. 1985 දී වේදිකාගත විය.

(96 මුද්‍රා නාට්‍ය දින ප්‍රකාශනය ඇසුරිනි)

http://www.dinamina.lk/2014/07/18/_art.asp?fn=f1407182

Read More

මේ කතාවටත් කන් දෙන්න!

ජපන් ජාතික මහාචාර්යවරයකු වන ෂිබුයා තොෂිඕ ශ්‍රී ලංකාව ගැන පොතක් ලියා තිබේ. මේ පොතට ඇතුළත් වී ඇත්තේ අපේ සංස්කෘතිය තුළ පවත්නා හර පද්ධතිය යි. ජපානය භෞතික වශයෙන් ශීඝ්‍ර දියුණුවක් අත්පත් කරගෙන ඇති’මුත් සාංස්කෘතික වශයෙන් කඩාවැටීමකට ලක් වී ඇතැ’යි මහාචාර්යවරයා පැහැදිලි කරයි. එම සංස්කෘතික සෝදාපාළුව තුළ හුදෙකලා ජපනකු බිහි වී ඇති බව ද ඔහු පෙන්වා දෙයි. හැබෑවට ම ෂිබුයා මහතා උත්සාහ දරා ඇත්තේ ශ්‍රී ලංකාව සංස්කෘතිය අතින් උසස් රාජ්‍යයක් ලෙස පෙන්වා දීමට ය.
සංස්කෘතිය මෙතරම් දියුණු නම්; රටේ අපරාධ වැඩි වන්නේ මන්දැ’යි කෙනකු ප්‍රශ්න කරන්නට පුළුවන. කුඩු ජාවාරම්කාරයන් මෙතරම් කොටු වන්නේ මන්දැ’යි තවත් කෙනකු ප්‍රශ්න කරන්නට පුළුවන. එසේ ප්‍රශ්න කිරීම සාධාරණ ය. හේතුව අපරාධවල වර්ධනයක් සේ ම ඒවා රස කරමින් වාර්තා කිරීමක් ද දකින්නට ලැබෙන බැවිනි. අපරාධයක් පසුපස යමින් එය නිරූපණය කොට දැක්වීමේ ජනප්‍රිය රූපවාහිනී වැඩසටහනක් මීට වසර කිහිපයකට පෙර විකාශය විය. විශාල ආකර්ෂණයක් දිනාගත් මේ වැඩසටහන නිසා අපරාධ වර්ධනය වූ බව එහි නිෂ්පාදකයෝ ම අද පිළිගනිති.
ඉන්දියාව ජනමාධ්‍ය සම්බන්ධයෙන් ඉතා වැදගත් රාජ්‍යයෙකි. විශ්වවිද්‍යාල මට්ටමේ ජනමාධ්‍ය පාසල් දෙසීයකට ආසන්න සංඛ්‍යාවක් එහි පවතී. වසරකට දහස් ගණනක් ජනමාධ්‍ය උපාධි ලබති. ඉන්දියාවේ ජනමාධ්‍ය කලාව, ලෝක සන්නිවේදන ජාලයේ එක්තරා ශෛලියක් ලෙස ද පිළිගැනේ. එහි ජනමාධ්‍ය පිළිබඳ මහාචාර්යවරයකුගෙන් ප්‍රවෘත්ති යනු කවරේදැ’යි කෙනෙක් විමසූහ. මහාචාර්යවරයා ගත් කටට ම කියා සිටියේ ප්‍රවෘත්ති යනු ලිංගිකත්වය, අපරාධ හා මුදල් ගනුදෙනු යන්න ය. මේ නිර්වචනය වෙළෙඳාම සම්බන්ධයෙන් නිවැරැදිය. එහෙත් සංස්කෘතිය සම්බන්ධයෙන් අතිශයින් ම වැරැදිය.
රටේ ප්‍රමුඛ පෙළෙහි භික්ෂූන් වහන්සේ පිරිසක් මීට මාස ගණනකට ඉහත දී ජනාධිපතිවරයාට සන්දේශයක් භාර දුන්හ. එහි සඳහන් වූයේ පුවත්පත් මඟින් ඉතා රසවත් කොට අපරාධ වාර්තා කිරීම නිසා අපරාධ සාමාන්‍යකරණයට ලක් වී එය අත්හදා බලන පිරිස වැඩි වී ඇති බව ය. එබැවින් ජනමාධ්‍ය වාර්තාකරණයට නීති පනවන්නැ’යි උන්වහන්සේලා ඉල්ලා සිටියහ. ජනමාධ්‍යයට වාරණ පැනැවීම අසීරු කටයුත්තකි. එය තවත් ගැටලු සමුදායක ආරම්භයක් වන්නට ද පුළුවන. ජනාධිපතිවරයා ජනමාධ්‍ය ප්‍රධානීන් කැඳවා මේ පිළිබඳ උපදේශනයක් ලබා දුන්න ද වාර්තාකරණයෙහි වෙනසක් දකින්නට නැත.
මේ පසුබිම තුළ ම විමැසිය යුතු තවත් අංශ දෙකක් තිබේ. පළමුවන්න අපරාධ මර්දනය සඳහා ආණ්ඩුව ගෙන ඇති පියවර ය. විවිධ අපරාධ මර්දනය සඳහා ආණ්ඩුව වෙනදාට වඩා උනන්දුවක් හා සැලැකිල්ලක් දක්වා තිබේ. විශේෂ පොලිස් ඒකක ගණනාවක් ද ඒ සඳහා අලුතෙන් පිහිටුවා ඇත. රාජ්‍ය ප්‍රධානීන්ගේ අවධානය ද ඒ කෙරෙහි දැඩි ව එල්ල වී ඇත. දෙවන්න අපරාධකරුවන් පුනරුත්ථාපනය කෙරෙහි වැඩි අවධානයක් යොමු කර තිබීම ය. බන්ධනාගාර තුළ පවා එම වැඩසටහන් හොඳින් ක්‍රියාත්මක වෙයි. මේ හේතු - සාධක නිසා අපරාධ සම්බන්ධිත පුළුල් සංවාදයක් රට තුළ පවතී. එය ඇතැම් දෙනා වැරැදි ලෙස අර්ථ දක්වති.
අප මේ තීරුව ආරම්භ කළ තැනට යළි ප්‍රවේශ වුවහොත් ජපානය වැනි රටකට වඩා ගැඹුරු සාංස්කෘතික පසුබිමක් අපට ඇතැ’යි කියන්නට පුළුවන. ලෝකයේ මුල් ම ශිෂ්ටාචාර සමඟ යම් යම් සාදෘශභාවයක් රටේ ඉතිහාසය තුළ පවතී. පුරා විද්‍යාත්මක සාක්ෂිවලින් ද ඒ බව සනාථ වේ. මහවැලි ගඟ දෙපස පැවැති ඉපැරැණි ශිෂ්ටාචාරයක් ගැන ද ඉතිහාසඥයන් අතර කතාබහක් පවතී. කුමක් වුව විදේශීය ආක්‍රමණ නිසා එම ශිෂ්ටාචාරයේ හර පද්ධතිය විනාශ වූ බව පිළිගත යුතු ය. එය වඩාත් විනාශකාරී ලෙස බලපාන්නට වූයේ 1977 න් පසුව ය.
ශ්‍රී ලංකාව තුළ බලවත් ආර්ථික කැරැල්ලක් ක්‍රියාත්මක වූයේ 1977 න් පසුව ය. එය ආර්ථික ආක්‍රමණයක් ලෙසත් සාංස්කෘතික විනාශයක් ලෙසත් හඳුන්වා දෙන්නට පුළුවන. රටක ආර්ථිකය සැලැසුම් කළ යුත්තේ රටේ ඉතිහාසය, මිනිසුන්ගේ චින්තනය, දේශීය රටාව හා රටේ සම්පත් ද සැලැකිල්ලට ගනිමින් ය. විවෘත ආර්ථිකය හඳුන්වා දුන් ජේ. ආර්. ජයවර්ධන මහතා ඒ සියල්ල උඩු -යටිකුරු කළේ ය. සාහිත්‍යය, ඉතිහාසය වැනි මානව ශාස්ත්‍ර විෂයයන් අධ්‍යාපනයෙන් අතුගා දැමිය යුතු යැයි ඔහු කල්පනා කළේ ය. ඒ වෙනුවට තාක්ෂණයෙන් දරුවන්ගේ ඔළු ගෙඩි පුරවා දැමිය යුතු යැයි ද ඔහු කල්පනා කළේය. මේ ක්‍රමය ඔස්සේ බිහිවුණේ බල්ලන් මරා හෝ සල්ලි හොයන මිනිසුන් ය.
කවුරු කුමන විග්‍රහ ඉදිරිපත් කළ ද 1977 න් පසු අපේ ආර්ථිකය හෝ සංස්කෘතිය හෝ පිළිගත හැකි සංවර්ධනයක් ලැබුවේ නැත. මිනිසුන් ස්වල්ප දෙනකු අත මුදල් ගැවසුන ද, ජාවාරම් අධික විය. දූෂණ අධික විය. දුප්පතුන් වඩාත් දුප්පත් වූ අතර පොහොසතුන් ස්වල්ප දෙනකු වඩාත් පොහොසත් වන බව දකින්නට ලැබිණි. මිනිසුන්ගේ චින්තනය වෙනස් වීම නිසා තරගය අධික විය. එකිනෙකාට වෛර කරන සමාජයක් බිහි විය. මිනිස් ජීවිත ශත පහකට ගණන් නො ගැනිණි. එහි ප්‍රතිඵලය වූයේ සාමූහිකත්වය බිඳී යෑම ය. මෙය වක්‍රාකාරයෙන් අපරාධ වර්ධනයට රුකුලක් විය.
රටේ පවතින අපරාධ ගැන කතා කරන හා ඒවා විවේචනය කරන අයගේ අවධානයට ලක්විය යුතු කරුණු කිහිපයක් තිබේ. සංචාරක කර්මාන්තය නිසා සංස්කෘතිය විනාශ වන්නේ නැත. සංස්කෘතිය විනාශ න්නේ චින්තනය විකෘති කිරීමෙන් ය. චින්තනය විකෘති කිරීමට මඟ පෑදුණේ විවෘත ආර්ථික සම්ප්‍රදායයෙන් ය. එහෙත් අද එය කළමනාකරණයට ලක්කර තිබේ. දේශීය චින්තනයට හා අපේ උරුමයට මුල් තැන ලැබී තිබේ. උගතුන් ඒ ගැනත් කතා කළ යුතු ය.

