අම්මා

මා පවුලේ වැඩිමලා ය. මල්ලී දෙවැනියා ය. නංගී තෙවැන්නී ය.

අප පොඩි කාලයේ ම පියා මිය ගියේ ය. එතැන් පටන් අපි තිදෙනා මවත් සමඟ අසරණ වීමු.

අප ජීවත් වූයේ වරිච්චි ගේක ය. වහලට පොල් අතු ය. ගෙපිල ගොම මැටි ය.

පියා මිය ගිය අලුත නෑයෝ අපට උදවු කළහ. ටිකිනa් ටික ඒවා හීන වී නැත්තට ම නැති ව ගියේ ය. ඔවුන් ද අප මෙන් ම දුප්පතුන් ව සිටි බැවින් අපට දිගින් දිගට ම උදවු කිරීමේ හැකියාවක් ඔවුනට නොවී ය.

අම්මා හේනේත්, කුඹුරු කෑල්ලේත් වැඩට බැස්සා ය. අප දැක තිබූ ඇගේ රූ සොබාව අව්වට පිච්චී වැස්සට තෙමී ගියේ ය. ඉන් පසු ඇය අප වෙනුවෙන් නැහෙන කෙසඟ ගැහැනියක බවට පත් වූවා ය.

උදේ පාසල් ගිය අපි හවස අම්මා ගේ වැඩට උදවු කළෙමු. අපේ මහන්සිය අපතේ නොගියේ ය. අවුරුද්ද කන්නට වී ටික කුඹුරු කෑල්ලෙනුත්, අල බතල එළවළු පලා ටික හේනෙනුත් ලැබිණ.

ගංවතුර ඇතැම් කන්නයක දී කුඹුරු කෑල්ල පාළු කළේ ය. නියඟය හේන දවා අළු කළේ ය. අපි කුස ගින්නේ සිටියෙමු. අම්මා අප වෙනුවෙන් අනුන්ට අත පෑවා ය.

අම්මා වියපත් ගැහැනියක වන විට අපි හොඳ යෞවනයෝ වීමු. මම දුක උහුලමින් ඉගෙන ගතිමි. මල්ලී ගැරේජ් එකක වැඩට ගියේ ය. ඇතැම් විටෙක මගේ පෞද්ගලික පන්ති ගාස්තු ගෙවුණේ මල්ලී ඉපැයූ දෙයිනි. නංගී ද පාසල් ගමන නවතා අම්මාට තනි රැක්කා ය.

මගේ ඉගෙනීම අහක නොගියේ ය. මම ගුරු පත්වීමක් ලැබ ගතිමි. එදින අම්මා මා බදාගෙන සතුටු කඳුළු වැගිරෙව්වා ය. ඒ වන විට මට වඩා ශක්තිමත්ව සිටි මල්ලී තමා ගේ ම වැඩපළක් පටන් ගෙන තිබිණ.

මල්ලීත්, මමත් එකතු වී අලුත් ගෙයක් හැදීමු. ඉන් පසු අම්මාටත්, නංගීටත් දොරගුළු වැසූ උළු ගෙදරක රැකවරණ ලැබිණ.

වැඩිකල් යන්නට පෙර අපේ සොහොයුරිය දීග දෙන්නට අපට හැකි විය. මනාලයා ගුණ යහපත් කෙනෙකු වීම වාසනාවකි.

කෙමෙන් ව්‍යාපාරික ලෝකයේ ඉහළ නැගි මල්ලීට ප්‍රභූ පවුලකින් විවාහ යෝජනාවක් ආයේ ය. ඔහු ඒ වන විට අපේ ගේ කිට්ටුව ඉඩමක් මිල දී ගෙන දෙමහල් නිවෙසක් තනා තිබිණ.

‘පුතේ, අර කට්ටිය මල්ලිගෙ කසාදෙ ඉක්මන් කරනව. මල්ලි අහනව අයිය ඉන්දැද්දි මං කොහොම ද එකලාසයක් වෙන්නෙ කියල. උඹ හැමදාම ඔහොම ඉන්ඩ ද පුතේ කල්පනාව?’ දිනක් අම්මා රහසින් මගෙන් ඇසුවා ය.

‘මල්ලිට සුදුසු විදිහක් කරගන්ඩ කියන්ඩකො. මට ඔහෙ පස්සෙ බැරියැ’ මම ඇය අස්වැසීමි.

මල්ලී ගේ විවා මඟුල ඉහළින් ම සිදු විය. ඔහු සිය මනාලිය අලුත් ගෙට කැඳවා ගෙනැ'විත් නව දිවිය ඇරඹුවේ ය.

මට මාරුවක් ලැබිණ. එහි තරුණ ගුරුවරියකුත්, මාත් අතර ළෙන්ගතුකමක් ඇති විය. වැඩි කල් නොගොස් අපේ විවාහය ද සිදු විය. ඒ ගෙදර එක ම දරුවා ඇය වූයෙන් මම බින්න බැස්සෙමි.

අම්මා ඉතා සතුටින් මහ ගෙදර විසුවා ය. මල්ලී ඇගේ දුක සැප සොයා බැලුවේ ය. මසකට වරක් නංගීත්, මමත් අම්මා බැලීමට ගියෙමු. මා සමඟ මගේ බිරිය ආවේ කැමැත්තෙනි. නංගී සිය සැමියා කැටුව ආවා ය. අප එහි යන දිනයේ මල්ලී වැඩ නවත්වා සිය බිරිය ද සමඟ මහ ගෙදරට වී සිටියේ ය. අම්මාත්, අප හැමෝමත් ඉහළ ම සතුට වින්දේ මේ යුගයේ දී ය.

වසර කිහිපයක් ගෙවී ගියේ ය. අපි මාපියෝ වීමු. එතැන් පටන් අපි දරු පැටවුන් ද වඩාගෙන අම්මා බැලීමට ගියෙමු. දරුවන් ලොකු මහත් වන තුරු ම මේ සිරිත පැවතිණි.

අම්මා හොඳට ම වියපත් ය. ඒත් ඇය කඩිසර ය. ඇය බලෙන් මෙන් පැමිණ මල්ලී ගේ ගෙදර වැඩපළ කර දී දරුවන් ද බලා ගත්තා ය. අම්මා ගේ පැරණි වැඩ මල්ලී ගේ බිරියට නොගැළපිණ. ඇතැම් විට දෙදෙන නොහොඳ නෝක්කාඩු වූහ. අම්මා ඇය හා උරණ වී මහ ගෙදර ගියා ය. මල්ලී එවැනි ගැටුම් අකා - මකා දමා දෙදෙනා මිතුරු කළේ විහිළු තහළුවෙනි.

දිනක් මල්ලී ගේ දියණිය හඬනු ඇසී අම්මා ඉක්මන් ගමනින් කන්ද බැස මල්ලී ගේ ගේ දෙසට ආවා ය. බොරලු ගොඩේ පා ලිස්සා ගිය ඇය නොසිතූ ලෙස ඇද වැටුණා ය.

අහෝ! අම්මා ගේ උකුල් ඇටය බිඳිණ!

එතැන් පටන් ඇය එක් තැන් වූවා ය.

මල්ලී කළේ ඇය තම නිවෙසෙහි තබා ගෙන උවැටන් කිරීම ය. එහෙත් අම්මා නිතර - නිතර ලේලිය හා රණ්ඩු කර ගත්තා ය. කරදරයේ ඉවරයක් නැති තැන මල්ලී සාකච්ඡාවක් සඳහා අප කැ‍ඳෙව්වේ ය.

‘අනේ මාව අපේ ගෙදර අරං පලයං ලොකු පුතේ!’ අම්මා මගේ දෑත බදාගෙන හඬා වැටුණා ය.

අපි ඇය මහ ගෙදරට කැඳවාගෙනැ'විත් උවැටන් කළෙමු. එහෙත් එය දිගින් දිගට ම නොකළ හැකි වූයේ අප අපේ රස්සාවල්වලට යා යුතු බැවිනි. මේ නිසා යළි මල්ලී ගේ ගෙදරට යෑමට අම්මා හිත හදා ගත යුතු විය. මල්ලී බලෙන් ම අම්මා සිය නිවෙසට ඔසවාගෙන ගියේ ය.

අම්මා එක්තැන් වීමේ පළිය ගන්නට මෙන් මල්ලී ගේ බිරිය සමඟ නැවත නැවත ද ගැටුම් ඇති කර ගත්තා ය. මල්ලී ගේ ගෙදර සිනහව කඳුළක් බවට හැර වී තිබිණ.

දිනක් අප එහි යන විට මල්ලී ගේ බිරිය හඬමින් සිය මාපියන් වෙත ආපසු යෑමට සූදානම් වෙමින් සිටි අතර මල්ලී ද හඬමින් අම්මාට කෑ ගසමින් සිටියේ ය.

‘ඇයි අම්මෙ, අපිට සැනසිල්ලෙ ඉන්ඩ දෙන්නෙ නැත්තෙ? අම්මට මොනවැයින් ද අඩු? හැම සැප සම්පතක්ම අපි අම්මට දෙන්නෙ නැද්ද? එහෙම කරලත් අම්ම ඇයි මල්කාන්තිව කන්ඩ හදන්නෙ? ඇයි තමන්ගෙ දුවකුට වාගෙ එයාට සලකන්ඩ බැරි?’

මල්ලිලා ගේ පවුලට තාවකාලිකව හෝ සැනසුමක් දෙනු රිසින් මම අම්මා ඔසවා ගෙන යළිත් අපේ මහ ගෙදරට ගෙන ගියෙමි.

‘මේ වැඩේ හරියන්නෙ නෑ. මං අම්මව අරගෙන යන්නං.’ නංගී එක හඬින් ම කියා සිටියා ය.

එතැන් පටන් අම්මා ජීවත් වූයේ නංගී ගේ ගෙදර ය. නංගී ගේ සැමියා ද දරුවා ද අම්මාට සෙනේවන්ත වූහ.

අම්මා නංගී ගේ ගෙදරට ගිය දා පටන් හැම දෙසතියකට ම වරක් මල්ලීත්, මමත් ඇය බැලීමට ගියෙමු. නංගීට අම්මා ගේ බර නොදැනෙන්නට ඉස්පාසුව සැලසීමු. එතැන් පටන් ඊළඟ වසර හත හෝ අට අම්මා ගත කළේ නංගී සමඟ ය. අවසාන කාලයේ දී අම්මා සිහි විකල්ලෙන් නංගීට දස වධ දුන්නා ය. එහෙත් නංගී ඒ සියල්ල විඳ ගත්තා ය.

අම්මා ගේ අන්තිම හුස්ම යන්නට පෙර අපි ඇය යළිත් මහ ගෙදරට රැගෙන ආවෙමු. මහ ගෙදරට පැමිණ සතියක් ඉක්මවීමට පෙර ඇය මිය ගියා ය.

අම්මා ගේ අවසන් කටයුතු සිදුවන අවස්ථාවේ දී අවමඟුල් සභාව මෙහෙයැ වූ ගමේ ප්‍රභුවරයෙක් මල්ලීත්, මාත් අම්මාට සැලකූ ආකාරය වර්ණනා කරන්නට වූයේ ය. ඒ අසා නංගී ගේ මුහුණ මැළවෙනු දුටු මට මහත් ශෝකයක් දැනිණ.

වැරැද්ද වහාම නිවැරදි කළ යුතු බව මම මල්ලීට කීමි. ඒ පිළිගත් මල්ලී අර ප්‍රභුවරයාගේ කතාව අවසන් වන විට ම පුංචි කතාවක් කළේ ය.

ඒ මෙබඳු ය.

‘සංවේගයට පත් ඥාති මිත්‍රාදීනි, අම්මගෙ මිනිය උස්සන්ඩ කලින් මං මේ ටික කියන්ඩ ඕනෑ. අපිට පුළුවන් උපරීම ආකාරයෙන් යුතුකම් ඉෂ්ට කෙරුව. ඒක අපේ අම්ම ඇවිදගෙන ගිය මේ මහ පොළොව දන්නව. මේ ගහකොළ දන්නව. හැබැයි මේ මහ පොළොවත්, මේ ගහකොළත් නොදන්න දෙයක් තියනව. පහුගිය අවුරුදු හතක් අටක් තිස්සෙ අයියත් නෙමේ, මාත් නෙමේ අපේ රත්තරං නංගියි, එයාගෙ මහත්තයයි, එයාගෙ දුවයි තමයි අපේ අම්මව බලා ගත්තෙ. ඒක මං මේ වෙලාවෙ කිව්වෙ නැත්තං මං අපාගත වෙනව. ඒ හින්ද ඒ තුන් දෙනාට මං මේ වෙලාවෙ පින් දෙනව. මේ සංසාරෙ මතු මතුත් අපේ අම්ම අපේ අම්ම ම වෙන්ඩ කියලත් අපේ සහෝදරී අපේ සහෝදරී ම වෙන්ඩ කියලත් මායි, අයියයි ප්‍රාර්ථනා කරනව.’

මේ කතාවෙන් විස්මයට පත් අය හෙමිහිට සාදුකාර දෙනු ඇසිණ.
 

අනන්‍යතාව සඟවා සිටීමට කැමති සිළුමිණ පාඨකයකු විසින් යොමු කරන ලද ලිපියක් ඇසුරිනි.

http://www.silumina.lk/2014/08/03/_art.asp?fn=as14080311

Read More

“මොන තූත්තුකුඩියක ද ගිහිල්ලා හිටියෙ”....?

තූත්තුකුඩි පල්ලියේ

මංගල්ලයට ශ්‍රී ලාංකිකයන් අදටත් යනවා

“කොයි තරම් වෙලා හෙව්ව ද? මොන තූත්තුකුඩියක ද ගිහිල්ලා හිටියෙ” අප කුඩා අවදියේ නිවෙසින් බැහැරව ගොස් ආපසු නිවෙසට පැමිණි විටෙක අපේ ආච්චිලා සීයලා අප විමසුවේ එසේ ය. තූත්තුකුඩිය අපේ ආච්චිලා සීයලාගේ කතා ව්‍යවහාරයට එසේ එක්ව තිබුණේ ඉතා ඈත කාලයක සිට ශ්‍රී ලංකාව හා තූත්තුකුඩිය අතර තිබූ සමහර සම්බන්ධතා නිසාය. එක් කරුණක් වූයේ අතීතයේ බොහෝ විටෙක අපේ බත්පත රසගැන්වූ කරවල මෙරටට ගෙන්වූයේ තූත්තුකුඩියෙන් නිසාය.
එයට වඩා වැදගත් හා සුවිශේෂී කරුණ වූයේ ශ්‍රී ලංකාවේ ජීවත්වන ජන කොට්ඨාසයක් වූ ශ්‍රී ලංකා භාරතයන් හෙවත් පරවර ජනතාවගේ ආදිතමයන් ශ්‍රී ලංකාවට පැමිණියේ තූත්තුකුඩියෙන් වීමය.
බ්‍රිතාන්‍ය පාලන සමයේදී ඔවුන්ගේ සමුද්‍ර යාත්‍රික කටයුතු පහසුකර ගැනීම සඳහා කොළඹ වරාය සංවර්ධනය කර ගැනීම ඔවුනට අවශ්‍ය විය. මේ සඳහා ඉංග්‍රීසින් සමුද්‍ර යාත්‍රික කටයුතු පිළිබඳ දැනුමක් ඇති පිරිසක් දකුණු ඉන්දියාවේ තූත්තුකුඩිය ප්‍රදේශයෙන් මෙරටට රැගෙන ආහ. ධීවර කර්මාන්තය පිළිබඳ දීර්ඝ අත්දැකීම ඇති දකුණු ඉන්දියාවේ වෙරළබඩ ජීවත්වූ මේ ජන කොට්ඨාසය හැඳින්වූයේ පරවර ජනතාව යනුවෙනි.
මෙලෙස කොළඹ වරායේ සේවය සඳහා පැමිණි පරවර ජනතාවගෙන් සමහර දෙනකු ආපසු තම උපන් බිමට නොගොස්, ශ්‍රී ලාංකික තරුණියන් විවාහ කරගෙන කොළඹ කොච්චිකඩේ කොටහේන, මෝදර වැනි ප්‍රදේශවල පදිංචි වූහ. එලෙස ඉංග්‍රීසි පාලන සමයේ තූත්තුකුඩියෙන් පැමිණි පරවර ජනතාව ගෙන් පැවත එන්නන් අදත් මේ ප්‍රදේශවල විශාල වශයෙන් ජීවත් වෙති.

මුතු කිමිදීම

එයටත් පෙර කාලයක ශ්‍රී ලංකාවේ මුතු කිමිදීම සිදුකරන සමයේ වයඹදිග වෙරළ ප්‍රදේශයේ මුතු කිමිදීම සඳහා තූත්තුකුඩියේ පරවර මිනිසුන් මන්නාරම, අරිප්පුව, මුතු හලාවත වැනි ප්‍රදේශවලට පැමිණියහ. ඔවුන් අතරින් සමහර දෙනකු ද ආපසු තම මවු රටට නොගොස් එම ප්‍රදේශවලම බින්න බැස්සහ. අද ඒ ප්‍රදේශවල ජීවත්වන සමහර දෙනකු ද ඒ ආදිතම පරවර ජනතාවගෙන් පැවත එන්නෝ වෙති.
පරවර ජාතිකයින් ශ්‍රී ලංකාවට පැමිණීමට තවත් ප්‍රධාන හේතුවක් වූයේ අප කලින් ද කී පරිදි තූත්තුකුඩිය හා ශ්‍රී ලංකාව අතර තිබූ කරවල වෙළෙඳාමය. වසර හැත්තෑවකට අසූවකට එහා අතීතයේ සිංහල මිනිසුන් බත් වේලට මස් මාළු එකතු වූයේ කලාතුරකිනි. නමුත් කරවල කැබැල්ලක් ඔවුන්ගේ බත් පතට ආගන්තුක කෑමක් නොවීය. එනිසා හොඳ කරවල වෙළෙඳාමක් එකල ශ්‍රී ලංකාවේ විය.
එකල මෙරටට අවශ්‍ය කරවල වැඩිපුර ගෙන්වූයේ තූත්තුකුඩියෙනි. තූත්තුකුඩියට සමීප ඉන්දියන් සාගරයේ පිහිටි ලක්ෂ්ද්ව් දූපත් සමූහය සම්පූර්ණයෙන් කරවල නිෂ්පාදනය කරන ස්ථාන විය. ඒවායේ කරවල ද යැවුණේ තූත්තුකුඩියටය.
ඉංග්‍රීසි යුගයේ පටන් ලංකාවේ කරවල වෙළෙඳාමේ මෙහෙයුම සිදුවූයේ කොළඹ බංගසාල වීදියේය. එම කරවල වෙළෙඳාමේ ඒකාධිකාරිය හිමිව තිබුණේ ද පරවර ජනතාවටය. එලෙස කරවල ව්‍යාපාරිකයන් වශයෙන් පැමිණි පරවර ජනතාවගෙන් කොටසක් ද ආපසු ඉන්දියාවට නොගොස් ශ්‍රී ලංකාවේම පදිංචි වූහ.
අද ක්‍රියාත්මක නොවූවත් එකල මීගමුව, හලාවත, කල්පිටිය, මන්නාරම යන ප්‍රදේශවල විදේශීය කුඩා නෞකාවන් යන එන වරාය විය. එම වරායන්හි ආනයනික බදු අය කිරීම සඳහා රේගුව ද එම ස්ථානවල ක්‍රියාත්මක විය. තූත්තුකුඩිය වරායෙන් කරවල සහ වෙනත් කුළුබඩු රැගෙන ආ සමුද්‍ර යාත්‍රාවල සේවය කළ සමහර පරවර පුද්ගලයන් ද ශ්‍රී ලංකාවේ කාන්තාවන් හා විවාහ වූහ. එම නිසා ඔවුන්ගෙන් පැවත එන පරවර ජනතාවක් ද මීගමුව, හලාවත, කල්පිටිය, මන්නාරම වැනි ප්‍රදේශවල ජීවත් වෙති.

ගෞරවාදරය

එම පරවර ජනතාවගෙන් පැවත එන්නන් දැන් ශ්‍රී ලංකාවේ හඳුන්වන්නේ “ශ්‍රී ලංකා භාරත” යනුවෙනි. ඔවුන් අතරින් ජෝන් රුද්‍රිගු, ජෝර්ජ් ආර්. මෝතා අපේ පාර්ලිමේන්තුව ද නියෝජනය කර ඇත.
නීතිඥ ජේ. විල්සන් ප්‍රනාන්දු, සෙල්වම් කෲස් මොරායස්, ජුවාන් ඩි කෲස්, ක්ලැරන්ස් ඩි කෲස්, ලාසරුස් දබරේරා පරවර ජාතිකයන් අතර කියැවෙන කීර්තිමත් නාමයන්ය.
ශ්‍රී ලාංකික පරවර ජනතාවගේ අප්‍රමාණ ගෞරවාදරයට පාත්‍ර වූ තූත්තුකුඩියේ තුෂාරයේ අප ස්වාමිදූගේ දේවස්ථානයේ වාර්ෂික මංගල්‍යය සිදු කරනුයේ සෑම වසරකම අගෝස්තු පස්වන දින ය. පසුගිය දිනෙක ඉන්දීය “හින්දු” පත්‍රය පවසා තිබුණේ ඉන්දීය ශ්‍රී ලාංකික සබඳතාවය ප්‍රකට කරන තුෂාරයේ අප ස්වාමිදූගේ මංගල්‍ය අගෝස්තු 05 දින ශ්‍රී ලාංකික බැතිමතුන්ගේ ද සහභාගිත්වයෙන් සිදුවෙන බවත්, වාර්ෂික මංගල්‍ය උත්සවයේ මුල පිරීම ජූලි 26 දින කොඩි ගස එසවීමත් සමඟ සිදුවූ බවය.
ඈත අතීතයේ හින්දු භක්තිකයන් වශයෙන් සිටි තූත්තුකුඩියේ පරවර ජනතාව කතෝලික භක්තිකයින් බවට පත්වූයේ 1538 දීය. ඒ පේදුරු ගොන්සාල්වේස් නමැති කතෝලික පියතුමකු විසින් එම පරවර පිරිස බෞතීස්ම කිරීමෙනි.
එම වසරේම එහි කුඩා දේවස්ථානයක් ඉඳිවූ අතර, එය පේදුරු ගොන්සාල්වේස් පියතුමාගේ ආරක්ෂක මුනිවරයා වූ ශුද්ධ වූ පේදුරු තුමා වෙනුවෙන් කැප කරන ලදී. ඉන්දියාවේ අපෝස්තුලුවරයා ලෙස සැලැකෙන ෆ්‍රැන්සිස් සේවියර් මුනි තුමා ද මෙම දේවස්ථානයේ දීව්‍ය පූජාව පවත්වා ඇත.
එක්දහස් පන්සිය අසූ දෙකේදී මෙම දෙව් මැඳුර ජේසු නිකායික පියවරුන්ගේ භාරයට පත්විය. එම කාලයේ කොචින්හි ඉන්දියාවේ අගරදගුරු තුමා විසින් මෙම දේවස්ථානය “තුෂාරයේ අප ස්වාමි දූ” ගේ නමින් කැප කරන ලදී. තුෂාරයේ අප ස්වාමි දූ ඔවුන් සැලකුවේ ධීවර නාවුකයන්ගේ ආරක්ෂක මුනිවරිය ලෙසය.
1610 සිට තූත්තුකුඩිය තුෂාරයේ අප ස්වාමි දූගේ පල්ලියේ වාර්ෂික මංගල්‍ය අගෝස්තු පස්වන දින ඉතාමත් උත්සවාකාරයෙන් පවත්වනු ලැබේ.

නොගැඹුරු මුහුද

එක්දහස් නවසිය අසූ දෙකේදී තූත්තුකුඩියේ තුෂාරයේ අප ස්වාමි දූගේ දේවස්ථානයේ හාරසිය වැනි ජුබිලිය සමරන ලදී. ඒ නිමිතිකොට දෙවන ජුවාම් පාවුළු පාප් තුමන් 1982 ජූලි 30 දින නිකුත් කළ අපෝස්තලික ලිපියෙන් එම දේවස්ථානය බැසිලිකාවක තත්ත්වයට උසස් කරන ලදී. පසුව දෙවන ජුවාම් පාවුළු පියතුමා ඉන්දියාවට සපැමිණි අවස්ථාවේදී තූත්තුකුඩිය තුෂාරයේ අප ස්වාමිදූගේ බැසිලිකාවට ද සපැමිණ ඇත.
“තූත්තුකුඩිය එහෙම නැතිනම් ටියුටිකොටන් වරාය කොළඹ වරාය තරම් ලොකු නැහැ. එහි තියෙන්නෙ නොගැඹුරු මුහුද. ඒ වගේ ම කීප පැත්තකින් ගොඩබිමෙන් ආවරණය වෙලා තියෙන නිසා වාරකන් කාලයට වුණත් බත්තල් රුවල් ඔරු දෙතුන් සීයක් ඒ වරායෙ නවත්වල තියන්න පුළුවන්” තූත්තුකුඩිය වරාය පිළිබඳව එම තොරතුරු හෙළි කරන්නේ සමුද්‍රාගමනය පිළිබඳ දීර්ඝ අත්දැකීම් ඇති ඇන්ටනි ජයකොඩිය.
ඔහු පවසන ලෙස එක්දහස් නවසිය හැට ගණන්වල ඉන්දියාවට යෑමට ගමන් බලපත්‍ර අවශ්‍ය වූයේ නැත.
“ඒ කාලෙ මේ ජාතික හැඳුනුම්පත කියල දෙයකුත් නැහැනේ. ඒ කාලෙ ඉන්දියාවට යන්න ක්ලියරන්ස් පේපර් කියල එකක් දෙන්නෙ. නමුත් පදිංචි ප්‍රදේශයේ ඩී. ආර්. ඕ. කන්තෝරුවට ගියාම කොළයක නම, තොරතුරු ලියල ක්ලියරන්ස් පේපර් එක දෙනවා. ඒක රේගුවට ඉදිරිපත් කළාම ඉන්දියාවට යන්න පුළුවන්” ඇන්ටනි ජයකොඩි පවසන්නේ එක්තරා යුගයක ඉන්දියාවට යෑමට ගමන් අවසර ලබාගත් අන්දම පිළිබඳවය.
ඔහු පවසන ලෙස එයට පසු කාලයක “ඉන්ඩියා ඔන්ලි” යනුවෙන් සටහන් කළ පාස්පෝට් එකක් නිකුත් විය. ඒ සඳහා රුපියල් දහයක මුදලක් අය කෙරුණි. වසර පහක් සඳහා නිකුත් කෙරුණ එය වාර්ෂිකව අලුත් කරගත යුතු විය.
ධීවර සංස්ථාවේ බහුදින ධීවර යාත්‍රාවල නැව් පති සහ කුඩා වෙළෙඳ නැව්වල ප්‍රධාන නිලධාරී ලෙස වසර ගණනාවක සේවා අත්දැකීම් ඇති පමුණුගම සෙත්තප්පාඩුවේ ඇන්ටනි ජයකොඩි එම වෘත්තිමය කටයුතුවලදී කීප වාරයක්ම තූත්තුකුඩියට ගොස් ඇත.

කොඩි ගස

“මම තුන් පාරක් විතර තූත්තුකුඩියේ තුෂාරයේ අප ස්වාමි දූගේ බැසිලිකාවට ගිහිල්ලා තියෙනවා. පල්ලියෙ කොඩි ගස ඔසවන වෙලාවට වගේ ම පල්ලියෙ මංගල්ලයටත් ගිහින් තියෙනවා” ඔහු සිතන්නේ එය කතෝලිකයකු වශයෙන් ඔහුට හිමි වූ වාසනාවක් බවය.
තුෂාරයේ අප ස්වාමි දූගේ බැසිලිකාව පිහිටා ඇත්තේ තූත්තුකුඩිය නගරයට සමීපවය. තූත්තුකුඩිය වරායේ සිට නගරයට යෑමට බස් රථයක් ඇත. ඒවා ලී බොඩිවලින් යුක්ත, ඉඳ ගැනීම දෙපැත්තේ බංකු පේළි දෙකක් ඇති පරණ පන්නයේ ඒවාය.
“තූත්තුකුඩියෙ පල්ලියෙ කොඩි ගස ඔසවන්නෙ ජුලි විසිහයවැනි දිනක. අඩි හැත්තෑ පහක් විතර උස ඒ ලී කොඩි ගහ නිල් පාටින් වර්ණ ගන්වා තියෙන්නෙ” හෙතෙම එලෙස විස්තර කරන්නේ කතෝලික පල්ලියක වාර්ෂික මංගල්‍යය ආරම්භ කරන පිළිවෙළ පිළිබඳවය.
සවස් කාලයේ සිදු කෙරෙන කොඩි ගස එසවීමේ චාරිත්‍රයේදී තූත්තුකුඩියේ එක් එක් පැතිවල ජීවත්වන කතෝලිකයින් කොඩි ගසේ එල්ලීම සඳහා කොඩි රැගෙන නාගසලම් සංගීතයත් සමඟින් දේවස්ථානය ඉදිරිපිටට ළඟා වෙති.
“අපේ ගම්වල කොඩි ගහ උස්සද්දි කිරිබත් දානය දෙනව වගේ තූත්තුකුඩියේ පල්ලියේ කොඩි ගස ඔසවද්දි ‘පුක්ක’ කියල කෑමක් දානයට දෙනවා. ඒක මුංඇට තම්බල සීනි දාල හදන එකක්. අපේ කිරියා වගෙයි. ඒ පාටමයි. ලොකු තඹ භාජනවල දාගෙන ‘පුක්ක’ ගේනවා. කොඩි ගහ ඉස්සුවයින් පස්සෙ හැඳිවලින් නුග කොළ වගේ ඒවට බෙදලා දෙනවා. ටිකක් ඝනකම් නිසා ඇඟිලි දෙකෙන් පහසුවෙන්ම කෑවැකි” ඒ තූත්තුකුඩියේ අමුතු ආහාරය පිළිබඳ තොරතුරුය.