 http://www.dinamina.lk/2014/07/19/_art.asp?fn=e140719

Read More

උපදින්නේ 1936 - මිය යන්නේ 1987

ජෝතිපාල ජනමූල ගායකයෙක්

ජෝතිපාල ගුණ සමරුවේ දී දයා ශ්‍රී නරේන්ද්‍ර රාජපක්ෂ කියයි

එච්.ආර්. ජෝතිපාල මෙරට සිටි ජනප්‍රිය ගායකයා පමණක්ම නොවන බවත් ඔහු හදවත රත්තරං ජෝති ලෙස ජනතාව අතර ප්‍රකට වූ මානව හිතවාදී සුහදශීලී මහා ගායකයෙක් බවත් ඔහු මෙරට බිහිවූ විශිෂ්ට ගණයේ ජනමූල ගායකයා ලෙස හැඳින්වීමට පුළුවන් බව ධීවර හා ජලජ සම්පත් සංවර්ධන අමාත්‍යාංශ‍ෙය් මාධ්‍ය ලේකම් හා සයුර ධීවර රේඩියෝවේ අධ්‍යක්ෂ දයා ශ්‍රී නරේන්ද්‍ර රාජපක්ෂ මහතා පවසයි.

ඔහු එසේ පැවැසුවේ එච්.ආර්. ජෝතිපාල 27 වැනි ගුණානුස්මරණ උළෙල හා ජෝති ගීත සැදෑව නැමැති උළෙලේ ජෝතිපාල අනුස්මරණ දේශනය පවත්වමිනි.

පන්සිළු භාරත ලංකා ගී රසික සංසඳය සංවිධානය කළ මෙම ජෝති අනුස්මරණ උළෙල පසුගියදා රත්නපුර, කහවත්ත රුවන්පුර විද්‍යාපීඨ ශ්‍රවණාගාරයේදී පැවැත්වුණි.

විදුලිබල හා බලශක්ති නියෝජ්‍ය ඇමැති ප්‍රේමලාල් ජයසේකර, සබරගමුව පළාත් සභාවේ වැඩබලන ප්‍රධාන ඇමැති හා සංස්කෘතික හා අධ්‍යාපන ඇමැති නීතිඥ භානු මුණුප්‍රිය මහත්වරුන්ගේ ප්‍රධානත්වයෙන් මෙම උත්සවය පැවැත්වුණි. මෙහිදී ජෝතිපාල ගීත ප්‍රසංගයක්ද පැවැත්වුණි.

මෙහිදී වැඩිදුරටත් අදහස් දක්වමින් කතා කළ රාජපක්ෂ මහතා මෙසේද පැවැසීය.

එච්.ආර්. ජෝතිපාල උපදින්නේ 1936 පෙබරවාරි මාසයේ 12 වැනිදා මාතරදී, ඔහු මිය යන්නේ 1987 ජූලි 07 දා කතරගමදීය. ජෝතිපාල මහතාගේ දෙමාපියන් මාතර සිට කොළඹ මරදානේ පදිංචියට එනවා. මේ නිසා ජෝති අධ්‍යාපනය ලබන්නේ කොළඹ මරදානේ ‍ ලෝරන්ස් විද්‍යාලයෙන් හා දෙමටගොඩ ශාන්ත ජෝන් විද්‍යාලයෙන්. ඔහු ජේ.එස්. සී. විභාගයෙන් සමත් වෙනවා. ඔහුගේ පළමු රැකියාව වන්නේ කොළඹ සුලෙයිමාන් රෝහලේ සේවකයකු ලෙසයි. ජෝතිගේ පළමු වැටුප මසකට රු.25/=ක් වුණා. ඔහුට සහෝදර සහෝදරියන් 5 දෙනෙකු සිටිනවා. ජෝති, බ්ලෝසම් වික්ටර් මෙනෙවිය සමඟ විවාහ වෙනවා. ඔහු දූවරු 4 දෙනකුගේ පියෙක්. ජෝතිපාල කුඩා කළ සිටම කලාවට ලැදි පුද්ගලයෙක්.

ඔහු ආධුනික ගීත ගායනයෙන් පළමු ස්ථානයට පත්වෙන්නෙත් මේ වකවානුවේදීමයි. මේ නිසා ඔහුට සිරිසේන විමලවීර මහතාගේ පොඩි පුතා චිත්‍රපටයේ ගීත ගායනයට අවස්ථාව සැලසෙනවා. එහිදී ප්‍රවීණ ගායිකාවක සමඟ ගීතය ගායනා කිරීමට අවස්ථාව ලැබෙනවා. මෙහිදී ජෝතිගේ ප්‍රතාපවත් කට හඬ නිසා ශබ්දාගාරයම දෙදරීම හේතුවෙන් එවකට ශබ්ද පරිපාලකයා ජෝතිට ගීත ගායනා කළ නොහැකි බව දක්වමින් ගායනයෙන් ඉවත් කරනවා. නමුත් ජෝති සිය උත්සහය අත්හරින්නේ නැහැ. වර්ෂ 1952 දී ජෝතිගේ ගායන සිහිනය සැබෑ වෙනවා. ඒ ප්‍රවීණ ගායිකා වසන්තා සන්දනායක මහත්මිය සමඟ මහවැලි නදියේ.. යුග ගීතය ගායනා කරන්නට අවස්ථාව ලැබෙනවා.

ඉන් අනතුරුව ජෝතිගේ ස්වර්ණමය අවධිය උදා වෙනවා. ඒ සුරතලී චිත්‍රපටයට “සිරියා මේ සාරා.. නැගේවී හද මෝරා...” ගීතය ගායනා කිරීමට අවස්ථාව ලැබීමයි. මේ නිසා ජෝති මෙරට ජනතාව අතර අතිශයින් ජනප්‍රියත්වයට පත්වෙනවා. එතැනින් ආරම්භ කළ ජෝතිගේ ගීත පෙළහර අද දක්වාම අතිශයින් ජනප්‍රියයි. මෙරට ගීත ක්ෂේත්‍රයේ ජනප්‍රිය සංස්කෘතිය බිහි කරන්න දායක වන යෝධයා එච්.ආර්.ජෝතිපාලයි.

ඒ නිසාම ඔහු ජීවත්ව සිටින කාලයේ මෙරට සිටි අති ජනප්‍රියම ගායකයා නමින් විරුදාවලි ලත් ජෝති අද එහු මියගොස් වසර 27ක් ගතවීත් එදා තරම්ම අදත් ජනප්‍රියයි යැයි කීවොත් එය සත්‍යයක්. මේ වන විට ජෝති ගීත දසදහස් ගණනක් ගයා තිබෙනවා. ඒ සියල්ලම එදා මෙන් අදත් ජනප්‍රියයි. ජෝතිගේ ගායනා කුසලතාව තුළ මා දකින විශේෂතාවය නම් ජෝති ගීතයේ පද රචනයට නව ප්‍රාණයක් ලබාදුන් විශ්ව කර්මයයි.

මේ නිසාම ජෝතිගේ පෞරුෂාත්මක හඬ ගීත පදවැල හා සංගීතයද අභිභවමින් මතුවෙනවා. මේ නිසා ජෝතිගේ හඬට පද රචනය හා සංගීතය දෙවැනි වුවදැයි විටෙක මට හිතෙනවා. එනම් ඒ ගීතය වෙනත් ගායකයෙක් ගායනා කළොත්, ජෝතිගේ හඬ පෞරුෂය මෙන් ප්‍රාණවත් භාවයකින් යුක්ත නොවන්නට පුළුවන්. මේකයි ජෝතිගේ විශේෂත්වය. ජෝති තුළ පැවැති හඬ පෞරුෂත්වයට සම කරවන්නට පුළුවන් හඬක් තවත් බිහිවී නැහැ. ජෝති මියගොස් වසර 27ක් ගෙවෙද්දීත් අපට ජෝතිපාල කෙනෙක් බිහි කරවන්නට බැරි වී තිබීමෙන්ම පෙනී යන්නේ ජෝති ගායන ලෝකයේ සක්විති කියා නොවේද?