ධීවර ගම්මාන

තූත්තුකුඩියේ තුෂාරයේ අප ස්වාමිදූගේ මංගල්‍ය පවත්වන්නේ අගෝස්තු පස්වන දිනය. එදිනට ඉන්දියාවේ බොහෝ ධීවර ගම්මානවලින් මෙන්ම ශ්‍රී ලංකාවේ සමහර ධීවර ගම්මානවලින් ද පිරිස් එම මංගල්‍යයට සහභාගි වෙති.
“අපේ පල්ලිවල මංගල්‍යවලට වගේ විකාර විලාසිතා එහෙ පල්ලියෙ නැහැ. පල්ලියට එන හැම පිරිමි කෙනෙක්ම සුදු වේට්ටිය සුදු කමිසය හරි සුදු අත් දිග බැනියමක් ඇඳල තමයි එන්නෙ. ගෑනු අය ඔක්කොම සාරි අඳින්නෙ.
පල්ලිය ඇතුළදී සාරි පොටෙන් ඔළුව වහගන්නවා.” කවුරුවත් සපත්තු සෙරෙප්පු දාගෙන පල්ලියට ඇතුළු වෙන්නෙ නැහැ, ඇන්ටනි ජයකොඩි එලෙස පැහැදිලි කරන්නේ තූත්තුකුඩිය කතෝලික බැතිමතුන්ගේ ආගමික ශ්‍රද්ධාව පිළිබඳවය. දේවස්ථානය ඇතුළත හරහා ඇවිද යෑම, දේවස්ථානය තුළ කථා කිරීම සිදුවන්නේ නැත.
දේවස්ථානයන්හි ආගමික කටයුතු සඳහා පැමිණෙන බැතිමතුන් දේවස්ථානය අසල ඇති වතුර බක්කිවලින් ස්නානය කිරීම අනිවාර්යයෙන් සිදුවන්නකි.
“පල්ලිය ළඟම තාප්පයකින් වට කළ ස්ථානයක පිරිමින්ට සහ කාන්තාවන්ට නාන්න වෙනම ස්ථාන දෙකක් තියෙනවා. අපේ ඉණ ගාවට වගේ උසින් පුංචි සිමෙන්ති ටැංකි හදල තියෙනව. හැම තිස්සෙම ඒවායෙ වතුර පිරිල තියෙනවා. පුංචි බාල්දියක් දෙනව නාගන්න. නෑවයින් පස්සෙ ඉන්දියානු රුපියලක් වගේ මුදලක් දෙනවා එතැන වැඩ කටයුතු කරන අයට” ඇන්ටනි ජයකොඩි වැඩිදුරටත් පවසන ලෙස එලෙස පැමිණෙන ඉන්දියානු බැතිමතුන් පල්ලියට පැමිණීමේදී ඇඳගෙන ආ ඇඳුම්වලින්ම ස්නානය කරන බවය.
තූත්තුකුඩිය තුෂාරයේ අප ස්වාමි දූගේ බැසිලිකාව සමීපයේ ඇති එක් මාර්ගයක් දෙපසම පිරී ඇත්තේ බාබර් සාප්පුවලිනි.
“සමහර අය පල්ලියට ඇවිල්ල එක් එක් භාරහාරවලට හිස සම්පූර්ණයෙන් මුඩු කරන සිරිතක් එහි තියෙනවා. පල්ලිය ඇතුළෙ මිනිස්සු දාහක් හිටියොත් අඩු ගණනෙ තිහ හතළිහක්වත් හිසකේ සම්පූර්ණයෙන් මුඩු කළ අය ඉන්නවා.” අපේ සංචාරකයා මේ විස්තර කරන්නේ අපේ රටේ දක්නට නොලැබෙන නමුත් එහිදී දක්නට ලැබෙන අපූරු භාරහාර වීමක් පිළිබඳවය. මෙලෙස පල්ලියට ගිය එක් අවස්ථාවකදී මංගල ඇඳුමෙන්ම පැමිණි මනාලියක් ඇයගේ හිසකේ සම්පූර්ණයෙන් මුඩුකර පල්ලිය ඇතුළු වූ විලාශය දුටු බවය.

වන්දනාකරුවෝ

ඉටිපන්දම් පත්තු කරන ස්ථානය සමීපයෙහි තඹවලින් නිර්මාණය කළ කුඩා මිනිස් සිරුරු, කුඩා කකුල්, කුඩා අත් වැනි දේවල් දක්නට ලැබෙන බව ඇන්ටනි ජයකොඩි පවසයි.
“ඇඟට ඇඟක්, කකුලට කකුලක්, අතට අතක් භාරවෙන සිරිතක් ඔවුන්ගේ තියෙනව. කකුලක ආබාධයක් තිබුණම එය සනීප වෙන්න කකුලට කකුලක් බාර වෙනවා. කුඩා තඹ කකුලක් පූජා කරල තමයි ඔවුන් එය ඔප්පු කරන්නෙ. පෝස්ට් කාඩ් ප්‍රමාණයේ ඡායාරූපත් ඒ බාරහාර වෙන තැන එල්ලා තියෙනවා මම දැක්කා. මම කෙනෙකුගෙන් අහපුවම කීවෙ අතුරුදන් වුණ අයගෙ ඡායාරූප එහෙම එල්ලන්නෙ ඔවුන් සොයා දෙන්න කියලයි”, ඇන්ටනි ජයකොඩි නොනවත්වාම විස්තර කරන්නේ තූත්තුකුඩියේ තුෂාරයේ අප ස්වාමිදූගේ පල්ලියේදී දක්නට ලැබෙන අපූරු ආගමික වත් පිළිවෙත් පිළිබඳවය.
පල්ලියට නුදුරින් ඇති එක් මාර්ගයක දෙපස පිහිටා ඇති කඩ හාරසියයකට වැඩි ප්‍රමාණයක් පිරී ඇත්තේ ඉස්තරම්ම වර්ගයේ සුදු යකඩ, තඹ, පිත්තල හට්ටි මුට්ටි වළං ආදියෙනි.
“තූත්තුකුඩි යන අපේ වන්දනාකාරයො බොහෝ විට මේ භාජන මිලදී ගන්නවා. එයට අමතරව ඉස්තරම්ම සඳුන් තෙල්, රත් හඳුන්, සුදු හඳුන්, ඇ‍ඟේ තවරන කහ කුට්ටි තූත්තුකුඩියෙන් මිලදී ගන්න පුළුවන්.”
ඇන්ටනි ජයකොඩි පවසන ලෙස තූත්තුකුඩියෙහි ඇති ආපන ශාලාවල ඇති ආහාර ඉතා රසවත්ය. ආපන ශාලා සමීපයෙන් යන විට ද එහි ඇති ආහාරවලින් නික්මෙන කුළුබඩු සුවඳින් නැහැපුඬු පිරී යයි. එහි ආහාර පිළියෙල කිරීමේදී මිරිස් වැඩිපුර භාවිත වන්නේ නැහැ. නමුත් සූදුරු, මාදුරු, කොත්තමල්ලි වැනි කුළුබඩු යහමින් භාවිත වෙයි.

කුළුබඩු සුවඳ

“කෑමට එළවළු දෙකකුයි මාළුයි බත් එකකට ලැබෙනවා. අඟල් දෙකයි, තුනේ මාළු කෑල්ලක් ග්‍රෑම් එකසිය පනහක් විතර බරයි. පොල් කිරි දාන්නෙ නැහැ. ඒත් කෑමට මුදවපු කිරි, එළඟි තෙල්, තල තෙල් ආදිය දානවා. එළගි තෙලුයි කුළුබඩුයි දාපු මුරුංගා හොද්ද යෝගට් එකක් වගේ මිදිලා.
ඇඟිලි දෙකෙන් හොදි අරගෙන කෑවැකි” ඇන්ටනි ජයකොඩි වැඩිදුරටත් පවසන ලෙස එවැනි ආහාර වේලකදී සමහර ආපන ශාලාවකදී අඟල් තුනක් පමණ දිග අලුවා කෑල්ලක හැඩයට කපන ලද පොල් කෑල්ලක් ද ලැබෙයි. ඒ තෙලෙන් බදින ලද මිරිස් කරල් සමඟ හපා කෑමටය. මෙවැනි ආහාර වේලකට ගෙවිය යුත්තේ ඉන්දියානු රුපියල් විසිපහක් පමණි.
තූත්තුකුඩියේ සිට ශ්‍රී ලංකාවට පැමිණ මෙහි විවාහ වී අලුතෙන් ජීවිතය ඇරැඹු පරවර ජනතාව ඔවුන්ගේ ආගමික විශ්වාසය මෙහිදී ඇරඹූහ. එයින් සමහර දෙනෙකු මීගමුව පෙරියමුල්ල තුෂාරයේ අපි ස්වාමිදූගේ දේවස්ථානයක් ඉඳිකළහ. කොළඹ අවට ජීවත්වන එම ජනතාව පිටකොටුව පිලිප්නේරි පල්ලියේදී අගෝස්තු පස්වන දින තුෂාරයේ අප ස්වාමිදූගේ මංගල්‍ය පැවැත්වීමට පුරුදු වූහ.
“තූත්තුකුඩියට කෙළින්ම ඥාතිකම් තිබුණ මුල් කාලයේ හුඟාක් දෙනා ලංකාවෙන් තූත්තුකුඩිය මංගල්‍යයට ගියා. ඔවුන්ගේ දරු මුනුපුරන් දැන් ඉස්සර වගේම යනවා අඩුයි. ඒත් ධීවර යාත්‍රිකයන් සමහර දෙනා තවමත් තූත්තුකුඩියෙට යනව තුෂාරයේ අප ස්වාමිදූගේ මංගල්‍යයට සහභාගිවීමට” ඇන්ටනි ජයකොඩි වත්මන් තත්ත්වය එසේ විස්තර කරයි.

පීටර් කැනියුට් පෙරේරා

ඡායාරූපය - ලෙස්ලි පෙරේරා

ජාඇල මධ්‍යම

http://www.silumina.lk/2014/08/03/_art.asp?fn=af14080312

Read More

මේ කතාවටත් කන් දෙන්න!

ජපන් ජාතික මහාචාර්යවරයකු වන ෂිබුයා තොෂිඕ ශ්‍රී ලංකාව ගැන පොතක් ලියා තිබේ. මේ පොතට ඇතුළත් වී ඇත්තේ අපේ සංස්කෘතිය තුළ පවත්නා හර පද්ධතිය යි. ජපානය භෞතික වශයෙන් ශීඝ්‍ර දියුණුවක් අත්පත් කරගෙන ඇති’මුත් සාංස්කෘතික වශයෙන් කඩාවැටීමකට ලක් වී ඇතැ’යි මහාචාර්යවරයා පැහැදිලි කරයි. එම සංස්කෘතික සෝදාපාළුව තුළ හුදෙකලා ජපනකු බිහි වී ඇති බව ද ඔහු පෙන්වා දෙයි. හැබෑවට ම ෂිබුයා මහතා උත්සාහ දරා ඇත්තේ ශ්‍රී ලංකාව සංස්කෘතිය අතින් උසස් රාජ්‍යයක් ලෙස පෙන්වා දීමට ය.
සංස්කෘතිය මෙතරම් දියුණු නම්; රටේ අපරාධ වැඩි වන්නේ මන්දැ’යි කෙනකු ප්‍රශ්න කරන්නට පුළුවන. කුඩු ජාවාරම්කාරයන් මෙතරම් කොටු වන්නේ මන්දැ’යි තවත් කෙනකු ප්‍රශ්න කරන්නට පුළුවන. එසේ ප්‍රශ්න කිරීම සාධාරණ ය. හේතුව අපරාධවල වර්ධනයක් සේ ම ඒවා රස කරමින් වාර්තා කිරීමක් ද දකින්නට ලැබෙන බැවිනි. අපරාධයක් පසුපස යමින් එය නිරූපණය කොට දැක්වීමේ ජනප්‍රිය රූපවාහිනී වැඩසටහනක් මීට වසර කිහිපයකට පෙර විකාශය විය. විශාල ආකර්ෂණයක් දිනාගත් මේ වැඩසටහන නිසා අපරාධ වර්ධනය වූ බව එහි නිෂ්පාදකයෝ ම අද පිළිගනිති.
ඉන්දියාව ජනමාධ්‍ය සම්බන්ධයෙන් ඉතා වැදගත් රාජ්‍යයෙකි. විශ්වවිද්‍යාල මට්ටමේ ජනමාධ්‍ය පාසල් දෙසීයකට ආසන්න සංඛ්‍යාවක් එහි පවතී. වසරකට දහස් ගණනක් ජනමාධ්‍ය උපාධි ලබති. ඉන්දියාවේ ජනමාධ්‍ය කලාව, ලෝක සන්නිවේදන ජාලයේ එක්තරා ශෛලියක් ලෙස ද පිළිගැනේ. එහි ජනමාධ්‍ය පිළිබඳ මහාචාර්යවරයකුගෙන් ප්‍රවෘත්ති යනු කවරේදැ’යි කෙනෙක් විමසූහ. මහාචාර්යවරයා ගත් කටට ම කියා සිටියේ ප්‍රවෘත්ති යනු ලිංගිකත්වය, අපරාධ හා මුදල් ගනුදෙනු යන්න ය. මේ නිර්වචනය වෙළෙඳාම සම්බන්ධයෙන් නිවැරැදිය. එහෙත් සංස්කෘතිය සම්බන්ධයෙන් අතිශයින් ම වැරැදිය.
රටේ ප්‍රමුඛ පෙළෙහි භික්ෂූන් වහන්සේ පිරිසක් මීට මාස ගණනකට ඉහත දී ජනාධිපතිවරයාට සන්දේශයක් භාර දුන්හ. එහි සඳහන් වූයේ පුවත්පත් මඟින් ඉතා රසවත් කොට අපරාධ වාර්තා කිරීම නිසා අපරාධ සාමාන්‍යකරණයට ලක් වී එය අත්හදා බලන පිරිස වැඩි වී ඇති බව ය. එබැවින් ජනමාධ්‍ය වාර්තාකරණයට නීති පනවන්නැ’යි උන්වහන්සේලා ඉල්ලා සිටියහ. ජනමාධ්‍යයට වාරණ පැනැවීම අසීරු කටයුත්තකි. එය තවත් ගැටලු සමුදායක ආරම්භයක් වන්නට ද පුළුවන. ජනාධිපතිවරයා ජනමාධ්‍ය ප්‍රධානීන් කැඳවා මේ පිළිබඳ උපදේශනයක් ලබා දුන්න ද වාර්තාකරණයෙහි වෙනසක් දකින්නට නැත.
මේ පසුබිම තුළ ම විමැසිය යුතු තවත් අංශ දෙකක් තිබේ. පළමුවන්න අපරාධ මර්දනය සඳහා ආණ්ඩුව ගෙන ඇති පියවර ය. විවිධ අපරාධ මර්දනය සඳහා ආණ්ඩුව වෙනදාට වඩා උනන්දුවක් හා සැලැකිල්ලක් දක්වා තිබේ. විශේෂ පොලිස් ඒකක ගණනාවක් ද ඒ සඳහා අලුතෙන් පිහිටුවා ඇත. රාජ්‍ය ප්‍රධානීන්ගේ අවධානය ද ඒ කෙරෙහි දැඩි ව එල්ල වී ඇත. දෙවන්න අපරාධකරුවන් පුනරුත්ථාපනය කෙරෙහි වැඩි අවධානයක් යොමු කර තිබීම ය. බන්ධනාගාර තුළ පවා එම වැඩසටහන් හොඳින් ක්‍රියාත්මක වෙයි. මේ හේතු - සාධක නිසා අපරාධ සම්බන්ධිත පුළුල් සංවාදයක් රට තුළ පවතී. එය ඇතැම් දෙනා වැරැදි ලෙස අර්ථ දක්වති.
අප මේ තීරුව ආරම්භ කළ තැනට යළි ප්‍රවේශ වුවහොත් ජපානය වැනි රටකට වඩා ගැඹුරු සාංස්කෘතික පසුබිමක් අපට ඇතැ’යි කියන්නට පුළුවන. ලෝකයේ මුල් ම ශිෂ්ටාචාර සමඟ යම් යම් සාදෘශභාවයක් රටේ ඉතිහාසය තුළ පවතී. පුරා විද්‍යාත්මක සාක්ෂිවලින් ද ඒ බව සනාථ වේ. මහවැලි ගඟ දෙපස පැවැති ඉපැරැණි ශිෂ්ටාචාරයක් ගැන ද ඉතිහාසඥයන් අතර කතාබහක් පවතී. කුමක් වුව විදේශීය ආක්‍රමණ නිසා එම ශිෂ්ටාචාරයේ හර පද්ධතිය විනාශ වූ බව පිළිගත යුතු ය. එය වඩාත් විනාශකාරී ලෙස බලපාන්නට වූයේ 1977 න් පසුව ය.
ශ්‍රී ලංකාව තුළ බලවත් ආර්ථික කැරැල්ලක් ක්‍රියාත්මක වූයේ 1977 න් පසුව ය. එය ආර්ථික ආක්‍රමණයක් ලෙසත් සාංස්කෘතික විනාශයක් ලෙසත් හඳුන්වා දෙන්නට පුළුවන. රටක ආර්ථිකය සැලැසුම් කළ යුත්තේ රටේ ඉතිහාසය, මිනිසුන්ගේ චින්තනය, දේශීය රටාව හා රටේ සම්පත් ද සැලැකිල්ලට ගනිමින් ය. විවෘත ආර්ථිකය හඳුන්වා දුන් ජේ. ආර්. ජයවර්ධන මහතා ඒ සියල්ල උඩු -යටිකුරු කළේ ය. සාහිත්‍යය, ඉතිහාසය වැනි මානව ශාස්ත්‍ර විෂයයන් අධ්‍යාපනයෙන් අතුගා දැමිය යුතු යැයි ඔහු කල්පනා කළේ ය. ඒ වෙනුවට තාක්ෂණයෙන් දරුවන්ගේ ඔළු ගෙඩි පුරවා දැමිය යුතු යැයි ද ඔහු කල්පනා කළේය. මේ ක්‍රමය ඔස්සේ බිහිවුණේ බල්ලන් මරා හෝ සල්ලි හොයන මිනිසුන් ය.
කවුරු කුමන විග්‍රහ ඉදිරිපත් කළ ද 1977 න් පසු අපේ ආර්ථිකය හෝ සංස්කෘතිය හෝ පිළිගත හැකි සංවර්ධනයක් ලැබුවේ නැත. මිනිසුන් ස්වල්ප දෙනකු අත මුදල් ගැවසුන ද, ජාවාරම් අධික විය. දූෂණ අධික විය. දුප්පතුන් වඩාත් දුප්පත් වූ අතර පොහොසතුන් ස්වල්ප දෙනකු වඩාත් පොහොසත් වන බව දකින්නට ලැබිණි. මිනිසුන්ගේ චින්තනය වෙනස් වීම නිසා තරගය අධික විය. එකිනෙකාට වෛර කරන සමාජයක් බිහි විය. මිනිස් ජීවිත ශත පහකට ගණන් නො ගැනිණි. එහි ප්‍රතිඵලය වූයේ සාමූහිකත්වය බිඳී යෑම ය. මෙය වක්‍රාකාරයෙන් අපරාධ වර්ධනයට රුකුලක් විය.
රටේ පවතින අපරාධ ගැන කතා කරන හා ඒවා විවේචනය කරන අයගේ අවධානයට ලක්විය යුතු කරුණු කිහිපයක් තිබේ. සංචාරක කර්මාන්තය නිසා සංස්කෘතිය විනාශ වන්නේ නැත. සංස්කෘතිය විනාශ න්නේ චින්තනය විකෘති කිරීමෙන් ය. චින්තනය විකෘති කිරීමට මඟ පෑදුණේ විවෘත ආර්ථික සම්ප්‍රදායයෙන් ය. එහෙත් අද එය කළමනාකරණයට ලක්කර තිබේ. දේශීය චින්තනයට හා අපේ උරුමයට මුල් තැන ලැබී තිබේ. උගතුන් ඒ ගැනත් කතා කළ යුතු ය.

 http://www.dinamina.lk/2014/07/19/_art.asp?fn=e140719

Read More

"හිස් ටින්"ද...? හිස්ට‍්‍රි රිංග්ද...? "History Ring"

 එච්.ආර්.‍ ජෝතිපාල, ජේ.ඒ. මිල්ටන් පෙරේරා, මොහිදීන් බෙග් |

හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි //
කාටවත් බය නෑ අපි තිබුණත් නැතත් සල්ලි
ඕ... තිබුණත් නැතත් සල්ලි
අපි කයිවාරු නෑ මල්ලි

ඒ වුණත්

හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි

අපේ පාටිය පිරිමි පාටියයි
අපි ඡන්දෙ දෙන්නේ වාසියටයි
කොයි කාගෙ ආණ්ඩුවත් අපට එකයි
අප‍ට ඕනෑ ප්‍රජාතත්ත්‍රවාදයයි

ඒ වුණත්

හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි

නැති බැරි එකා තල්ලු වෙනවා
පුළුවන් මිනිහා හිනහා වෙනවා
වැටි වැටි වුණත් නැගිටිනවා
මගේ බලෙත් මං පෙන්නනවා

ඇත්ත නේන්නම්...

හිස් ටින් එකක් වාගෙයි අපේ මේ ජීවිතේ මල්ලි
කිසි වාසියක් නෑ හාමතෙයි නැත්තම් අතේ සල්ලි

කිසි වාසියක් නෑ හාං...
කිසි වාසියක් නෑ හාමතෙයි නැත්තම් අතේ සල්ලි
හිස් ටින් එකක් වාගෙයි අපේ මේ ජීවිතේ මල්ලි



ගායනය - එච්.ආර්.‍ ජෝතිපාල, ජේ.ඒ. මිල්ටන් පෙරේරා, මොහිදීන් බෙග්
සංගීතය - පී.එල්.ඒ. සෝමපාල
ගී පද - සිරිල් ඒ. සීලවිමල

දැන් මතකද චිත්‍රපටියෙන්

Read More

බේරෙනවද...??? මැරෙනවද...??? 2014

ලංකාවේ නෙවෙයි මුළු මහත් ලෝකයේම දේශපාලනය යනු “බලය” කේන්ද්‍ර කරගත් “මර්ධනය” අවිය කරගත් “දූෂණය” ව්‍යාප්ත කරගත් අධම සමාජ තන්ත්‍රයක්. එහි විපාක දේශපාලකයාටවත් වළක්වා ගන්නට අපහසු බව ඔවුන්ම අද කියනවා. සමාජ පරිශෝධනය (social reformation) සඳහා මාක්සියානු දේශපාලන දර්ශනය ආභාස කොටගත් බ්‍රෙෂ්ට්ගේ නාටය කරණ භාවිතාවන් පෙරට පැමිණෙන්නේ මෙවන් කාල වකවානුවක. එය අමන දේශපාලනය හා ඔවුනගේ තකතීරු දේශපාලන ව්‍යාපාර නිරුවත් කරලන්නක්. දෙවැනුව සමාජ පරිශෝධන වාදී නාට්‍ය කලාවක් ශ්‍රී ලංකාව තුළ ස්ථාපිත කරලීමටත් බ්‍රෙෂ්ට් මේ දිවයිනට වැදගත් වෙනවා. එහෙත් එය පුනරුදය කර ගත යුතුව තිබෙන්නේ අතීතයේදී බ්‍රෙෂ්ට් හා ඔහුගේ නාටය කරණ සංකල්ප අපගේ ප්‍රවීණයින් විසින් අගතිගාමී හා ප්‍රතිගාමී ලෙස කාබාසිනියා කර තිබෙන නිසයි.


අද ගම්දනව් පුරා පැතිර යන මාරාන්තික උවදුරක් බවට පත්ව තිබේ. මේ විදිහට රට වෙලාගත් මාරාන්තික උවදුරක් බවට ඩෙංගු උවදුර  පත්වන්නේ ඕපපාතිකව නොවේ. මේ උවදුරටත් මාරාන්තික ඩෙංගු උවදුර පතුරුවන මදුරුවන්ගේ ජීවන චක්‍රය පවත්වාගෙන යාමට උදව් කරන්නන් බවට අපි පත්ව සිටිමු.

වෙනත් විදිහකට කියතොත් ඩෙංගු උවදුර උග්‍රවීමට මූලික වරදකරුවන් බවට පත්ව ඇත්තේ අපද ඇතුළත් සමාජයම සිදුකරනු ලබන වැරැදි චර්යා රටාය. මේ ඩෙංගු රෝගය මර්දනය කරන ආකාරය රෝගයේ ලක්ෂණ හා එයට ප්‍රතිකාර කළ යුතු ආකාරය ගැන ලියැවුණු ලිපියකි.

l ඩෙංගු යනු කුමක්ද?

ඩෙංගු යනු වෛරසයක් මගින් බෝවන රෝගයක් වන අතර ආසාදිත මදුරුවකු වාහකයෙක් ලෙස ක්‍රියා කරයි. ඩෙංගු රෝගය බෝකරන වෛරස වර්ග 4ක් ඇති අතර මේවා ව්‍යුහයෙන් ඉතා සමාන වුවත් රෝගය බෝකිරීමේ දී වෙනස් වෛරසයන් වශයෙන් ක්‍රියා කරයි. (DEN 1, DEN 2, DEN 3, DEN4)

l ඩෙංගු රෝග ලක්ෂණ

ඩෙංගු වෛරසය ආසාදනය වීම නිසා සමහර පුද්ගලයන් රෝග ලක්ෂණ නොපෙන්නන් අතර සමහර දෙනෙක් තුළ ඩෙංගු උණ හෝ ඩෙංගු රක්තපාත උණ රෝග ලක්ෂණ ඇතිවිය හැක.

යම් රෝගියකුට තද උණට අමතරව පහත සඳහන් රෝග ලක්ෂණ කිහිපයක් හෝ ඇත්නම් ඩෙංගු රෝගියකු බවට සැක කළ යුතුය.

* හිසරදය සහ ඇස පිටුපස වේදනාව

* ඔක්කාරය සහ වමනය

* හන්දිවල හා පේශිවල වේදනාව

* ශරීරයේ රතු පැහැති පලු මතුවීම

* සමහර අවස්ථාවලදී ලේ ගැලීමේ තත්ත්වයන් (විදුරුමසෙන්, නාසයෙන්)

* ඩෙංගු රෝගය ජානපදික ප්‍රදේශයක වාසය කිරීම හෝ සංචාරය කිරීම

ඩෙංගු උණ සහිත රෝගියෙක් සාමාන්‍යයෙන් දින කිහිපයකදී රෝගයෙන් සම්පූර්ණ සුවය ලබන අතර ඩෙංගු රක්තපාත උණ වැළඳුන රෝගීන් තුළ වඩාත් සංකීර්ණ රෝග ලක්ෂණ දැක ගත හැක. ඩෙංගු රක්තපාත උණ රෝගීන් තුළ පහත දැක්වෙන පරිදි රෝගයේ අවදි කීපයක් දැක ගත හැකිය.

* උණ සහිත අවදිය

*අවදානම් අවදිය (තරලය කාන්දුවන අවස්ථාව)

*සුවවන අවදිය

උණ සහිත අවදිය

* කල් පවතින තද උණ (බොහෝ විට 40C (104F)

* මුහුණ ප්‍රදේශය රත් පැහැයක් ගැනීම, ඔක්කාරය, වමනය, තදබල හිස කැක්කුම, හන්දි හා පේශිවල වේදනාව

* ඇ‍‍ඟේ පලු දැමීම (50% - 80% ක රෝගීන් සංඛ්‍යාවකගේ දක්නට ලැබේ)

* සමහර රෝගීන්ගේ උගුරේ අසාදන තත්ත්වයන්, ඇස් රතුවීම හා පාචන තත්ත්වයන් ද දැකිය හැක

*සුළු ලේ ගැලීමේ තත්ත්වයන්

අවදානම් අවස්ථාව (තරලය කාන්දුවන අවස්ථාව)

* අවදානම් අවස්ථාව ආරම්භ වනුයේ තරලය කාන්දුවීම පටන් ගැනීමත් සමඟය (සාමාන්‍යයෙන් 3 වන දිනයෙන් පසු උණ බැස යනවාත් සමඟය.

* එම අවස්ථාව ඉතා කෙටිකාලීන වන අතර බොහෝ විට පැය 24 – 48 අතර කාලසීමාවකට සීමා වේ

* සමහර රෝගියෙක් උණ පවතිද්දීම අවදානම් අවදියට පත්විය හැක.

* මෙම අවස්ථාවේදී රුධිර නාලිකා බිත්තිවල සිදුවෙන පාරගම්‍යතාවයේ වෙනසක් හේතුවෙන් රුධිර නාලිකාවලින් පිටතට තරලය කාන්දු වීමක් සිදුවේ. මෙම තරලය බොහෝ විට උරස් හා උදර කුහරය තුළ එකතු වේ.

* මෙසේ තරලය පිටතට කාන්දු වීම තුළින් රුධිරය උකු බවට පත්වී අත්‍යවශ්‍ය ඉන්ද්‍රීයයන්වලට රුධිරය ගලා යෑම අඩපණ වේ.

* තරලය කාන්දු වීම දිගටම සිදුවීම තුලින් ඩෙංගු කම්පන තත්ත්වය ඇතිවිය හැක. මෙම තත්ත්වය ඇතිවීමට පෙර බොහෝ විට අවදානම් රෝග ලක්ෂණ පෙන්නුම් කරයි.