ජෝතිගේ හඬ පෞරුෂය කදිමට ගැලපුණ මෙරට සිටි අසහාය නළුවන් දෙදෙනෙක් සිටිනවා. එක් අයෙක් අපේ සිනමා සක්විති ගාමිණී ෆොන්සේකා, අනෙක් කෙනා අපේ සුන්දරතම හා ජනප්‍රියම නළුවා විජය කුමාරතුංග. මේ දෙදෙනාට කදිමට ගැලපුණු හඬ ජෝතිගේ අභිමානවත් හඬයි. මේ නිසාම ජෝති ගායනා කරන ගීත අඩංගු විජය, ගාමිණී රඟපෑ චිත්‍රපට බොක්ස් ඔෆිස් වාර්තා තබමින් තිරගත වුණා. මේ බව විජය කුමාරතුංගයන් 1 වැනි ජෝති ගුණසමරුවේදී ද කිව්වේ, ජෝතිගේ හඬ නැති සිනමාවක් ගැන හිතන්නටවත් බැරි බවයි.

ඒ වගේම එදා විජය හැඟීම්බරව කිව්වා ජෝතිගේ වියෝවෙන් මගේ හඬ නැතිවුණා වගේ දැනෙනවා කියලා. මේකෙන් පැහැදිලි වන්නේ මෙරට සිනමාවට ජනතාව කැන්දාගෙන එන්න ජෝතිගේ හඬ කොතරම් ප්‍රයෝජනවත් වුණාද කියන එක නේද? ගාමිණී - විජයට පසුව ජෝති ටෝනි රණසිංහ, ජෝ අබේවික්‍රම, රවින්ද්‍ර රන්දෙනිය, අමරසිරි කලංසූරිය, සනත් ගුණතිලක, තිස්ස විජේන්ද්‍ර, වැනි සිනමාවේ විවිධ වකවානුවල සිටි කතානායකයින්ටත් හඬ දුන්නා. ඒ හඬ නිසා ඔවුනුත් සිනමාවත් බැබලුණා.

ජෝති ගායකයෙක් විතරක් නෙවෙයි. ඔහු නළුවෙක් වුණා. ජෝති රොබින් තම්පොගේ සුදු ස‍ඳේ කළුවලා, චිත්‍රපටයේ රඟපාමින් රංගනයට එක් වෙනවා. ඉන්පසුව ඔහු ඇතුළුවීම තහනම්, ඔබයි මමයි, මගේ නංගි ශ්‍යාමා, දමයන්ති, අභිරහස, සැලි, හොඳම නළුවා, ගීතා, සුමිතුරෝ, සුනේත්‍රා, තණගිරවි, සිකුරු දසාව, රිදී තැල්ල, ශාන්ති ඇතුළු චිත්‍රපට 35ක පමණ රඟපෑවා. ඒවගේම ඔහු සුමිතුරෝ චිත්‍රපටය නිෂ්පාදනය කරමින් චිත්‍රපට නිෂ්පාදකයකු බවටත් පත්වුණා.

1980 දී සැප්තැම්බර් 6 දා ජෝති විසින් ජෝති රාත්‍රිය ගීත ප්‍රසංගය ටවර් රඟහලේ දී පෙන්වනවා. ටවර් රඟහලේදී දර්ශන 100ක් පෙන්වූ එකම සංගීත ප්‍රසංගයත් ජෝති රාත්‍රිය පමණයි. අදත් එය වාර්තාවක් විදියට සටහන් වෙලා තියෙනවා. ජෝති කියන්නේ ගායකයෙකු කලාකරුවෙකු පමණක් නොවෙයි. ඔහු ශ්‍රේෂ්ඨ ගතිගුණ ඇති උතුම් මනුෂ්‍යයෙකු ලෙස හඳුන්වන්න පුළුවන්.

ජෝතිගේ ගුණ දන්න හැම කෙනාම දන්නා කාරණයක් තමයි ජෝතිගේ මනුෂ්‍යකම, ජෝති කියන්නේ මානව හිතවාදී කලාකරුවෙක්. ඔහු කවදාවත් ගීත ගායනා කරන්න මිලක් නියම කළේ නැහැ. ඔහු හමුවට එන අයගෙන් අහන්නේ මටකීයක් ගෙවන්න පුළුවන්ද කියලා විතරයි. ඒ ගාණ ගන්න තරම් ජෝති නිහතමානි වුණා. බොහෝ අවස්ථාවලදී ඔහු සල්ලි ගන්නේ නැතිව සිංදු කිව්ව සංදර්ශන ඕනෑ තරම් තිබුණා. ජෝති ඒ තරම්ම නිහතමානි කලාකරුවෙක්.

ඒවගේම දුප්පත් මිනිසුන්ට තමඅත මිටේ තියෙන සල්ලි, ඇඳුම් පැළඳුම් පවා පරිත්‍යාග කරන්නට තරම් ජෝති කා අතරත් නිහතමානි චරිතයක් ලෙස ගෞරවයට පාත්‍ර වුණා. ජෝති පහළම පන්තියේ සිට ඉහළම පන්තියේ සිටින අය ඇසුරු කළා සේම ඔහු පහළම පන්තියේසිටින දුප්පත් ජනතාවට නොමසුරුව උදව් කළ නිසාම ඔහු ජනතාවගේ හදවතේ හැමවිටම ලැගුම් ගන්නේ තමන්ගේ මිතුරෙකු හිතවතෙකු ලෙසයි. මේ නිසා මම දකින්නේ ජෝති කියන්නේ ජන මූල ගායකයෙක් ලෙසයි. ජනතාව අතරම සිටින, ජනාව සමඟ දුක බෙදාගත් මානව හිතවාදී ගායකයෙකු ලෙස ජෝති හැමදාම ගෞරවයට ලක්වෙනවා.

මේ ජනමූල ගායකයා ගැන වරක් ලංකාවට පැමිණි භාරතයේ ගීත සක්විති ලෙස ප්‍රකට දිවංගත මොහොමඩ් රාෆි කිව්ව කතාවකින් මේ ජෝති ගුණ සමරු දෙසුම මම නිමාවට පත්කරන්නම්. “ලංකාවේ එක් ගායන ශිල්පියෙක් ඉන්නවා. ඔහුගේ නම ජෝතිපාල, ඔහුගේ ඇතැම් ගීත මම අහලා තියෙනවා. මේ ලංකාව ඔහුට පුංචි වැඩියි.

ඔහු ඉපදිය යුතුව තිබුණේ ලංකාවේ නෙවෙයි මහා භාරතයේයි. මොහොමඩ් රාෆි එහෙම කියනවා. ඇත්තටම ජෝති ඔබ මහා භාරතය ලෙස සුවිශාල වූ ගුණ සම්භාරයකින් පිරිපුන්, පෞරුෂයකින් පිරිපුන් ජනමූල ගායකයෙක් ලෙස අපේ ඉතිහාසයට එක්වෙනවා. ජෝති ඔබට නිවන් සුව පතනවා.

http://www.dinamina.lk/2014/07/15/_art.asp?fn=n14071512

Read More

“ග්‍රෑම් 200”....??? 200 gm...???

පලතුරු පරිභෝජනය ඉහළ නංවන්න ඉතිහාසයේ ප්‍රථම වරට පලතුරු ප්‍රවර්ධන සතියක්

මහින්ද අලුත්ගෙදර හොරණ සිට....

කෘෂිකාර්මික අංශයෙන් ස්වයංපෝෂිත ශ්‍රී ලංකාවේ පලතුරු පරිභෝජනය ඉහළ නැංවීමේ අරමුණින් ඉතිහාසයේ පළමු වරට පලතුරු ප්‍රවර්ධන සතියක් හඳුන්වා දෙයි.

පලතුරු ප්‍රවර්ධන සතිය - 2014 “ග්‍රෑම් 200” පලතුරු ප්‍රදර්ශනය හා සැණකෙළිය ජනාධිපති මහින්ද රාජපක්ෂ මහතාගේ ප්‍රධානත්වයෙන් හොරණ, කනන්විල පලතුරු පර්යේෂණ හා සංවර්ධන මධ්‍යස්ථානයේ දී ඊයේ (14) ආරම්භ කෙරුණු අතර එය ලබන 21 දා දක්වා පැවැත්වීමට කටයුතු සංවිධානයකර ඇත.

කෘෂිකර්ම අමාත්‍යාංශය සහ කෘෂිකර්ම දෙපාර්තමේන්තුව එක්ව සංවිධාන කරන මේ ප්‍රදර්ශනය හා සැණකෙළිය ශ්‍රී ලාංකික කෘෂිකර්ම ඉතිහාසයේ පළමුවරට පැවැත්වෙන අතර ඒ තුළින් ශ්‍රී ලාංකීය ජනතාව අතර පලතුරු පරිභෝජනය ඉහළ නැංවීම සහ දේශීය පලතුරු භාවිතය ප්‍රචලිත කිරීම අරමුණ වේ. ඊට අමතරව පලතුරු නිෂ්පාදය උනන්දු කරවීම තුළින් දේශීය නිෂ්පාදනය ඉහළ නැංවීම මෙන්ම විදේශ ආනයනයන් නවතාළීම ද මේගින් අපේක්ෂා කෙරේ.

ශ්‍රී ලංකා පළකුරු සංගමය ස්ථාපිත කිරීම මෙන්ම පලතුරු වගාව සම්බන්ධ නව ව්‍යාපෘති 12ක් හදුන්වාදීමද මෙහිදී සිදුවිණි.