මරණ වැඩි සංඛ්‍යාවක් සිදුවන්නේ ඩෙංගු කම්පන තත්ත්වය නිසාය. නොනවත්වා පවතින වමනය සහ තදබල බඩේ කැක්කුම තරලය කාන්දු වීම ආරම්භ වීම පිළිබඳ ඉඟියක් ලබාදෙන අතර මෙම රෝග ලක්ෂණ රෝගියා කම්පන තත්ත්වය කරා යාමත් සමඟ තවදුරටත් වැඩිවේ.

l සුවවන අවස්ථාව

සුවවන අවස්ථාව, අවදානම් අවස්ථාව අවසානය සමඟ පටන් ගන්නා අතර සාමාන්‍යයෙන් දින 2 – 5 අතර කාලයක් පවතී.

*මේ අවස්ථාවේදී කාන්දු වූ තරලය නැවතත් රුධිරවාහිනී තුළට අවශෝෂණය වේ.

*රෝගියා සුවපත් භාවයක් පෙන්නුම් කරන අතර ආහාර රුචිය වැඩිවේ.

*සුව වීමේ පලු ඇතිවේ.

*ඇඟ පුර කැසීම ඇතිවන අතර මෙය අත්ලේ හා පතුල්වල වැඩි වශයෙන් දක්නට ලැබේ.

l රෝගය හඳුනා ගැනීම

රෝගයේ මූලික අවස්ථාවේ අනෙකුත් වෛරස රෝගවලින් වෙන්කර හඳුනා ගැනීම අපහසු වන අතර බොහෝ විට රෝගය හඳුනාගන්නේ සායනික රෝග ලක්ෂණවලිනි.

සැලකිය යුතු කරුණු

*උණ දින දෙකකට වඩා පවතී නම් සුදුසුකම් ලත් වෛද්‍යවරයෙක්ගේ උපදෙස් ලබා ගැනීම.

*උණ වැළඳී තෙවන දිනයේ දී සම්පූර්ණ ලේ පරීක්ෂාවක් සිදුකිරීම.

*අවදානම් රෝග ලක්ෂණ ඇතිවුවහොත් වහාම වෛද්‍ය ප්‍රතිකාර සඳහා යොමුවීම.

*රෝගී අවස්ථාවේ හොඳින් විවේක ගැනීම, රෝගියා කුමන හේතුවක් නිසාවත් වෙහෙසකර භාවයට පත් නොකිරීම.

* වැඩිපුර දියර වර්ග පානය කිරීමට සැලැස්වීම, කිරි, කැඳ, පලතුරු යුෂ, තැඹිලි, සුප් වර්ග මේ සඳහා වඩාත් යෝග්‍ය වේ. වතුර පමණක් පානය කිරීම සුදුසු නොවේ.

l ඩෙංගු මදුරුවා

ඊඩිස් වර්ගයේ ගැහැණු මදුරුවන් ජලය සහිත බඳුන්වල ජල මට්ටමට මදක් ඉහළින් තෙත සහිත පෘෂ්ටයේ බිත්තර අලවන අතර මෙම බිත්තර වතුර හා ගැටුන විට (වැස්ස නිසා හෝ වෙනත් ක්‍රමයකින් වතුර එකතුවීම මඟින්) බිත්තර පුපුරා කීට අවස්ථාව බවට පත්වේ.

මෙම මදුරු කීටයන් වතුරේ ඇති කාබනික ද්‍රව්‍ය හා කුඩා ක්ෂුද්‍ර ජීවීන් ආහාරයට ගනිමින් 1 වන කීට අවස්ථාවේ සිට 4 වන කීට අවස්ථාව වන තෙක් පැමිණේ. කීටයා අවශ්‍ය ශරීර ප්‍රමාණයට පැමිණීමෙන් හා අවශ්‍ය ශක්තිමත් භාවය ලබා ගැනීමෙන් අනතුරුව 4 වන කීට අවස්ථාවෙන් පිලවා අවස්ථාවට පත්වේ.

l ඩෙංගු මදුරුවන් බෝවිය හැකි ස්ථාන

1. ඉවතලන පහසුවෙන් දිරා ‍ෙනායන ද්‍රව්‍ය

ටයර්, පොලිතීන් දවටන, ප්ලාස්ටික් බඳුන්, මැටි මඳුන්, රිජි‍ෆෝම් පෙට්ටි, ඉවතලන බෝතල්, ටින්, සෙල්ලම් බඩු හා ඉවතලන අනෙකුත් ඝන අපද්‍රව්‍ය

2. වතුර රැඳිය හැකි පොල්කටු, තැඹිලි කෝම්බ,

3. වැහි ජලය රැඳිය හැකි ස්ථාන, අවහිර වූ වැහිපිහිලි සහ කොන්ක්‍රීට් වහල

4. ආවරණය නොකරන ලද ජලය එක්රැස් කරන බඳුන් හා ටැංකි

5. ජලය එක්රැස් විය හැකි ගෘහ අලංකරණය සඳහා යොදා ගන්නා විවිධ භාණ්ඩ හා විසිතුරු බඳුන්, පක්ෂි නාන තටාක, වතුර රැඳිය හැකි පිළිම, අත්හැර දැමූ පොකුණු, මල් පෝච්චි, මල් බඳුන්, මල් බඳුන් යට ඇති තැටි, මාළු නොමැති ටැංකි

පහත සඳහන් විශේෂිත කාණ්ඩවලට අයත් පුද්ගලයන් හට ඩෙංගු රෝගය වැළඳී ඇතැයි සැක කරන විට මුල් අවදියේදීම රෝහල්ගත කිරීම ඉතාමත්ම වැදගත්ය.

1. වයස අවුරුද්දට අඩු ළදරුවන්

2. වයස 70 වැඩි පුද්ගලයින්

3. අධි බර සහිත රෝගීන්

4. ගර්භිණී මව්වරුන්

5. නිදන්ගත රෝගවලින් පෙළෙන පුද්ගලයින් පිළිබඳව වඩාත් සැලකිලිමත් විය යුතුය. එවැනි පුද්ගලයන් මුල් අවදියේදීම රෝහල්ගත කිරීම වඩාත් සුදුසු වේ.

රෝග ලක්ෂණ පිළිබඳව දැනුවත් වීමෙන් සහ ඒවා ඉක්මනින් හඳුනාගෙන වෛද්‍යවරයා වෙත යොමුවීමෙන් සංකූලතා අවම කර ජීවිත හානිය වළක්වා ගත හැකිය.

ඩෙංගු රෝගීන් විමර්ශනය කිරීමේ දී රෝගීන් බහුතරයක් රෝගී තත්ත්වයට පත්ව ඇත්තේ තම නිවෙස හා අවට බෝ වූ මදුරුවන්ගෙන් හෝ පාසලේ දී හෝ රාජකාරි ස්ථානයේ දී බෝවූ මදුරුවන්ගෙන්ය.

ඒ තත්ත්වය වළක්වා ගැනීමට ප්‍රජා දායකත්වය අත්‍යාවශ්‍ය සාධකයකි.

එහිදී ඩෙංගු මදුරුවන් බෝවන ස්ථාන නිරන්තරව පරීක්ෂා කිරීමෙන් හා ඒවා විනාශ කිරීමෙන් ඩෙංගු රෝග ව්‍යාප්තිය අවම කරගත හැක.

ඩෙංගු මදුරුවාට හිතකර මෙවන් පරිසරයක් නිර්මාණය කර දෙන්නේ අප විසින්මය. ඩෙංගු මදුරුවන් බහුතරයක් බෝවෙන්නේ ඉවතලන භාජනවල එක්වන වතුර මගින්ය.

ඊට අමතරව පාවිච්චියට ගන්නා ජලය එක්රැස් කරන භාජන, ටයර්, අලංකාරයට සාදා ඇති පොකුණු වැනි දේ පිළිබඳවත් සැලකිලිමත් විය යුතුය.

ඩෙංගු මර්දනයට සහාය වීම ඔබ අප සැමගේ සාමුහික වගකීමකි. පසුතැවිල්ලට ඉඩ නොතබමු. ඩෙංගු මදුරුවා පරිසරයෙන් තුරන් කරමු.

ජනමාධ්‍ය හා තොරතුරු අමාත්‍යාංශයේ ප්‍රකාශනයකි

http://www.dinamina.lk/2014/07/11/_art.asp?fn=f1407113

Read More

ඔබ මේ දෑස් දුටුවාද?

ඔබ මේ දෑස් දුටුවාද?

අද්විතිය රණකාමියෙකු වූ මහා ඇලෙක්සැන්ඩරයන් ගැන ඔබ බෙ‍ාහෝ දේ කියවා ඇතිවාට සැක නැත. වයස අවුරුදු තිහක් වන විට, එවකට ලෝකයේ තිබූ විශාලතම අධිරාජ්‍ය ගොඩනගා ගැනීමට සමත් වූ මෙම ප්‍රතාපවත් පුද්ගලයාගේ හැඩරුව පිළිබඳව ‍යම් සේයාවක් ඔබේ සිතෙහි ඇඳී තිබෙනවාද විය හැකිය. එහෙත් ඔහුගේ දෑස දැන් ඔබේ මතකයට නඟාගත හැකිද?

ග්‍රීක ඉතිහාසඥයෙකු වූ ප්ලෙවියස් ඇරියනස් පවසන පරිදි මහා ඇලෙක්සැන්ඩරයන්ගේ එක් ඇසක් අඳුරු රාත්‍රිය මෙන් කළු පැහැයක් ගත් අතර අනෙක් ඇස දහවල් අහස මෙන් නිල් පැහැයක් ගත්තේය. පරිගණකය ඇසුරින් ගොඩනගාගත් තරුණ රූපයේ පෙනෙන පරිදි වර්ණ දෙකකින් යුත් ඔහුගේ දෙනෙත්, මුහුණට යම් ගුප්ත බවක් මෙන්ම ආකර්ෂණීය බවක් ද එකතු කරන්නට ඇත.

එදිනෙදා මගතො‍ෙට්දි හමුවන්නන් අතර මෙවැනි දෑසක් ඔබ දැක නැතත් මිනිසුන්ගේ ඇස්වල පැහැය පුළුල් පරාසයක් තුළ විසිරී ඇති බව ඔබ අත්දැකීමෙන් දන්නා දෙයකි. ඊට හේතුව සමේ වර්ණය මෙන්ම ඇසේ වර්ණය ද ජාන යුගල ගණනාවකින් පාලනය කිරීමයි. කෙසේ වෙතත් ඔබේ නෙත් විවිධ පැහැයෙන් බබළවන්නේ තාරාමණ්ඩලයෙහි (කළු ඉංගිරියාවෙහි) ඇති මෙලනින් ප්‍රමාණය හා එහි ඇති තන්තු තුළ ආලෝකය විසිරීයාමේ රටාවයි.

නිදසුන් වශයෙන් මෙලනින් ප්‍රමාණය අඩුවන විට ඇස නිල් පැහැයක් ගන්නා අතර, මෙලනින් ප්‍රමාණය වැඩිවීමේදී දුඹුරු හෝ කළු පැහැයන් ගනී. මෙලනින් ඇති නොවන අවස්ථා වලදී තාරාමණ්ඩලය රෝස පැහැයෙන් දිස්වේ. තාරාමණ්ඩලයේ කොලැජන් තන්තු ප්‍රමාණය වැඩිවන විට ඇසෙහි ඇතිවන්නේ අළු පැහැයකි.

සාමාන්‍යයෙන් එක් පුද්ගලයෙකුගේ නෙත් දෙක එකම පැහැය ගත්තත් සමහර සමාජවල ජනගහනයෙන් දහයකින් හය දෙනෙකුට පමණ එකිනෙකට වෙනස් වූ පාට ඇති ඇස් ලැබීමේ සම්භාවිතාවයක් ඇත. ලෝකයේ විසූ ප්‍රකට විද්‍යාඥයින්, ලේඛකයින්, සංගීතඥයින් හා බොහෝ නළු නිළියන්ට මෙවන් දෑස් හිමිව තිබූ අවස්ථාවන් ගැන වාර්තා වී තිබේ. තවත් ඇතැම් විටෙක එකම ඇසේ කළුඉංගිරියාව පාට කිහිපයකින් යුක්තවන අවස්ථාවන් ද ඇත්තේය. අපේ අවධානයට යොමු නොවුණත් මෙවැනි නෙත් ඇත්තන් අප අතර ද සිටිනවා විය හැකිය.

මෙසේ ඇස් දෙකේ තාරාමණ්ඩල එකිනෙකට වෙනස් වර්ණ ගැනීම හෝ එකම තාරාමණ්ඩලය වෙනස් වර්ණවලින් යුක්තවීම හඳුන්වන්නේ විෂමවර්ණකතාවය (Heterochromia) ලෙසය.

මිනිසුන්ගේ මෙය ජාන විකෘතියක් නිසා උපතේ සිටම පැවතිය හැකි අතර, ඇතැම්විට වෙනත් රෝගී තත්ත්වයන් නිසා හෝ හදිසි අනතුරක් නිසා හෝ ජීවිතයේ පසුකාලයේදී ද ඇති විය හැකිය. මේ හැරෙන්නට දීර්ඝ කාලයක් තිස්සේ යම් ඖෂධ වර්ග ඇසට දැමීම නිසා ද කළුඉංගිරියාවේ පාට වෙනස්වීමට ඉඩ ඇත.

සුවිශේෂි රෝගී අවස්ථාවලට හැර සාමාන්‍ය තත්ත්වයේදී නම් විෂම වර්ණකතාවය ඇසේ පෙනීම කෙරෙහි බලපෑමක් ඇති නොකරයි.

මේ අතර මිනිසුන්ගේ එකම ඇසෙහි කළුඉංගිරියා දෙකක් හෝ එකම කළුඉංගිරියාවේ කනිණිකා දෙකක් හෝ වැඩි ගණනක් පිහිටන අවස්ථා ගැන වාර්තා වී තිබේ. මේවා හුදෙක් අද්භූත ජනක කථාවලට පමණක් සීමාවූ දේ ලෙස සිතුණත්, සැබැවින්ම මිනිසුන්ට ඇති වන මෙම විකෘතිතාවය හඳුන්වන්නේ Polycoria ලෙසයි. නමුත් මෙය ඉතාමත්ම කලාතුරකින් දකින්නට ලැබෙන අක්ෂි අසාමාන්‍යතාවයකි.

මුනිදාස වංශපුර 

http://www.silumina.lk/2014/06/29/_art.asp?fn=as1406296

Read More

අලුත් වෙලත් නෑ වෙනස් වෙලත් නෑ ඒත් පරෙස්සම වැදගත්

ඩෙංගු ඩෙංගුමයි

අලුත් වෙලත් නෑ

වෙනස් වෙලත් නෑ

හැමෝම මිය යන්නේ නෑ

ඒත් පරෙස්සම වැදගත්
 

 විශේෂඥ වෛද්‍ය

ආරියසේන යූ. ගමගේ

පවතින වර්ෂාධික තත්ත්වයත් සමඟ දිවයිනේ ප්‍රදේශ රැසක ඩෙංගු රෝගය වසංගත තත්ත්වයට පත්වෙමින් තිබේ. මේ වන තෙක් නිශ්චිත ඖෂධ ප්‍රතිකාරයක් සොයා නොගත් ඩෙංගු රෝගයෙන් ආරක්ෂා වී සිටින්නේ කෙසේ ද? ඩෙංගු රෝගීන් රැක බලාගන්නේ කෙසේ ද? ඩෙංගු රෝගය සැම විටම මාරාන්තික ද? අද ඔබ දැනුම්වත් කෙරෙන්නේ ඒ පිළිබඳවයි.