“ග්‍රෑම් 200” ලෙස නම්කර ඇති මේ ප්‍රදර්ශනය දිනපතා පෙරවරු 8.30 සිට පස්වරු 6.00 දක්වා විවෘතව තැබෙන අතර මෙහි දී වෙළෙඳපොළ තුළ පලතුරු සුලබ කිරීම සඳහා පලතුරු ගම්මාන ව්‍යාපෘතියක් ඇති කරමින් තෝරාගත් පලතුරු ගම්මාන කිහිපයක වගාකරුවන් සඳහා නොමිලේ පලතුරු පැළ ලබාදීම සිදුකෙරේ. ඊට අමතරව පලතුරු ගස් පුනරුත්ථාපනය කිරීමේ ජාතික ව්‍යාපෘතිය යටතේ තෝරාගත් පුහුණු කිරීමේ නිලධාරීන් හට විශේෂිත කප්පාදු කිරීමේ උපකරණ කට්ටල ලබාදීමද සිදුකෙරේ.

නිරෝගී ජීවිතයක් උදෙසා පලතුරු ආහාරයට එක්කර ගැනීම ඉතා වැදගත් වන අතර පුද්ගලයෙකු දිනකට පලතුරු ග‍්‍රෑම් 200ක් අවම වශයෙන් පරිභෝජනය කළ යුතු වුවද බොහෝ දෙනා දිනකට එක් පලතුරක් හෝ තමන්ගේ ආහාරයට එක්කර ගැනීමට උනන්දු වන්නේ නැත. මේ හේතුවෙන් ශ්‍රී ලංකාවේ දේශීය පලතුරු පරිභෝජනය ඉතා අවම මට්ටමක පවතී.

වතු වගාවේ අතුරු බෝගයක් ලෙස පලතුරු වගා කිරීමේ ව්‍යාපෘතිය යටතේ තෝරාගත් වතු සමාගම්වලට නොමිලේ පැළ ලබා දීමටද, අවාරයේ මල් උත්තේජනය කිරීමේ ව්‍යාපෘතිය යටතේ තාක්ෂණික තොරතුරු පති‍්‍රකා කට්ටලයක් හා අදාළ හෝමෝන ඇතුළත් මල්ලක් නොමිලේ ලබා දීමටද පලතුරු පර්යේෂණ හා සංවර්ධන ආයතනය සැලසුම් කර තිබේ. පලතුරු ප්‍රවර්ධන සතිය තුළ පාසල් ළමුන් අතර පලතුරු පරිභෝජනය ඉහළ නැංවීම සඳහා තෝරාගත් පාසල් 10ක් තුළ විශේෂ ව්‍යාපෘතියක් ආරම්භ කිරීමට ද නියමිතය.

මේ පලතුරු සැණකෙළියේ දී රාජ්‍ය අංශයේ සහ පෞද්ගලික අංශයේ ප්‍රදර්ශන කුටි රැසක් නැරඹීමට මහජනතාවට අවස්ථාව උදාවන අතර ගුණාත්මක තත්ත්වයේ පැළ මිලදී ගැනීමටද පොහොර, කෘෂි රසායනික හා උපකරණ මිලට ගැනීමටද පලතුරු වගාව සම්බන්ධයෙන් නොමිලේ උපදෙස් ලබා ගැනීමටද අවස්ථාව ලැබේ. රාජ්‍ය සහ පෞද්ගලික අංශවල මූල්‍ය ආයතන මඟින් පලතුරු ක්ෂේත‍්‍රය ආශ්‍රිත මූල්‍ය උපදේශනය හා පහසුකම් ලබා ගැනීමට ද පලතුරු සැණකෙළිය පැවැත්වෙන අවස්ථාවේ දී ජනතාවට ඉඩකඩ ලැබෙනු ඇත.

පලතුරු පැළ බද්ධ කිරීමේ ක්‍රමවේද, පැළ තවාන් පවත්වා ගෙන යාම, ගෘහ කර්මාන්තයක් ලෙස පලතුරු ආශ්‍රිත නිෂ්පාදන සිදු කිරීම, අස්වැන්න නෙලීම හා ගබඩා කිරීම ආදි පලතුරු ක්ෂේත්‍රය ආශ්‍රිත පුහුණු වැඩසටහන් හා සම්මන්ත්‍රණ සඳහා ද පලතුරු ප්‍රවර්ධන සතිය තුළ ඉඩකඩ වෙන් වී තිබේ. මේ වැඩසටහන්වලට සහභාගී වී පලතුරු ක්ෂේත්‍රය ආශ්‍රිත දැනුම වර්ධනය කර ගැනීමට පලතුරු පර්යේෂණ හා සංවර්ධන ආයතනය ජනතාවට ආරාධනා කරයි.

පලතුරු සැණකෙළියට සහභාගී වන සැමට දැනුම, විනෝදය සපිරි සැණකෙළියක අසිරිය සමඟ නැවුම් අත්දැකීමක් ලබා ගැනීමට මෙහිදී අවස්ථාව උදාවන අතර වගාකරුවන්ට, ආයෝජකයන්ට, ව්‍යාපාරිකයන්ට, අපනයනකරුවන්ට, පර්යේෂකයන්ට, දේශකයන්ට, පරිසරවේදීන්ට, සංචාරක ක්ෂේත්‍රයේ ව්‍යාපාරිකයන්ට, දේශීය මෙන්ම විදේශීය සංචාරකයන්ට ද පලතුරු තාක්ෂණය හා විද්‍යාත්මක දැනුම උකහා ගනිමින් පෙර නොවූ විරූ මිහිරක් අත්විඳින්නට මේ පලතුරු සැණකෙළිය ඉවහල් වෙයි.

ඇමැතිවරුන් වන බැසිල් රාජපක්ෂ, මහින්ද යාපා අබේවර්ධන, නියෝජ්‍ය ඇමැති වයි.කේ පද්මසිරි, පාර්ලිමේන්තු මන්ත්‍රී විදුර වික්‍රමනායක, කෘෂිකර්ම අමාත්‍යාංශයේ ලේකම් ආර්.එම්.ඩී.බී මීගස්මුල්ල, කෘෂිකර්ම අධ්‍යක්ෂ ජනරාල් ආචාර්ය රොහාන් විජේකෝන්, ජනාධිපති කාර්ය මණ්ඩල ප්‍රධානී ගාමිණී සෙනරත්, ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් මහත්වරු ද මේ අවස්ථාවට එක්ව සිටියහ.

http://www.dinamina.lk/2014/07/15/_art.asp?fn=n1407152

Read More

‘ආකේඩ්-නිදහස් චතුරස්‍රය’ ජනපති අතින් ජනතා අයිතියට

නව යුගයක් කරා ගමන් කරන ශ්‍රී ලංකාව තවත් එක් සාර්ථක ආරම්භයක් සනිටුහන් කරමින් දැවැන්ත සංවර්ධන ක්‍රියාදාමයේ ප්‍රතිඵලයක් ලෙස ඉදිකළ "ආකේඩ් - නිදහස් චතුරස්‍රය" (Arcade Independent Square) ජනාධිපති මහින්ද රාජපක්ෂ මහතාගේ ප්‍රධානත්වයෙන් ඊයේ (13) පස්වරුවේ ජනතා අයිතියට පත් කෙරිණි.

කොළඹ නගරය ආසියාවේ ආශ්චර්යවත් නගරය බවට පත්කිරීමේ දැවැන්ත වැඩපිළිවෙළ තුළ හමුවන තවත් සුවිශේෂී සන්ධිස්ථානයක් වන මේ ව්‍යාපෘතිය රාජ්‍ය ආරක්ෂක හා නාගරික සංවර්ධන අමාත්‍යාංශය සහ නාගරික සංවර්ධන අධිකාරිය එක්ව ක්‍රියාත්මක කැර තිබෙන අතර ඒ වෙනුවෙන් වැයකර තිබෙන මුදල රුපියල් මිලියන 500 කි.

කොළඹ නගරයේ ප්‍රධානතම වාණිජ ස්ථානයක් වශයෙන් සංවර්ධනය කළ "ආකේඩ් - නිදහස් චතුරස්‍රය" ජනාධිපති මහින්ද රාජපක්ෂ මහතාගේ ප්‍රධානත්වයෙන් ඊයේ (13) පස්වරුවේ ජනතා අයිතියට පත් කෙරුණු අතර එම මධ්‍යස්ථානය ජනාධිපතිවරයාගේ නිරීක්ෂණයට ලක්වූ අයුරු. ජනාධිපති ආර්යා ශිරන්ති රාජපක්ෂ, රාජ්‍ය ආරක්ෂක හා නාගරික සංවර්ධන අමාත්‍යාංශයේ ලේකම් ගෝඨාභය රාජපක්ෂ සහ එම අමාත්‍යාංශ සේවා වනිතා ඒකකයේ සභාපතිනී අයෝමා රාජපක්ෂ මහත්ම මහත්මීන් ද මෙහි වෙති. ඡායාරූපය - සුදත් සිල්වා