ඩෙංගු උණ හඳුනාගත හැකි රෝග ලක්ෂණ මොනවා ද?

ඩෙංගු උණ මතු වන්නේ සාමාන්‍යයෙන් වෛරසය ශරීරයට ඇතුළු වී දින පහකට පමණ පසුවයි. බොහෝ විට එය එකවර ඇඟ වෙවුලා මතුවෙන උණක්. සිරුරට පණ නැති ගතිය, තද හිසරදය, ඇස් යට වේදනාව, විශේෂයෙන් ඇස් එහා මෙහා කරන විට හටගන්නා තද වේදනාව, කොන්දෙ කැක්කුම ප්‍රධාන රෝග ලක්ෂණ ලෙස හැඳින්විය හැකියි.

ඊට අමතරව රෝගියා පරීක්ෂා කිරීමේ දී සිරුරෙහි වසා ගැටිති ඉදිමී ඇති බවත්, සමෙහි රතු වන් පලු මතු වී ඇති බවත් පෙනේ. පළමුවෙන් අත් පාවල හටගන්නා රතු වන් පලු කඳ ප්‍රදේශයට පැතිර යයි. මුඛය හැර බැලු විට උඩු තල්ලේ රතු පැහැති ලප (Petechiae) ද දැකගත හැකි වෙයි.

දින 3 - 4 කදී උණ බැස යන අතර නැවතත් දිනකින් හෝ දෙකකින් ඉහත සඳහන් රෝග ලක්ෂණ ඇතිවිය හැකියි. විශේෂයෙන් උණ, හිසරදය සහ රතු පැහැ ලප නැවත මතුවිය හැකියි. ඇඟපතේ දැඩි වේදනාව, ඈලි මෑලි දුබල ගතිය, සහ කිසිවක් කිරීමට එපා වූ ගතිය (Depresion) ඇතිවිය හැකියි.

ඩෙංගු රෝග ලක්ෂණ එදාට වඩා අද වන විට වෙනස් වී ඇතැයි කියන කතාව ඇත්ත ද?

නෑ. ඩෙංගු රෝගයේ රෝග ලක්ෂණ එදා මෙන් ම අදටත් සමානයි. එහි වෙනසක් වන්නේ නෑ. සමහර අය ‘දැන් රෝගය අලුත්වෙලා’ ‘වෙනස් වෙලා’ යැයි විවිධ මත ඉදිරිපත් කළත් ඒවායේ විද්‍යාත්මක පදනමක් නෑ. රෝගීන් එවැනි මත නිසා අනවශ්‍ය ලෙස බිය වීම පමණයි සිදු වන්නේ. රෝග ලක්ෂණ නොව රෝග ලක්ෂණ හඳුනා ගැනීම සඳහා කරන පරීක්ෂණ නම් වෙනස් විය හැකියි.

ඩෙංගු රක්තපාත උණ ලෙස හැඳින්වෙන්නේ කුමක් ද?

ඩෙංගු රක්තපාතය ඩෙංගු උණේම තවත් ආකාරයක්. ඒ වගේ ම භයානක තත්ත්වයක්. විවිධ ඩෙංගු වෛරස් ප්‍රභේදයන් ගෙන් ඇති කරවන ඩෙංගු උණ පිට පිටම දෙතුන් වරක් ඇති වීමෙන් ඩෙංගු රක්තපාත උණ (Dengue Haemorrhagic Fever - DHF) වැලඳීමේ අවදානම වැඩි කුඩා දරුවන්ට සහ ළදරුවන්ට.

ඩෙංගු උණ සහ ඩෙංගු රක්තපාත උණ රෝග ලක්ෂණ එකිනෙකට වෙනස් ද?

ඩෙංගු රක්තපාත තත්ත්වයේ දී පළමුවෙන්ම උණ සහ සෙම්ප්‍රතිශ්‍යාව වැනි රෝග ලක්ෂණ මතුවිය හැකියි. පසුව එකවර උණ වැඩිවී හුස්ම ගැනීමේ අපහසුව, වමනය, ඔක්කාරය සහ උදරයේ වේදනාව වැනි තත්ත්ව ද ඇතිවීමට පුළුවන්. දින 6 ක් පමණ යන විට රෝගියා කම්පනයට පත් වී නහයෙන් සහ කනෙන් ලේ ගැලීමත්, සම තුළ ලේ ඉහිරී යාමත්, සිදු වේ.

කෝපි පැහැයට හුරු ලේ වමනය ද ඇති වේ. එම කම්පන තත්ත්වය හඳුන්වන්නේ ‘Dengus Shock Syndrome’ නමින්. රුධිරය කැටි ගැසීමේ ක්‍රියාවලිය දුර්වල වීමේ හේතුවෙන් ලේ ගැලීම සිදු වේ. රුධිර ප්ලාස්මාව රුධිර නාළ තුළින් පිටත පටකවලට ගලා යාමෙන් රෝගියා කම්පනයට පත්වී නාඩි දුර්වල වේ. සිරුර සිදුමැලි හෝ නිල්වන් පැහැ ගැනීමට ද පුළුවන්. එවැනි රෝගීන්ගේ අත් පා ශීතල වුවද ක‍ඳෙහි රස්නය රැඳී තිබෙයි.

සමහර ඩෙංගු රක්තපාත රෝගීන්ට නියුමෝනියාව හෝ හෘද පටකයේ ආසාදන (Myocarditis) ද ඇති වේ. ඩෙංගු රක්තපාත උණ නිසා කම්පනයට පත් වූ රෝගීන් මිය යාමට ද පුළුවන්. විශේෂයෙන් අවුරුද්දට අඩු කුඩා දරුවන්ට ඒ අවදානම වැඩියි.

ඩෙංගු රක්තපාත උණ නිසා හට ගන්නා කම්පනයට කළ හැකි ප්‍රතිකාර මොනවා ද?

ඒ සඳහා නිසි ප්‍රතිකාරයක් නැති වීමයි ඇති ප්‍රධානතම ගැටලුව. මේ වයිරසයට විරුද්ධව ක්‍රියා කරන ප්‍රතිජීවක ඖෂධ තවමත් සොයා ගන්නට හැකිවී නැත. ඒ වගේම ඩෙංගු උණ වැළැක්වීම සඳහා ප්‍රතිශක්තිකරණ වැක්සීනයක් ද සොයා ගෙන නැත. වෛද්‍ය ප්‍රතිකාර ලබා දෙන්නේ එසේත් නැතිනම් වෛද්‍යවරුන්ට කළ හැකි වන්නේ රෝගියා ගේ සිරුරෙන්ම රෝගය සුව වන තුරු ඇතිවන වෙනත් සංකූලතාවලින් ගැලවීමට ප්‍රතිකාර මඟින් උදවු කිරීම පමණයි. ඩෙංගු රෝගයට විශේෂිත ඖෂධ ප්‍රතිකාරයක් නැති නිසා වඩා වැදගත් වන්නේ රෝගය වළක්වා ගැනීමයි.

ඩෙංගු රෝගියෙක් රැක බලා ගත යුතු වන්නේ කෙසේ ද?

ඩෙංගු රෝගියෙක් සඳහා කෙරෙන ප්‍රතිකාරවලදී ප්‍රධාන වශයෙන් කරන්නේ රෝගයට වඩා රෝග ලක්ෂණවලට ප්‍රතිකාර කිරීමයි. එවැනි රෝගීන් කිසිඳු ආකාරයකින් හෝ සිරුර වෙහෙස නොකළ යුතුයි. ඇඳ විවේකය අත්‍යවශ්‍යයි. ඒ වගේම කිසිඳු හේතුවක් නිසා හෝ ඇස්ප්‍රීන් අඩංගු ඖෂධ රෝගියාට නොදිය යුතුයි. එමඟින් සිරුරේ රුධිර වහනය වැඩි වී රෝගී තත්ත්වය උත්සන්න විය හැකියි.

ඇස්ප්‍රීන් අඩංගු ඖෂධ මොනවාදැයි සාමාන්‍ය ජනතාවට හඳුනාගත නොහැකියි නේද?

සාමාන්‍යයෙන් වෛරස් උණකට ප්‍රතිකාර ගැනීම සඳහා යන ඩෙංගු යැයි සැක නොකරන රෝගියකුට වුවද වෛද්‍යවරු ඇස්ප්‍රින් අඩංගු ඖෂධ නිර්දේශ නොකරති. ඊට හේතුව ඇස්ප්‍රීන් රුධිරය කැටි ගැසීම අඩු කිරීමයි. ඒ නිසා සාමාන්‍ය වෛරස් උණක් සඳහා ප්‍රතිකාර ලබා ගන්නා රෝගියකු ඖෂධ හඳුනා ගැනීම අවශ්‍යම නොවුණත්, සුදුසු වෛද්‍යවරයකු ගෙන් පමණක් ප්‍රතිකාර ගැනීම අත්‍යවශ්‍යයි.

සාමාන්‍යයෙන් වෛරස් උණ රෝග සඳහා ඇස්ප්‍රීන් අඩංගු ඖෂධ නිර්දේශ නොකෙරුණ ද හෘද රෝගීන්ට එම ඖෂධය නිර්දේශ කෙරෙනවා. එවැනි රෝගියකුට ඩෙංගු ‍රක්තපාත උණ වැලඳුණේ නම් ඖෂධයේ බලපෑම නිසාම රෝග තත්ත්වය උත්සන්න වී මිය යාමට පුළුවන්. ඒ නිසා හෘදයාබාධ රෝගීන් ඩෙංගු රෝගය වැලඳුණේ නම් තමන් ගන්නා ප්‍රතිකාර පිළිබඳව වෛද්‍යවරයා දැනුම්වත් කිරීම අත්‍යවශ්‍යයි.

උණ සහ වේදනාවට ලබා දෙන පැරසිටමෝල් අඩංගු ඖෂධ ඩෙංගු රෝගීන්ට අහිතකර ද?

උණ සහ වේදනාවට පැරසිටමෝල් ඖෂධ ලබා දීමෙහි වරදක් නෑ. ඒත් නියමිත මාත්‍රාව නියමිත වාර ගණනකට පමණක් ලබා දිය යුතුයි.

පසුගිය දා අවුරුදු 45 ක පමණ කාන්තාවක් ඩෙංගු රෝගය වැලඳී මිය ගියා. එහෙත් ඇය මිය ගියේ රෝගය සුව වූ බවට වෛද්‍ය නිර්දේශය ලැබී රෝහලේ සිට නිවසට පැමිණි පළමු දිනයේමයි. මරණයට හේතුව නිව්මෝනියාව බව පසුව පැහැදිලි කෙරුණා. එසේ වන්නේ ඇයි?

සාමාන්‍යයෙන් ඩෙංගු රෝගියෙක් ප්‍රතිකාර ලබා ගන්නා අවස්ථාවේ දී එම රෝගියා වෙනත් රෝගයකින් පෙළෙනවා ද නැද්ද යන්න විමසා බැලීම වෛද්‍යවරයකුගේ වගකීමක්. ඒ වගේම දක්ෂ වෛද්‍යවරයකුට ඩෙංගු රෝගයත් නිව්මෝනියාවත් වෙන්කර හඳුනා ගැනීමට පුළුවන්. එමෙන් ම ඩෙංගු රෝගියකුට රෝගය සුව වීමෙන් පසුව නිව්මෝනියාව වැලඳීමට වුවද ඉඩකඩ ඇති නිසා රෝගය පරීක්ෂා කර බලා ප්‍රතිකාර ලබාදිය යුතුයි.

විශේෂයෙන් ඩෙංගු රෝගීන් බහුල ප්‍රදේශයක කෙනෙක් උණ වැලඳී තමන්ටත් ඩෙංගු යැයි සැක කරමින් රෝහල්ගත විය හැකියි. මෙහිදී රෝගියාට උණ වැලඳී ඇත්තේ වෙනත් රෝගයක් නිසා ද විය හැකියි. රෝගය නිශ්චිතව හඳුනාගෙන ප්‍රතිකාර නොකළේ නම් ඩෙංගු නොවැලඳුණ ද ඇති වූ අනෙක් රෝගය බරපතළ වීමෙන් රෝගියා මිය යා හැකියි. ඒ නිසා ඩෙංගු උණ යැයි ඔප්පු වුවද, නොවූවද රෝගියා ගැන අවධානයෙන් සිටීම වැදගත්.

ඩෙංගු උණ වැලඳී එහෙත් සාමාන්‍ය උණ මිස වෙනත් කිසිඳු රෝග ලක්ෂණයක් පෙන්නුම් නොකර කෙනෙක් මිය යන්නට පුළුවන් ද?

කිසිසේත්ම නොහැකියි. ඩෙංගු උණ වැලඳුණ කෙනකුගේ එම රෝග ලක්ෂණ පෙන්නුම් නොකර මිය යන්නේ නෑ. එහෙත් සමහර අයට ඩෙංගු රෝගය වැලඳී, ඇතැම් විට නොදැනුම්වත්වම වැලඳී සුව වීමට ද පුළුවන්. අමාරු වන්නේ ඩෙංගු රක්තපාත උණ හෝ කම්පන තත්ත්වයට පත්වූයේ නම් පමණයි.

ඩෙංගු රෝගය සුව වී නිවසට ගිය කෙනෙක් කාලයක් යනතුරු ශරීරය වෙහෙස වීම අහිතකර ද?

ඩෙංගු උණෙන් හැමෝම මිය යන්නේ නැති බව, එනම් එම රෝගය සැම විටම මාරාන්තික වන්නේ නැති බව ජනතාව දැන සිටීම වැදගත්. අනවශ්‍ය ලෙස රෝගයට බිය වීම සුදුසු නොවීම ඊට හේතුවයි. ඩෙංගු උණ රෝගය සුව වූ කෙනෙක් සිරුරට වෙහෙසකර බවක් නොදැනේ නම්, ආහාර අරුචියක් නොවේ නම්, සාමාන්‍ය වැඩපළවල නිරත වීම ප්‍රශ්නයක් නොවේ. ඇඟට පණ නැති ගතියක් දැනේ නම්, විවේක ගැනීම කළ යුතුයි.

ඩෙංගු මදුරුවන් දෂ්ට කරන හැම කෙනෙක් ම රෝගයට ගොදුරු වෙනවා ද?