රාජ්‍ය ආරක්ෂක හා නාගරික සංවර්ධන අමාත්‍යාංශයේ ලේකම් ගෝඨාභය රාජපක්ෂ මහතාගේ උපදෙස් හා මඟපෙන්වීම මත නවීන ලොවට උචිත වන එහෙත් සම්ප්‍රදායන්ට ගරු කරමින් කොළඹ නගරය පුරා දැවැන්ත නාගරික සංවර්ධන ක්‍රියාවලියක් ආරම්භ කැර තිබෙන අතර ඵෙතිහාසික වශයෙන් වැදගත් "ආකේඩ් - නිදහස් චතුරස්‍රය" නව ලොවට ගැලපෙන සුපිරි සාප්පු සංකීර්ණයක් බවට පත්කරමින් ශ්‍රී ලාංකීය ජනතාවට අලංකාර නගරයක් තුළ සුපිරි සාප්පු සවාරියක අත්දැකීම් විඳගැනීමේ හැකියාව ලබාදී තිබේ .
මේ නව සාප්පු සංකීර්ණය තුළ ලොව ප්‍රකට වෙළෙඳ නාමාවලියෙන් යුත් පාරිභෝගික භාණ්ඩ, ඉලෙක්ට්‍රොනික උපකරණ, ඇඟලුම් විලාසිතා, ආභරණ හා ක්‍රීඩා භාණ්ඩවලින් සමන්විත සාප්පු 40කින් සමන්විත වන අතර ඊට අමතරව සුපිරි තත්ත්වයේ අවන්හල් වලින් ද අති නවීන තාක්ෂණයෙන් යුත් සිනමා ශාලාවකින් ද සමන්විත වෙයි .
අසංවිධිත සංවර්ධනයකට සහ අව භාවිතයට යොමුවී තිබු නිදහස් චතුරශ්‍රය ආශ්‍රිත ප්‍රදේශය මෙම ව්‍යාපෘතියේ පළමු පියවර යටතේ ඓතිහාසික සහ පුරාවිද්‍යාත්මක වටිනාකමකින් යුත් පැරණි තුරඟ තරග පිටිය සංවර්ධනය කොට භූමි දර්ශන අලංකාර කොට නැවත මහජනතාව අතට පත්කිරීමට පියවර ගෙන තිබෙන අතර කොළඹ අගනගර සංවර්ධන ව්‍යාපෘතිය යටතේ වඩාත් දර්ශනීය, නිදහස්, මෙන්ම හරිත නගරයක් බවට පත්කිරීමේ අරමුණ යටතේ නාගරික සංවර්ධන අධිකාරිය මඟින් මෙම සංවර්ධන ව්‍යාපෘතීන් සිදුකැර තිබේ. ඒ අනුව අගනගරය ජාතික අභිමානයකින් හා විවෘත භාවයකින් යුත්, නිදහස්, පිරිසිදු, දර්ශනීය මෙන්ම වඩාත් ආරක්ෂිත ආසියාවේ අනෙක් අගනගරවලට නොදෙවෙනි නගරයක් බවටපත් කිරීම රජයේ අරමුණ වී තිබේ.
ජනතා අයිතියට පැවරුණු මෙම "ආකේඩ් - නිදහස් චතුරස්‍රය" වාණිජ මධ්‍යස්ථානය වර්ග අඩි 90,000ක පමණ විශාලත්වයකින් යුතුවන අතර එයින් වර්ග අඩි 40,000ක පමණ ප්‍රමාණයක් සාප්පු සංකීර්ණ අවන්හල් ඇතුළු වාණිජ කටයුතු වෙනුවෙන් විවිධ ආයතන සඳහා බදු පදනම මත ලබා දී ඇත.
පුරාවිද්‍යා දෙපාර්තමේන්තුවේ උපදෙස් මත ප්‍රතිනිර්මාණය වූ මෙම ව්‍යාපෘතිය වෙනුවෙන් ශ්‍රම දායකත්වය ශ්‍රී ලංකා යුද හමුදාව ලබාදී තිබෙන අතර එය ජනතා අයිතියට පත් කිරීමත් සමඟ මෙහි පැමිණෙන දේශීය විදේශීය සංචාරකයින් වෙනුවෙන් වඩාත් ආරක්ෂාකාරී ආකර්ෂණීය පරිසරයක් සහිත විවේකය තවත් නිදහසේ ගත කිරීමට හැකි පරිසරයක් ලෙස නිර්මාණය කැර තිබේ.
කොළඹ, ටොරින්ටන්හි පැරණි විගණකාධිපති දෙපාර්තමේන්තු සහ රජයේ රස පරීක්ෂක දෙපාර්තමේන්තු පැවති ගොඩනැඟිලි සහ එම භූමිය - කොළඹ නිදහස් චතුරශ්‍ර සංවර්ධන ව්‍යාපෘතියේ දෙවන පියවර ලෙස "ආකේඩ් - නිදහස් චතුරස්‍රය" නමින් වාණිජමය ගොඩනැඟිලි සංකීර්ණයක් බවට මෙලෙස සංවර්ධනය කර තිබේ.
බ්‍රිතාන්‍ය පාලන සමයටත් පෙර ඉදිකරන ලද මෙම ගොඩනැඟිලි ලන්දේසි පාලන සමයේ මානසික රෝහලක් ලෙස පවත්වාගෙන ගොස් ඇති අතර පසුව විවිධ අවශ්‍යතාවන් වෙනුවෙන් පරිහරණය කොට ඇත. අවසාන වශයෙන් රජයේ රස පරීක්ෂක දෙපාර්තමේන්තුව සහ විගණකාධිපති දෙපාර්තමේන්තුව සඳහා භාවිත කරන ලද අතර එයින් අනතුරුව මෙම දේපෙළ නාගරික සංවර්ධන අධිකාරියට පවරගන්නා විට ඉතාම අබලන් මෙන්ම ජරාජීර්ණ තත්ත්වයකට පත්ව පැවතිණි. මෙයට යාබද භූමිය වන තුරඟ තරග පිටිය (Race Course) ද පැවතියේ මෙයට නොදෙවෙනි මට්ටමකය.
ලෝක යුධ සමයේ යුද ගුවන්යානා ගොඩබැස්සවීමට භාවිත කරන ලද මෙම පිටිය පසුව බ්‍රිතාන්‍යයින් කුඩා සහ විශාල වශයෙන් ප්‍රේක්ෂකාගාර (Grand Stand) දෙකකින් යුක්තව තුරඟ තරග පැවැත්වීම සඳහා යොදා ගන්නා ලද අතර ඉතාම ජරාජීර්ණව අභාවයට යමින් පැවති එම ගොඩනැඟිලි අද වනවිට සංරක්ෂණය හා සංවර්ධනය කොට සංචාරක ආකර්ෂණය සහිත වාණිජ මධ්‍යස්ථානයක් බවට පත්කොට ඇත.
ජනාධිපති ආර්යා ශිරන්ති රාජපක්ෂ, ජ්‍යෙෂ්ඨ ඇමැති ඒ.එච්.එම් ෆවුසි, ඇමැතිවරුන් වන මෛත්‍රීපාල සිරිසේන, එස්.බී දිසානායක, මහාචාර්ය ජී.එල් පීරිස්, දිනේෂ් ගුණවර්ධන, වෛද්‍ය රාජිත සේනාරත්න, ඩග්ලස් දේවානන්දා, නියෝජ්‍ය ඇමැතිවරුන් වන ඩුලිප් විජේසේකර, ෆයිසර් මුස්තාෆා, පාර්ලිමේන්තු මන්ත්‍රීවරුන් වන තිලංග සුමතිපාල, එම්.එච්.එම් අෂ්වර්, බස්නාහිර පළාත් ප්‍රධාන ඇමැති ප්‍රසන්න රණතුංග, ආණ්ඩුකාර අලෙවි මවුලානා, ජනාධිපති ලේකම් ලලිත් වීරතුංග, රාජ්‍ය ආරක්ෂක හා නාගරික සංවර්ධන අමාත්‍යාංශයේ ලේකම් ගෝඨාභය රාජපක්ෂ, රාජ්‍ය ආරක්ෂක හා නාගරික සංවර්ධන අමාත්‍යාංශ සේවා වනිතා ඒකකයේ සභාපතිනී අයෝමා රාජපක්ෂ, නාගරික සංවර්ධන අධිකාරයේ සභාපති නිමල් පෙරේරා මහත්ම මහත්මීන් ඇතුළු පිරිසක් මේ අවස්ථාවට එක්ව සිටියහ.

මහින්ද අලුත්ගෙදර

http://dinamina.lk/2014/07/14/_art.asp?fn=n14071412

Read More

මල්ගුඩියේ ස්වාමි සොයා . . .

මල්ගුඩියේ ස්වාමි සොයා . . .

මල්ගුඩිය කුඩා නගරයකි. එක පසෙකින් වනාන්තරයකි. අනෙක් පසින් ගලා බසින ගඟකි. සුන්දර ගමක් යැයිද කිව හැකියි. ස්වාමි සහ ඔහුගේ මිතුරන් ජීවත්වන්නේ මෙහිය. ස්වාමි වයස අවුරුදු දහයක පමණ කොලු ගැටයෙකි. පාසලෙන් නිතර කට්ටි පනියි. ඔහුගේ හොඳම මිතුරන් දෙදෙනා මනු සහ පොලිස් සුපිරින්ටෙන්ඩන්ට් වරයාගේ පුත්‍රයා වන රාජම් ය. අදට දශක දෙකකට පමණ පෙර මුල්වරට ඉන්දියාවේ දූරදර්ශන් රූපවාහිනී සේවය ඔස්සේ විකාශය වූ මල්ගුඩි දවස කතා මාලාවේ ස්වාමි ඇන්ඩ් ෆෙ‍්‍රන්ඩ්ස් හි 'ස්වාමි' අද 34 හැවිරිදි තරුණයෙකි.

කැරළි කොණ්ඩයක් සහිත දඟකාර ස්වාමිනාදන් වෙනුවට අද සිටින්නේ බැංගලෝර් නගරයේ ප්‍රධාන පෙළේ ඉදිකිරීම් සමාගමක විධායක නිලධාරියෙකි. ස්වාමිගේ මුහුණුවර ඔහු කෙරෙන් තවම පලාගොස් නැත. මංජුනාත් නායකර් ඔහුගේ සැබෑ නමයි. මාස්ටර් මංජුනාත් යැයි සමාගමේ සේවකයෝ ඔහුව ගෞරව පූර්වකව ආමන්ත්‍රණය කරති. 'ස්වාමි' යනුවෙන් ඔහු අමතන්නන් අද විරලය.

මංජුනාත් නායකර්

එහෙත් 80 සහ 90 දශකවල රූපවාහිනී රසිකයන් වසඟ කළ ඔහුගේ සරල දඟකාර සිනහව තවමත් එලෙසමයි. "මම අවුරුදු 19 වෙනකල් රඟපෑවා. දැන්නම් රඟපාන්නෙ නෑ. චිත්‍රපට බලන්න හරිම කැමැතියි. විවේක වෙලාවට මල්ගුඩිය රූගත කිරීම් කෙරුව ආගුම්බේ ගමට යාළුවොත් එක්ක යනවා. ක්‍රිකට්වලටත් කැමැතියි.

ඒත් වැඩිපුරම ආදරය කරන්නේ රැකියාවටයි". යැයි ඔහු පවසයි. මංජුනාත් අද බැංගලෝර් මයිසූර් ඉන්ෆ‍්‍රාස්ට්‍රක්චර් කොරිඩෝර් ප්‍රොජෙක්ට් හි මහජන සම්බන්ධතා අංශයේ ප්‍රධානියාය. "මේකත් හරිම ආස හිතෙන චරිතයක්. නීති ගැටලුවල ඉඳන් සේවකයන්ගෙ රණ්ඩු විසඳීම දක්වා හැම දෙයක්ම මම අධීක්‍ෂණය කරනවා" යැයි ඔහු කියයි.

ආර්. කේ. නාරායන් මැවූ මල්ගුඩියේ දඟකාර කොලුගැටයා රඟපෑමට ආයුබෝවන් කීවේ මන්ද යන්න සොයා බැලිය යුතුම කාරණයකි. වයස අවුරුදු 19 වන තෙක් ඔහු දක්ෂ රංගන ශිල්පියෙක් ලෙස ක්ෂේත්‍රයේ නමක් දිනාගෙන සිටියේ ය. මල්ගුඩියේ ස්වාමි ඇන්ඩ් ෆෙ‍්‍රන්ඩ්ස් පසුව චිත්‍රපටයකටද නැගිණි. එයද ඇතුළුව ඔහු හින්දි සහ කන්නාඩ භාෂාවෙන් තැනුණු චිත්‍රපට හා ටෙලිනාට්‍ය 68 කට පමණ දායක විය.

ජනපි‍්‍රය කන්නාඩ අධ්‍යක්‍ෂවරයෙක් වන ෂංකර් නාග් ගේ නිර්මාණවලට ඔහු නැතිවම බැරි නළුවෙක් විය. ළමා නළුවෙකුට හිමිවිය යුතු උපරිම දේශීය හා ජාත්‍යන්තර ගෞරවයන් ස්වාමිගේ චරිතය වෙනුවෙන් ඔහුට හිමිවිය. අන්තර් ජාතික සම්මාන හයක්, ජාතික සම්මානයක් සහ රාජ්‍ය සම්මානයක් ඒ අතර තිබේ. 'අග්නිපාත්' හින්දි චිත්‍රපටයේ අමිතාබ් භච්චන්ගේ ළමා සහ ගැටවර විය නිරූපණය කිරීමේ අවස්ථාවද ඔහුට හිමිවිය. වයස අවුරදු දොළහේදී පටන් සිනමා සම්මාන උළෙලවලට මංජුනාත් සහභාගි විය. එහෙත් එක්තරා දෛවෝපගත දිනයක ඔහු තීරණයක් ගත්තේය.

ආව්! මගේ කන

"ඒක ඉතාලියේ තිබුණු අන්තර් ජාතික සිනමා සම්මාන උළෙලක් ස්වාමි චරිතය වෙනුවෙන් මට සම්මානයක් ලැබුණා. සම්මානය අතේ තියාගෙන මම හොඳටම තනිවෙලා, ඔහේ බලාගෙන හිටියා. මගේ සතුට බෙදාගන්න යාළුවොවත්, මවුපියොවත් මා ළඟ හිටියෙ නෑ.

මොකද සම්මාන උළෙලේ සංවිධායකයො මගෙ පවුල එහෙ කැඳවගෙන යන්න මුදල් වියදම් කරන්න අකමැති වුණා. මේ ජීවිතයෙන් මට අවශ්‍ය මොනවද කියල මම එදා මගෙන් ම ප්‍රශ්න කළා. රඟපෑමෙන් ඉවත්වෙන්න කාලෙ හරි බව මම හිතුවා" යැයි ඔහු කියයි.

ඒ තීරණයත් සමඟම ඔහු ගමන් මඟ වෙනස් කළේ ය. "මම දකුණු ඉන්දියාවේ සාමාන්‍ය මධ්‍යම ජාතික පවුලක කොල්ලෙක්. හොඳට ඉගෙන ගෙන හොඳට සල්ලි උපයන රැකියාවක් කරන්න මට අවශ්‍ය වුණා." ඔහු සමාජ විද්‍යාව පිළිබඳ දර්ශනපති උපාධිය සහ සිනමාකරණය පිළිබඳ ඩිප්ලෝමාවක් හැදෑරීය.

අත්තම්මා මේ බලන්නකෝ

එය ඉන්දියාවේ බැංගලෝර් නගරයේ තොරතුරු තාක්ෂණ විද්‍යාව කර්මාන්තයක් ලෙස හිස ඔසවමින් සිටි කාලයකි. ඒ ක්ෂේත්‍රය ඇස් අදහාගත නොහැකි තරම් වේගයෙන් දියුණු වෙමින් තිබිණි. මංජුනාත් ද ඒ වෙතට ආකර්ෂණය විය.

මුලින්ම ඔහු ඔන්ලයින් බැංගලෝර් ඩොට් කොම් අන්තර් ජාල සමාගමේ කළමනාකරුවෙක් ලෙස රැකියාවේ යෙදුණේය. ඉන්පසු ඊළඟ වර්ෂ කිහිපයම ඔහුගත කළේ පරිගණක ක්ෂේත්‍රයේය. කිසිම රැකියාවක වසර 2 කට වඩා තමන් රැඳී නොසිටින බව ඔහු කියයි. ඒ රැකියා මාරුව මඟින් තම සුදුසුකම්වලට ගැළපෙන හොඳම රැකියාව අත්හදා බැලීමට ඔහුට හැකියාව ලැබේ.

"ඔබ මගෙ හිතේ ඇඳුණු ස්වාමි චරිතය හරියටම කරනවා" යැයි ආර්. කේ. නාරායන් මංජුනාත් අමතා රූ ගතකිරීම්වල දී කියා තිබේ. "ඒක තමයි මට ලැබුණු ලොකුම ගෞරවය. මට ඒ ඇති. මල්ගුඩියේ මතකය මට ජීවිත කාලයටම සෑහෙනවා." යැයි ඔහු කියයි. ඒ නිසාමදෝ මංජුනාත් එම චරිතය ගැබ්කරමින් ආර්. කේ. නාරායන් ලියූ ස්වාමි ඇන්ඩ් ෆ්‍රෙන්ඩ්ස් ග්‍රන්ථය අද දක්වා ද කියවා නැත.

රාජම් පරිස්සමෙන්

ඉංගී‍්‍රසියෙන් ලියැවුණු පූර්ව ඉන්දියානු සාහිත්‍යයේ ත්‍රිමූර්තිය ලෙස සැලකෙන තිදෙනෙක් වෙති. ඒ මුල්ක්රාජ් ආනන්ද්, රාජා රාවෝ සහ ආර්. කේ. නාරායන්ය. ආර්. කේ. නාරායන් හෙවත් රාසිපුරම් ක්‍රිෂ්ණස්වාමි නාරායන් ස්වාමි ඉන්දීය සාහිත්‍යයට දායාද කළ ප්‍රථම නවකතාව 1930 වර්ෂයේ ලියූ "ස්වාමි ඇන්ඩ් ෆ්‍රෙන්ඩ්ස්"ය.

එය ලිවීම ගැන ඔහුගේ මාමාවරු ඔහුට විහිළු තහළු කළ බව සඳහන්ය. සම්පූර්ණයෙන්ම මනඞකල්පිත නගරයක් වූ මල්ගුඩිය ද එහි චරිත මෙන්ම නාරායන්ගේ මනස් නිර්මාණයකි. මල්ගුඩිය මෙසේ විය යුතු යැයි රූගත කිරීම්වලට පෙරාතුව කටු සටහන්වලට නැගුවේ ඔහුගේ සහෝදර කීර්තිමත් කාටුන් ශිල්පි ආර්. කේ. ලක්ෂ්මන් විසිනි.

අවසානයේ ස්වාමි ඇන්ඩ් ෆ්‍රෙන්ඩ් පොතත් එහි කතා පමණක් නොව A Horse and Two Goats  (අශ්වයෙක් සහ එළුවන් දෙදෙනෙක්) දMalgudi days (මල්ගුඩි දවස්) සහ Vendo of Sweets (රසකැවිලි වෙළෙන්දා) යන කතා පොත් හතරේම එන කතාංගවලින් බහුතරය මල්ගුඩියේදී රූගත කෙරිණි. මේ කතා මාලා හතර අතරින් වඩාත්ම ජනපි‍්‍රය වූයේ ස්වාමිගේ කතා මාලාවයි.