නෑ. සෞඛ්‍ය සම්පන්න අයට රෝගය වැලඳීමේ අවදානම අඩුයි. ඇතැම් අයට තමන් නොදැනුවත්වම රෝගය වැලඳී සුව අතට හැරෙනවා. විශේෂයෙන් ලේ අඩු, රක්ත හීනතාවයෙන් පෙළෙන අය, මන්ද පෝෂණය ඇති අය වගේම බර අඩු හා නිසි පරිදි ආහාරපාන (පෝෂණ ගුණයෙන් යුතු) නොගන්නා අය රෝගයට ගොදුරු වීමේ අවදානම වැඩියි.

ඩෙංගු රෝගියකුට දිය යුතු ආහාරපාන මොනවා ද?

දිරවීමට පහසු ආහාර ලබාදීම ඉතා වැදගත්. විශේෂයෙන් ඩෙංගු වැනි රෝගවල දී ශරීර ශක්තිය අත්‍යවශ්‍යයි. ඒ නිසා ශක්තිජනක ආහාර ලබාදීම වැදගත්. රෝගියා ආහාර ප්‍රතික්ෂේප කරනවා නම් ඔවුන් ප්‍රිය කරන, ඉල්ලන ආහාර ලබාදීම වරදක් නොවේ.

ඩෙංගු රෝගීන්ට දියරමය ආහාර, එසේත් නැතිනම් පාන වර්ග වැඩිපුර ලබා දීම සුදුසු ද?

පාන වර්ග වුවද අවශ්‍ය ප්‍රමාණයට වඩා ලබා දීම අහතිකර විය හැකියි. අනවශ්‍ය ලෙස පාන වර්ග ලබා දීමෙන් රුධිර නාළවල වතුර එළියට යා හැකියි. එය සුදුසු නොවේ. වතුර බීම සහ මුත්‍රා යාම අධ්‍යයනය කරමින්, (බොන ජල ප්‍රමාණයට අනුව මුත්‍රා පිට වනවා නම්) රෝගියාට පිපාසය දැනෙනවා නම් පාන වර්ග ලබාදීමේ ගැටලුවක් නොවෙයි. එවැනි අවස්ථාවක දී ඔබගේ වෛද්‍යවරයාගේ උපදෙස් ලැබීම වැදගත්.

සේලයින් වැඩිපුර දීමත් ඩෙංගු උණ රෝගීන්ට අහිතකර ද?

ඩෙංගු රෝගියෙක් රෝහලට ඇතුළු කළ පසු සේලයින් 5%, ඩෙක්ස්ට්‍රොස් වැනි දේ ලබා දීමට සිදු වෙනවා. එහෙත් නියමිත ප්‍රමාණයන් ගෙන් පමණක් ඒවා ලබා දිය යුතු වන්නේ වැඩිපුර දීම ශරීරයට අහිතකර වන නිසයි. ඒ හැර අධික ලෙස රුධිර වහනය සහ කම්පනයට පත් වී සිටින අයට කල්ගත නොවූ රුධිර ප්ලාස්මාව සහ රුධිර පට්ටිකා සහිත අලුත් රුධිරය ශිරාගත කරනු ලබනවා.

ඩෙංගු රෝගියකුට ගස්ලබු කිරි ලබාදීමෙන් රුධිර පට්ටිකා නැංවිය හැකියි කියන කතාවේ සත්‍යතාවක් තිබෙනවා ද?

එහි විද්‍යාත්මක සත්‍යයක් නෑ.

උණ රෝගියකු ඩෙංගු රෝගියකු බව තීරණය කරන්නේ කෙසේ ද?

රෝගියාගේ රුධිරයේ ඇති රුධිර පට්ටිකා ප්‍රමාණය (Platelet Count) ඝන මි. මි. 100,000 ට අඩු නම් හෝ PCV හෙවත් Pack Cell Volume 10% - 20% ට වඩා වැඩි වූ විට ඩෙංගු උණ වැලඳී ඇතැයි සැක කරනවා.

රුධිර සාම්පල පරීක්ෂා කිරීමෙන් වයිරසය හෝ වයිරසයට විරුද්ධව රුධිරයේ නිපදවෙන ප්‍රතිදේහ හඳුනාගත හැකියි.

ඩෙංගු උණ වරක් හැදුණොත් නැවත හැදෙන්නට පුළුවන් ද?

ඩෙංගු වයිරස් විශේෂ හතරක් තිබෙනවා. එක් විශේෂයක් නිසා ඇති වූ ආසාදනයෙන් අනෙක් විශේෂ සඳහා ප්‍රතිශක්තියක් ඇති වන්නේ නෑ. එම නිසා රෝගය වැලඳුණ කෙනෙකුට නැවත නැවත ඩෙංගු රෝගය වැලඳිය හැකියි.

රෝගයට ප්‍රතිකාර සෙවීමට වඩා ඩෙංගු වැලඳීමට පෙර වළක්වා ගැනීම වැදගත් බව ඔබ කීවා. ඒ සඳහා ජනතාවගේ කාර්යභාරය කෙබඳු ද?

ඩෙංගු මදුරුවන් බෝවෙන ස්ථාන පරිසරයෙන් ඉවත් කිරීම සමාජයේ පොදු වගකීමයි. ඒ සඳහා මහජන සෞඛ්‍ය පරීක්ෂකවරුන් ලබා දෙන උපදෙස් පිළිපැදිය යුතුයි. තමන්ගේ නිවස අවට පමණක් පිරිසුදුව තබාගෙන ටින් බෙලෙක්ක, ප්ලාස්ටික් බෝතල් මහ පාරට හෝ අල්ලපු හිස් ඉඩමට ගිහින් දමනවා නම් ඒ තැනැත්තාට වුවද ඩෙංගු මදුරුවාගෙන් බේරී සිටිය නොහැකියි.

වි‍ශේෂයෙන් ඩෙංගු උණ පවතින ප්‍රදේශවල සිටින අය උණක් හටගත් විට ඇස්ප්‍රීන් අඩංගු ඖෂධ ගැනීමෙන් වැළකිය යුතුයි. ඒ වගේම ඕනෑම කෙනෙක් ඉහත කී රෝග ලක්ෂණ මතු වන්නේ නම් වහාම සුදුසුකම් ලත් වෛද්‍යවරයකු වෙත රෝගියා රැගෙන යා යුතුයි.

සාකච්ඡා කෙළේ - රමණී සුබසිංහ

ramaniksu@yahoo.com

http://silumina.lk/2014/06/08/_art.asp?fn=am1406081

Read More

බෞද්ධ ගේය පද රචනා විමසීමක්

මහාචාර්ය පූජ්‍ය පාතේගම ඤාණිස්සර හිමි

බුදුරජාණන් වහන්සේගේ ශ්‍රී සම්බුද්ධ ශරීර සොබාව සාමාන්‍ය මිනිසාට වඩා වෙනස් වූවකි. උන්වහන්සේගේ ශරීරය සාමාන්‍ය මිනිස් ශරීර ඉක්මවා ගිය මහා පුරුෂ ලක්ෂණවලින් යුක්ත ය. ශ්‍රී සම්බුද්ධ ශරීරය තිස් දෙකක් වූ මහා පුරුෂ ලක්ෂණවලින් හා අසීති අනුව්‍යංජනවලින් යුක්ත ය. උන්වහන්සේ කථා කරන විට කටහඬෙහි සුවිශේෂ ලක්ෂණ පිහිටියේ ය. සමාජය වෙනුවෙන් කළ උදාර සේවය බොහෝ ජනතා හිතසුව පිණිස පැවතියේ ය.

මෙකී ස්වභාවය නිසා ම පද්‍ය රචකයන් කල්පනා කරනු ලැබුවේ පද්‍ය රචනා කරනු ලබන්නේනම් ඒ තුළ තිබුය යුත්තේ බුදු ගුණ පමණකි ය කියා ය. “පෙදෙන් බුදුසිරිත ඈ” යනුවෙන් කියූයේ එයයි. එසේම යම් කිසි ප්‍රස්තුතයක් වර්ණනා කරනු ලබන්නේ ද එසේ කරන්නා වූ ඒ ප්‍රස්තුතය බුදු ගුණ ම විය යුතු ය. වැනීම, තැනීම, දීම, දිනීම යන අංශ පිළිබඳ සලකන විට බෞද්ධ සංස්කෘතියක හැදුණු වැඩුණු කෙනකු නම් කෙසේ විය යුතු දැයි චිරන්තන කවියා කීවේ ය. ඒ අනුව

වැණුවානම් බුදු ගුණ වැණුවාමයි
තැනුවානම් තම සිත තැනුවාමය
දෙනුවානම් දන් පින් දෙනුවාමය
දිනුවානම් පරලොව දිනුවාමය

යනුවෙන් කීවේ ය. වර්ණනා කිරීමක් කරනවානම් ඒ බුදු ගුණ පිළිබඳ ව විය යුතුයි තනා සකස් කොට ගනු ලබන්නේ නම් ඒ සිත තනා ගැන්ම විය යුතුය. යමක් දෙනවානම් විය යුත්තේ දන් දීම හා පින් දීම ය. යමෙක් දිනන්නේ නම් වැදගත් වන්නේ පරලොව දිනීම ය.

පැරණි කවියා විසින් බෞද්ධ සන්නිවේදනය ජනතාවට ලබා දෙනු ලැබුවේ මෙපරිදි ය. ඒ ඔස්සේ සියලු බෞද්ධ ප්‍රජාව කටයුතු කරන්නට විය. චිරන්තන සාහිත්‍ය නිර්මාණ ආරම්භයේ දී ම බුදුන් වැඳීම තෙරුවන් වැඳීම දැකිය හැකිය. වීදාගම මෛත්‍රිය හිමියන් රචනා කරනු ලැබු ලෝවැඩ සඟරාව ඇරැඹෙන්නේ යට දැක්වෙන කවියෙන් ය.

සෙත් සිරි දෙන මහ ගුණ මුහු දාණන්
සත් හට වන බව දුකට වෙදාණන්
සිත් ගණ දුරු දුර ලන මුනිදාණන්
සිත් සතොසින් නම දිම් මුනිදාණන්

බුදු රජාණන් වහන්සේගේ අනන්ත අප්‍රමාණ බුදු ගුණ මහිමය මහා සාගරයේ ජලය හා සමානයි, මහ පොළවේ වැලිකැට හා සමාන ය සත්ත්වයාගේ භව දුකට වෙදැදුරුණන් වූයේ උන්වහන්සේ ය. මිසදිටුවන්ගේ මිථ්‍යා අන්ධකාරය දුරු කරවන වෙදැදුරු උන්වහන්සේ ය. එසේ වූ බුදුරජාණන් වහන්සේ බැතියෙන් වඳිමි. ගුත්තිල කාව්‍යය, සුභාෂිතය, බුදුගුණ අලංකාරය, ආදි වූ සෑම නිර්මාණ ග්‍රන්ථයකම මෙකී සාධනීය ලක්ෂණ දැකිය හැකිය. පද්‍ය කෘති පමණක් නොව ගද්‍ය ග්‍රන්ථවල පවා මෙය දැකිය හැකිය. යම් සද්කාර්යයක් ආරම්භ කරන විට තෙරුවන් වැඳ පුදාගෙන ආශීර්වාද ලබා ගැනීම අද ඊයේ ඇති වූවක් නොවේ. එය ඈත අතීතයේ සිට පැවත එන්නකි.

ක්‍රි. ව. 1870 දශකයේ පමණ කාව්‍ය සම්ප්‍රදායට නවාංගයක් එකතු වනු දැකිය හැකිය. එනම්; ගීතය නමැති සාහිත්‍ය සංකල්පයයි. සංගීතය ද සමඟ ඉමිහිරි තනුවකට ගැයෙන මෙය දෘශ්‍ය ගෝචර ස්වභාවයෙන් මිදී ශ්‍රව්‍ය ගෝචර බවක් පෙන්නුම් කරයි. ගී කාව්‍ය යුගය විවිධ ආකාරයෙන් පෝෂණය ලැබුවේ පදවැල, සංගීතය හා කටහඬ එකතු වීමෙනි. මේ ක්‍රමය ඉතා ඉක්මනින් ශ්‍රාවකයන් අතර ජනපි‍්‍රය වන්නට විය. බුදු හිමියන් සැමරීම පිණිස ද ගීත නිර්මාණය විය. මුල් වකවානුවල නාඩගම්, නූර්ති ග්‍රැමෆෝන් චිත්‍රපට ආදියේ ආධාර ලබමින් පෝෂණය වී පසුව එය ගුවන්විදුලිය, වේදිකාව, කැසට්පටිය, සංයුක්ත තැටිය ආදි විවිධ මාධ්‍ය ඔස්සේ ශ්‍රාවකයා වෙතට ප්‍රවේශ වන්නට විය.

බුදුගුණ ගීත සාහිත්‍යය පිළිබඳ ව කරනු ලබන විමසීමකදී ඒවා අංශ කීපයකලා අවධානයට ලක් කළ හැකි ආකාරය පෙනේ. එනම්; බුදුරජාණන් වහන්සේගේ රූපකාය වර්ණනා කරනු ලබන ගීත, බුදුරජාණන් වහන්සේගේ ධර්මකාය වර්ණනා කරනු ලබන ගීත, බෞද්ධ පදනමක සිට ගැයෙන විරෝධාකල්ප ගීත, භක්තිය හා ආගමික ආශ්‍රය පළ කරන ගීත වශයෙනි. ප්‍රාරම්භක යුගයේ සිට වර්තමානය දක්වා විකාශනය වූ බෞද්ධ ගීත සාහිත්‍යය පිළිබඳ ව විමසා බැලීමේදී දක්නට ලැබෙන්නේ භක්තිය හා ආගමික ආශ්‍රය පළ කරන ගීත බහුල වශයෙන් මුල් යුගවල රචනා වී ඇති බවයි. බුද්ධාලම්බන පී‍්‍රතිය ඇතිකර ගැනීම මූලික කරගෙන ඒ ගීත රචනා වී තිබේ.

1870 දශකයේ ගීත රචනා කරනු ලැබු අය අතර ‘පිලිප්පු සිඤ්ඤො නමැති රචකයාට හිමි වන්නේ සුවිශේෂ ස්ථානයකි. ඔහුගේ රචනයක් ලෙස යට දැක්වෙන ගීතය දැක්විය හැකිය. බුදු හිමියන් කෙරෙහි ගෞරව දැක්විය යුතු බව හා බුද්ධත්වය ලැබීමේදී උන්වහන්සේ මාර සෙනග පරදා කළ වික්‍රමය මෙහිදී දක්වා තිබේ. එහි පද පෙළ මෙසේ ය.