ආර්.කේ නාරායන්

නාරායන් ලියූ ස්වාමි සහ ඔහුගේ මිතුරන්ගේ කතා පෙළ ඔහුගේ ළමා කාලයේ ජීවිත කතාව ලෙස ද සැලකෙයි. ස්වාමිගේ පියා රජයේ සේවකයෙකි. මව ගෘහණියකි. ස්වාමි දවසේ අත්දැකීම් හා වීරක්‍රියාවල මතකය ආවර්ජනය කරන්නේ ආච්චි අම්මා සමඟිනි.

නාරායන්ගේ ළමා වියද මේ ආකාරයට ම දඟකාර රසබර අත්දැකීම්වලින් පිරීගිය එකකි. ආච්චි අම්මා ඔහුගේ ළමා වියේ හොඳම මිතුරිය වූවා ය. ඇය ආදරයට ඔහුව ඇමතුවේ "කුන්ජප්පා" යනුවෙනි. නාරායන් ලියූ නවකතා පහළොවේ සහ කෙටි කතා සම්භාරයෙන් වැඩි කොටසක මල්ගුඩිය ජීවමාන වේ.

ඒවා කියවන කිසිවෙකුට එය මනඞකල්පිත නගරයක් බව විශ්වාස කිරීමටද අපහසු ය. සරයු ගඟේ ඉවුර මතපිහිටා තිබෙන මල්ගුඩියට ඒ මනස් ලෝකයේ දී චින්නපනහාලි හි සිට පැය කිහිපයක ගමනකින් යා හැකිය. සැබෑ ලෝකයේ දී මල්ගුඩියේ පෙනුමට බොහෝ දුරට සමාන නගරයක් ලෙස කොයිම්බතූර් නගරය සැලකේ. එහෙත් කාවේරි ගඟ ඉස්මත්තේ පිහිටන ලාල්ගුඩි නගරය, නාරායන්ගේ මල්ගුඩියට වස්තුබීජ වී යැයි කියන්නෝද සිටිති.

"මල්ගුඩිය රූගත කළ අගුම්බේ ගම්මානය සංචාරක නිකේතනයක් බවට පත්කිරීම මල්ගුඩියේ ස්වාමිගෙ පරම ආශාවකි. ඒ සඳහා රජයට බලකරන්න මට අවශ්‍යයි. මල්ගුඩියට ලෝකයම ආදරෙයි මේ ගම සංරක්ෂණය කිරීම නාරායන් ශූරීන්ටත් කරන ගෞරවයක්!" ඔහු කියයි.

විධායක නිලධාරියකු ලෙස ව්‍යාපාරික ලෝකයේ ඉහළට නගින අතර ස්වාමි නොහොත් මංජුනාත් ගේ සිතෙහි ඉදිරියටත් රඟපෑම සඳහා සැඟවුණු ආශාවක්ද තිබේ. එහෙත් ඒ, මල්ගුඩිය වැනි සරල සුන්දර හෘදයාංගම නිර්මාණයක නම් නොවේ. "හොඳට සැලසුම් කෙරුව අති සාර්ථක වාණිජ චිත්‍රපටයක රඟපාන්න මට ආසයි".

මල්ගුඩියේ ස්වාමිට වූ වෙනසක මහත!

නෙලාෂා සිරිවිජය බණ්ඩාර

http://www.dinamina.lk/sithijaya/art.asp?id=2011/01/06/spg09_0

Read More

ජාතික පුරා විද්‍යා සතිය අද ඇරැඹේ

ජාතික පුරා විද්‍යා සතිය අද ඇරැඹේ

ජාතික පුරා විද්‍යා සතියක් අද (7) සිට ආරම්භ කෙරෙයි.

පුරාවිද්‍යා දෙපාර්තමේන්තුව සංවිධානය කරන පුරාවිද්‍යා සමුළුවේ සමාරම්භක උත්සවය අද දින පෙරවරු 9 ට ජාතික උරුමයන් පිළිබඳ ඇමැති ආචාර්ය ජගත් බාලසූරිය මහතාගේ ප්‍රධානත්වයෙන් ශ්‍රී ලංකා පදනම් ආයතනයේ දී පැවැත්වේ.

ඒ අනුව පුරාවිද්‍යා දෙපාර්තමේන්තුව සහ ජාතික උරුමයන් පිළිබඳ අමාත්‍යාංශය මෙහෙයවන "2014 ජාතික පුරා විද්‍යා සතිය යි.

ජනතාව දැනුවත් කිරීමේ වැඩසටහන් මෙන්ම පාසල් ළමයින් සඳහා පුරා විද්‍යා සම්මන්ත්‍රණ මාලාවක් මේ දිනවල පැවැත්වීමටද කටයුතු යොදා තිබේ.

මෙරට පුරා විද්‍යාත්මක උරුමයන් රැක ගැනීම පිළිබඳව වත්මන් පරපුරට විධිමත් අවබෝධයක් ලබාදීම අදාළ දැනුවත් කිරීමේ වැඩසටහන්වල අරමුණ බව අමාත්‍යවරයා පවසයි. මේ සමුළුවට සමගාමීව පුරාවිද්‍යා දෙපාර්තමේන්තුවේ ප්‍රාදේශීය කාර්යාලවල වැඩසටහන් සහ දේශන පැවැත්වීමටද කටයුතු යොදා තිබේ. එදිනට පුරාවිද්‍යා දෙපාර්තමේන්තුව පිහිටුවා වසර 124 ක් ද සපිරෙනු ඇත.

http://www.dinamina.lk/2014/07/07/_art.asp?fn=n1407075

Read More

වංචනික ව්‍යාපාරිකයන් විසින් බිහිකර ඇති ප්‍රචාරවලට අහුවෙන්න එපා!

බොරු විටමින් වර්ග ගැන සාවද්‍ය ප්‍රචාරවලට අහුවෙන්න එපා!

මෙහෙම විටමින් ඇත්තේම නැහැ

විටමින් ගැන අප බොහෝ දෙනෙකු තුළ ඇත්තේ පුදුම විශ්වාසයකි. විටමින් අහුරක් ගිල්ල විට සියලු රෝග දුරින් දුරුවී යන බවට ඇති මතය මිථයාවකි. එහෙත් මෙම ලිපියෙන් අප උත්සාහ කරන්නේ සත්‍ය වශයෙන්ම පවතින ඉතා සුළු ප්‍රශ්නයන්ගෙන් අපට අවශ්‍ය, ශරීරය තුළ ඉතා වැදගත් කාර්යභාරයක් ඉටු කරන විටමින් ගැන නොවේ. තම විවිධ නිෂ්පාදන අලෙවිකර ගැනීම සඳහා මුසාවාද ප්‍රචාර, දැන්වීම් හා වෙනත් ප්‍රචාරක මාධ්‍ය උපයෝගී කරගෙන අහිංසක පාරිභෝගිකයන් රැවටීමට වෙර දරන වංචනික ව්‍යාපාරිකයන් විසින් බිහිකර ඇති විටමින් වර්ග ගැනය. ඒවා කිහිපයක් මෙසේය.

විටමින් F

විවිධ එළවළු තෙල් තුළ අඩංගු අසංතෘප්ත මේද අම්ල සමඟ ඇතැම් අය පවසන විටමින් එෆ් භාවිතය හිස කෙස් හැලීම වළක්වා ගැනීමට, ආරතයිටීස් (පර්වදාහය) සුවපත් කිරීමට සහ සමේ ඇතිවන එක්සීමා තත්ත්වයන් (රක්තවාත තත්ත්වයන්) ට ගුණදායක බවට ප්‍රලාපයක් පළ කරයි.

විටමින් O

විටමින් O ලෙස පැවසෙන්නේ සිසිල් බීම එනම් කාබන්ඩයොක්සයිඩ් වායුව එක් කළ පැණි බීම මෙන් පෙන බුබුළු නඟන ලුණු රැසැති පානයක පවතින “O” නම් විටමිනය තුළ අතිරේක ඔක්සිජන් අණු පවතින බව ප්‍රචාරය කරමින් අහිංසකයන් විශේෂයෙන් තරුණ තරුණියන් ඇතුළු ජනතාව රවටති.

විටමින් “O” මඟින් හෘද වේදනාව (ඇන්ජයිනා), නිරක්තිය සහ පෙනහලු ගැටලු සඳහා ගුණදායක තත්ත්වයන් ඇති කරන බව පළකර ඇතත් කිසිදු ආයතනයක් මඟින් එය සනාථ කර නැත.

විටමින් P

විටමින් පී ලෙස නිෂ්පාදනයන් හඳුන්වා දෙන්නේ ප්‍රකෘති රසායනික ගුණයට ගැනෙන “බයොෆ්ලේවෝනොයිඩ්ස්” ය. දෙපාවල ඇතිවන කෙණ්ඩා පෙරලීම වැළැක්වීමට හා සුවපත් කිරීමට මෙන්ම රුධිර සංසරණය විධිමත් කිරීමට ද විටමින් පී සමත් බවට ව්‍යාජ ප්‍රචාරයන් සිදුවෙයි.

විටමින් T

විටමින් ටී සතු හැකියාව ලෙස ප්‍රචාරය වනුයේ රුධිරයේ අඩංගු එක් රුධිර සෛල වර්ගයක් වන රතු රුධිර සෛල ශක්තිමත් කිරීමට එය සමත් බවයි. විටමින් ටී සතු තවත් හැකියාවක් ලෙස ප්‍රචාරය වන්නේ නීරක්තිය හෙවත් ශරීරයේ ලේ අඩුකම (රක්තහීනතාව/ ඇතිමියාව) නැති කිරීමට සමත් බව හුවා දැක්වීමය.

විටමින් U

ගෝවා යුෂ තුළ අඩංගු විටමිනයක් ලෙස ප්‍රචාරය කරන යූ විටමිනය මඟින් ආහාර මාර්ගයේ උදරය හා අන්ත්‍රයන්හී ඇතිවන වණ සහ බඩදැවිල්ල සුවපත් කිරීමට සමත් බවය. ලෝකයේ බෙහෝ දෙනෙකු “ගැස්ට්‍රයිටීස්” රෝග තත්ත්වයෙන් එනම් ආමාශ පටල ප්‍රදාහයෙන් පෙළෙන බැවින් මෙම ප්‍රචාර සඳහා සෑහෙන ඉල්ලුමක් ඉපදවීමට හැකියාව ලැබී ඇත.

විටමින් B-17

B ගණයට විවිධ විටමින තරම් සාවද්‍ය ප්‍රචාරයන්ගෙන් බැටකන වෙනත් විටමිනයක් නොමැති තරම්ය. මේ අතර මේ ලෝකයේ තවම සොයාගෙන නැති බී 17 නම් විටමිනයක් පිළිකා රෝගීන්ට සුවය දෙන බවට වංචනික ප්‍රචාර සිදුවෙමින් පවතියි. විටමින් එෆ්, විටමින් පී, විටමින් ටී, විටමින් යූ, විටමින් බී -17 ආදී බොරු විටමින් ගැන ප්‍රචාර බොහෝවිට පැතිරෙන්නේ නව මාධ්‍ය ලෙස සැලකෙන “ඉන්ටර්නෙට්” හෙවත් අන්තර්ජාලය හරහාය.

පරිගණක මොනිටර් තිරයේ දිස්වෙන ඕනෑම දෙයක් පරම සත්‍යය ලෙස පිළිගන්නා අය ඕනෑ තරම් මේ සමාජයෙහි සිටින නිසා විිවිධ ජාවාරම්කරුවන් ඉන් ප්‍රයෝජන ලබන බව හොඳින් පෙනෙයි. ව්‍යාජ විටමින් හඳුනාගැනීමට නම් විද්‍යාත්මකව පිළිගත්, අපගේ සෞඛ්‍ය සඳහා අත්‍යවශ්‍ය වන “සත්‍ය” විටමින් ගැන දැනසිටීමට විටමින් ඒ, ඩී, ඊ සහ කේ යන මේදයෙහි දියවන විටමින් ලෙස හැඳින්වෙන විටමින් හතරක්, විටමින් B ගණයට අයත් විටමින සමූහය තයමීන් හෙවත් විටමින් B-1, රිබොෆ්ලේමින් හෙවත් විටමින් B-2, නිකොටනික් අම්ලය (නයැසින්) හෙවත් විටමින් බී-3, ෆෝලික් අම්ලය, පැන්ටතොනික් අම්ලය හෙවත් විටමින් බී-5, පරිචොක්සින් හෙවත් විටමින් බී-6, බයෝටීන් සහ සයනකොබලමින් හෙවත් විටමින් බි-12 සහ සී විටමිනය යන ජලයෙහි දියවන විටමින ගොන්නය.

මේ විටමින බොහොමයක් අප ගන්නා ආහාර පාන හරහාය. යම් ඌනතාවයක් ඇති වූ විට මල්ටි විටමින් පෙති හෝ පැණි මඟින් ඒවා ලබා ගැනීමට පුළුවන. විටමින් ඩී සහ විටමින් කේ ශරීරය තුළ නිපදවා ගැනීමට ද හැකිය.

තුසිත මලලසේකර

http://www.dinamina.lk/arogya/art.asp?id=2013/10/30/apg14_0

Read More

හමුදා මාධ්‍ය ප්‍රකාශක කරුණු හෙළි කරයි

බොදුබල සේනා සමඟ සම්බන්ධ බව ඔප්පු කළොත් තනතුරුවලින් ඉල්ලා අස්වෙනවා

* ඇතැම් පිරිස් අසත්‍ය ප්‍රචාර පතුරනවා

* රජයට මඩ ගැසීම ඔවුන්ගේ අරමුණයි

හමුදා මාධ්‍ය ප්‍රකාශක කරුණු හෙළි කරයි

විජයානි එදිරිසිංහ

බොදු බලසේනා සංවිධානයට ආරක්ෂක ලේකම් ගෝඨාභය රාජපක්ෂ මහතා අනුග්‍රහය දක්වන බවට ඇතැම් පිරිස් කරන ප්‍රචාරය සම්පූර්ණයෙන් අසත්‍ය බවත් රජයට සහ ආරක්ෂක ලේකම්වරයාට මඩ ගැසීමේ අරමුණින් එම ප්‍රචාරය සිදුකරනබව හමුදා මාධ්‍ය ප්‍රකාශක බ්‍රිගේඩියර් රුවන් වනිගසූරිය මහතා පවසයි.

ආරක්ෂක ලේකම් ගෝඨාභය රාජපක්ෂ මහතා මෑතදී ඉංග්‍රීසි පුවත්පතකට ප්‍රකාශයක් කරමින් තමා බොදු බලසේනා හෝ වෙනත් කිසිම සංවිධානයකට අනුග්‍රහයක් නොදක්වන අතර එවැනි සබඳතාවක් ඇති බවට යමකු විසින් ඔප්පු කළහොත් තම තනතුරුවලින් ඉල්ලා අස්වීමට පවා සූදානම් බවද ප්‍රකාශ කර ඇති බව බ්‍රිගේඩියර් වනිගසූරිය මහතා පැවසීය.

බොදු බල සේනා සංවිධානය ආරක්ෂක ලේකම්වරයාගේ අනුග්‍රහයකින් ක්‍රියාත්මක වෙන බවට ඇතැම් කණ්ඩායම් විසින් වෙබ් අඩෙවි ගණනාවක පළ කර තිබේ.

ආරක්ෂක ලේකම් ගෝඨාභය රාජපක්ෂ මහතා බොදුබල සේනා සංවිධානයට අනුග්‍රහය දක්වන බවට අසත්‍ය මතයක් ගොඩනැගීම සඳහා වෙබ්අඩෙවි මගින් ප්‍රචාරය කර ඇති ඡායාරූප...

අලුත්ගම සිද්ධියටද එම කණ්ඩායම ආරක්ෂක ලේකම්වරයාගේ සම්බන්ධතාව ඇති බවට අසත්‍ය තොරතුරු පළ කර ඇත.

ඒ අතර ආරක්ෂක ලේකම් ගෝඨාභය රාජපක්ෂ මහතා පසුගිය වසරේ කිරම විමලජෝති හිමියන්ගේ ආරාධනාවකට අනුව “මෙත්සෙවණ” නමින් අධ්‍යාත්මික සුව මධ්‍යස්ථානයක් විවෘත කිරීමට ගිය අවස්ථාවේ ගත් ඡායාරූප ද වෙබ් අඩෙවිවල පළකර බොදුබල සේනා සංවිධානය ඒ මහතාගේ අනුග්‍රහයෙන් ක්‍රියාත්මක වන බවට දක්වන මතය ඉන් තහවුරු කිරීමට උත්සාහ කර තිබේ.

බ්‍රිගේඩියර් වනිගසූරිය මහතා ප්‍රකාශ කළේ ජර්මන් ජාතික J.A. kretmeir නමැති පුද්ගලයා විසින් අධ්‍යාත්මික සුව මධ්‍යස්ථානය පරිත්‍යාග කර තිබූ අතර එය විවෘත කිරීමේ අවස්ථාවට ඒ මහතා සහභාගි වූයේ කිරම විමලජෝති හිමිගේ සහ පල්ලත්තර සුමනජෝති හිමිගේ ආරාධනාවක් නිසා බවයි.

එම අවස්ථාවට බොදු බල සේනා සංවිධානයේ හිමිවරුද සහභාගි වී සිට ඇත.

මෙවැනි අධ්‍යාත්මික සුව මධ්‍යස්ථානයක් ඉදිකිරීමට ජර්මන් ජාතික මහතකු දැක්වූ අනුග්‍රහය ගැන එදා එහිදී ප්‍රසංශා කළ ආරක්ෂක ලේකම්වරයා අධ්‍යාත්මික සුවය ලැබීමේ වටිනාකම පිළිබඳවද එම උත්සව සභාව අමතා කතාකරමින් කියා තිබේ.

ආරක්ෂක ලේකම්වරයාගේ අනුග්‍රහයෙන් බොදු බල සේනා සංවිධානය ක්‍රියාත්මක නොවන බව පැවසීම තුළින් කිසිසේත් එම සංවිධානය හෙළා දැකීමක් නොවන බවත් මේ රට තුළ විවිධ ආගම්, ජාතීන් විසින් පිහිටුවාගත් සංවිධාන විශාල පිරිසක් ඇත. එම සෑම සංවිධානයකටම ප්‍රජාතන්ත්‍රවාදී ප්‍රවාහය යටතේ කටයුතු කිරීමේ අදහස් හුවමාරු කිරීමේ අයිතියක් ඇති බවද බ්‍රිගේඩියර් වනිගසූරිය මහතා පවසයි.

http://www.dinamina.lk/2014/07/03/_art.asp?fn=n1407031

Read More