නිමල මොක්ෂ ප්‍රකාශ තෛ‍්‍රලෝක්‍ය
බඹළුවා බුදු ඒ සුගතින්දු
ප්‍රබල සතුරු මාර ප්‍රාක්‍රම, ජයගත් ඒ බල සමිඳු
සතුරුමාර සෙනගට කිපි - හෙණ හඬ
ගුගුරණ විලසට
ගිනිජල් මාලා සහශ්‍ර - හරිමින්
කට හැර ගොරවන

සිරිසඟබෝ නාට්‍යය රචනා වූයේ ක්‍රි. ව. 1903 දී පමණය. එය ජෝන් ද සිල්වා ශූරීන්ගේ රචනයක් වන අතර එහි ගැයුණු ගීත ද ඔහුම රචනා කරනු ලැබීය. බුදුගුණ හා බුදු බැතිය වඩවන අයුරින් සැකසුනු මේ ගීතය බෞද්ධ ගීත අතර සුවිශේෂ වෙයි. මෙය නූර්ති ගීතයකි. නාට්‍යයේ චරිත රඟපෑ සංඝතිස්ස, සංඝබෝධි සහ ගෝඨාභය නමැති සහෝදර කුමාරවරුන් තිදෙනා අනාවැකි කිව හැකි අන්ධ බමුණකු අසලින් වැටී ඇති මාවතක යමින් සිටියි. එම අවස්ථාවේ අනුරාධපුර නගරයේ ශ්‍රී විභූතිය පළ කෙරෙන මෙම යට දැක්වෙන ගීතය ද ගායනා කරති. ශතවර්ෂාධික කාලයක් තිස්සේ ජන මනසේ ජනපි‍්‍රය භාවයට පැමිණි මේ ගීතය වර්තමානයේ ද එසේ ම පවතී.

දන්නෝ බුදුන්ගේ ශි‍්‍ර ධර්මස්ඛන්ධා
පේවී රකිති සොද සීලෙ නිබන්දා
ක්ලේෂ නස්නාවූ භික්‍ෂු ඇත්තේය බොහෝ
රහතුන් නිවස්නා පායා ප්‍රකාශේ...

බුදු ගුණ ගීත රචනයෙහි දී ඇතැම් රචකයෝ බුදු ගුණ හා බොදු බැතිය වඩවන අනෙකුත් ආගමික සිද්ධස්ථාන ගැන ගී ලියූහ. ලුම්බිනි බුද්ධගයා කුසිනාරා වැනි බුදු තෙමඟුල සිදුවූ ස්ථානද යොදා ගෙන තිබේ. ග්‍රැමර්ෆොන් ගීතයක් ලෙස දැක්වෙන මතු සඳහන් ගීතය බාල තරුණ මහලු බේදයකින් තොරව අද පවා ජනපි‍්‍රය තලයේ පවතින එකකි. ”සිරි බුද්ධගයා විහාරේ” නම් වූ මේ ගීතය සී. වීරසේකර නම් රචකයා ලියූවකි. එච්.ඩබ්. රූපසිංහ සහ රුක්මණී දේවි නැමති ප්‍රවීණ ශිල්පීන් විසින් ගායනා කරනු ලැබූ අතර ඉන්දියානු තනුවකට ගැයී තිබේ. 1940 පමණ ශ්‍රාවකයන් අතරට පැමිණ මෙහි පද පෙළ මෙසේ ය.

සිරි බුද්ධගයා විහාරේ -
වඳිනෙමු මොක්‍ෂ පතාලා
ශාක්‍ය තිලෝනා වැඩ සිටි එදිනා
මරඟනන් පරදාලා - සිරි බුද්ධ ගයා විහාරේ

බුදුගුණ හා බුද්ධාලම්බන පී‍්‍රතිය ඇති වන අයුරින් සිහි කෙරෙන අනෙකුත් පූජනීය ස්ථාන පිළිබඳ සිහිපත් කෙරෙන මේ ගීතය එදා මෛදා තුර අතිශයින් ම ජනපි‍්‍රය ගීතයක් බවට පත්වී තිබේ. සාමාන්‍යයෙන් බාල මහලු, තරුණ ආදී කිසිදු බේදයකින් තොර ව සැකසුණු මෙය දේව ගනයෙන් ආරම්භ වූ යහපත් ගීතයක් ලෙස සැලකේ. වර්තමානයේ ලියවුණු බොදු ගුණ ගීත පරදා ජනතා රුචිකත්වය මේ කෙරෙහි ඇදී යයි.

බොදු බැතිය වඩවන ගීත අතර සිරිපාදය පිළිබඳ ව යූ.ඩී. පෙරේරා ලියූ ග්‍රේටා ජෙනට් ද සිල්වා ඇතුළු පිරිස ගායනා කරන ග්‍රැමර්ෆෝන් යුගය සිහිකර වන එකකි. මේ ගීතය තුළ සිරි සමනොළ කඳු තරණයේහි හමුවන සුවිශේෂ ස්ථාන ද දක්නට ලැබේ. එනම්; ලීණි පොල් හා ඒ අසල ඇති අම්බලම, ධර්මරාජ ගල, ගෙත්තම් පාන, සීත ගඟුල හැරමිටි පාන, ආදී ස්ථාන වෙයි. ගීතයේ පද පෙළ මෙසේ ය.

මුනි නන්දන සිරි පාද වඳිමි
සමනොළ කන්දේ
විහිදෙන මොක්‍ෂ සුගන්දේ
ශාන්තී කරුණා ගුණ ආනන්දේ
ලැබීලා - පිහිටෙන් සුමන සුරින්දේ
සිත් පැහැදී

මුල් යුගයේ ගීත පිළිබඳ ව අධ්‍යයනය කර බලද්දී දක්නට ලැබෙන කාරණය වන්නේ බුදු ගුණ පමණක් නොව බුදුහිමියන් ගේ පහස ලැබූ ස්ථාන පවා බෞද්ධ ප්‍රබෝධයෙන් යුතුව වර්ණනා කරනු ලැබ ඇති බවයි. පූජනීය ස්ථාන වර්ණනා කිරීම ද බුද්ධා ලම්බන පී‍්‍රතිය වඩවන කරුණක් විය. නුර්ති ග්‍රැමර්ෆෝන් ගී පමණක් නොව පැරණි සෑම චිත්‍රපටියක ම පාහේ බුදුගුණ ගීත එකක් හෝ ඊට වැඩි ගණනක් දක්නට ලැබිණ.

මුල් යුගවල බෞද්ධ ගීත පිළිබඳ ව කරනු ලබන අධ්‍යයනයකදී දක්නට ලැබෙන ප්‍රධාන කාර්යය වන්නේ අන්‍යාගමික සංගීත ශිල්පීන් ගායක ගායිකාවන් මෙන් ම ගීත රචකයන් ද එකී කාර්යය සිදුකරනු ලැබ ඇති බවයි. ඒ අතර ගායනය හා සංගීත නිර්මාණය සුවිශේෂ වෙයි. ශිල්පියා සිය ආගමික නිර්මාණය කිරීමට වඩා බෞද්ධාගමික අදහස්වලට ප්‍රමුඛ ස්ථානය දීමට කටයුතු කරනු ලැබ ඇත්තේ කුමන කරුණක් නිසාද යන්න විමසා බැලීම කළ යුතුය. නිර්මාණ ශිල්පීන් අදහස් කරනු ලැබ ඇත්තේ ශ්‍රී ලාංකික සමාජයේ බහුතරය වඩාත් පිළිගත් ආගම පිළිබඳ ව විය යුතුය. නිර්මාණය රස විඳිනු ලබන්නේ බෞද්ධයන් වන නිසාම එබඳු ගීත එළි දැක්වීම වඩාත් සුදුසු ලෙස කල්පනා කරන්නට ඇත.

මුල් යුගයේ බෞද්ධ ගීතවල අන්තර්ගතය විමසා බැලීමේදී දැකිය හැකි සුවිශේෂී ලක්‍ෂණය වන්නේ බුද්ධකාය පිළිබඳ වර්ණනා කිරීමට වඩා බුද්ධාගම ඇසුරින් සකස්වූ බෞද්ධ සමාජය පිළිබඳ අදහස් ප්‍රකාශ කිරීමට වැඩි තැනක් දක්වා තිබෙන බවයි. සිරි බුද්ධ ගයා විහාරේ, සමනල කන්ද, තනිවයි උපන්නේ, වෙසතුර, මහ රජිදා ආදී ගීත තුළින් ඒ බව පැහැදිලි වෙයි.

”රොඩී කෙල්ල” නැමති ටීටර් ගීයක් ලෙස පතළ “කවාලා විළඳ ජාති” නැමති ගීතයෙහි අන්තර්ගත ව ඇත්තේ බෞද්ධාගමික අදහස්ය. 1936 වර්ෂයේදී ගායනය වූ මේ ගීතය ඉනදියානු තනුවක් සඳහා නිර්මාණය කරනු ලැබූවකි. “පතාලා ලොවතුරා ශි‍්‍ර බුද්ධ රාජ්ජේ” යනුවෙන් වූ ගීතයක් ද ග්‍රැමර්ෆෝන් ගීත අතර වෙයි. එයද පෙරකී ඉන්දියානු තනුවට අනුව රචනා වූවකි. ගීතයේ පද පෙළ මෙසේය.

කවාලා විළඳ ජාති
ඇති කළත් රන් කූඩුවේ ගිරවා
දමාලා යන්නෙ ඉගිලී
රැව්දිදී ලබනා සෙවණ සැපතා...

සිරිසේන විමලවීරයන් රචනා කරනු ලැබූ මේ ගීතය කලින් කල බොහෝ දෙනා ගායනා කරනු ලැබූහ. බුදු දහමෙහි උගන්වන අටලෝදහම සමසේ විඳදරා ගත යුතු බව ගීතයෙන් අවධාරණය කරනු ලබයි.

බෞද්ධ ගීත පිළිබඳ ව කරනු ලබන අධ්‍යයනයකදී හමුවන විශේෂ අවස්ථාවක් හැටියට ප්‍රකට චරිත පිළිබඳ ලියැවුණු ගීත දැක්විය හැකි ය. ඒ අතර “සෝමාදේවි සහ තොටගමුවේ ශි‍්‍ර රාහුල හිමි පිළිබඳ ව ලියවුණු ගීත දැක්විය හැකිය. බෞද්ධ ගීත අතර මුල් යුගවල ගැයුණු මෙම ගීත මිනිසුන් අතර අතිශයින් ජනපි‍්‍රය වී ගියේ ය.

මතු දැක්වෙන ගීතය සෝමාදේවිය පිළිබඳ ව රචනා වූවකි. මෙහි පද රචනය යූ.ඩී. පෙරේරා ය. 1940 දශකයේ නිර්මාණයක් ලෙස සැලකෙන මෙය ග්‍රැමර්ෆෝන් ගීතයකි. ගායනය කරනු ලැබුවේ ද යූ.ඩී. පෙරේරා ඇතුළු පිරිසයි. එහි පද පෙළ මෙසේ ය.

රුවින් සුරම් ගුණෙන් උතුම්
සෝමා දේවී
සෝමා දේවී ඒ ප්‍රේම පි‍්‍රයාවී

සෝමා දේවිය කළ උදාර ක්‍රියාව ගීතයෙන් කියවෙයි. රට දැය වෙනුවෙන් රජු කළ සටනට සෝමා දේවියගේ කැපවීම අගේ කොට දක්වා තිබේ.

ග්‍රැමර්ෆෝන් ගීතයක් ලෙස ප්‍රකට එම්.ඩබ්.එන්.එස්. විජයසිරි රචනා කළ එච්.ඩබ්. රූපසිංහ ගායනා කළ “ශ්‍රී රාහුල හිමිගේ නාමේ” නැමති ගීතයද 1940 දශකය තුළ මුල් වරට ගැයුනු ගීතයකි. ෂඩ් භාෂා පරමේෂ්වර තොටගමුවේ ශි‍්‍ර රාහුල හිමියන්ගේ උදාරත්වය ගීතයෙන් වර්ණනාවට ලක් කරනු ලබයි. එහි පද පෙළ මෙසේ ය.

ශි‍්‍ර රාහුල හිමිගේ නාමේ
සුදිලේ ලංකා ඉතිහාසේ හී
ශි‍්‍ර රාහුල හිමිගේ නාමේ...

1940 දශකයට අයත් බෞද්ධාගමික අදහස් රැගත් ගීතයක් ලෙස වින්සන්ට් සෝමපාල රචනා කරනු ලැබූ එච්.ඩබ්. රූපසිංහ සහ කෝකිලදේවී වීරතුංග ගායනා කළ මවුපිය ආදී සොඳුරු සමාජේ යන්න දැක්විය හැකිය. මෙය ග්‍රැමර්ෆෝන් ගීතයකි. එහි පද පෙළ මෙසේ ය.

මවු පිය ආදී සොඳුරු සමාජේ
කුල දෙටුවන් සෑමා
යෝග්‍ය වූ කාලේ නොමද ප්‍රෙමෙහී
ගෞරවයෙන් පිදුමා කළ යුතු වේ....

ගීතයෙන් කියවෙන්නේ මවුපියන් සහ කුලදෙටුවන්ට සැලකීම වැඳුම් පිදුම් කිරීම කළ යුතු බවය.

ආචාර්ය පණ්ඩිත් අමරදේවයන් විසින් පද රචනා කොට සංගීත නිර්මාණය කර ගායනා කරනුලැබූ ‘වඳිමු සුගත සාක්‍යසිංහ’ නැමති ගීතය ද 1940 දශකයට අයත් වූවක් ලෙස සැලකේ. ගීතයට ඇත්තේ ස්වාධීන තනුවකි. එහි පද පෙළ මෙසේ ය.

වඳිමු සුගත සාක්‍ය සිංහ
සසර දිනූ බුදු පියා
රමණීය මන්දාර කුසුම්
කරමින පූජා
බැතියෙන මේ ගී ගයා...

බුදුරජාණන් වහන්සේ පිළිබඳ ව භක්ති ප්‍රණාමය ගීතය පුරා දක්නට ලැබේ. සංසාරය දිනූ සාක්‍යසිංහ සුගතයන් වහන්සේ විඳිමු යැයි ගීතයෙන් කියයි. ස්වාධීන තනු නිර්මාණය වූ අමරදේවයන්ගේ මේ ගීතය වර්තමානයේ ද ප්‍රකට ව පවතී.

ආටිගල සරත්චÁද්‍ර රචනා කළ ජී.ඇස්.බී. රාණි පෙරේරා තනු හා සංගීත නිර්මාණය කළ වින්සන් ද පෝල් පීරිස් ගායනා කරනු ලැබූ ‘සිරිපාදේ සමනොළ කන්ද පෙනේ’ නම් වූ ගීතය ද බෞද්ධ ගීත අතර විශේෂ වෙයි. එහි පද පෙළ මෙසේය,

සිරිපාදේ සමනොළ කන්ද පෙනේ
ආලෝකය සමන් කුලේ
හඳ පානේ මහ වන දිහා බලා
සුදු රිදී කඳන් හමුවේ...

සිංහල චිත්‍රපට ගීත අතර බෞද්ධාගමික අදහස් රැගත් ගීතයක් මුලින් ම දක්නට ලැබෙන්නේ “කැලෑහඳ” චිත්‍රපටියේ ය. එය තිරගත වූයේ 1953 වර්ෂයේදී ය. ඇස්.ඇස්. වේදා නැමති ඉන්දියානු ජාතික ශිල්පියකු විසින් සංගීත අධ්‍යක්‍ෂණය කරනු ලැබූ අතර ගීත රචනා කරනු ලැබුවෙ හර්බට් ඇම්. සෙනෙවිරත්න විසිනි. ගීත පද රචනා වූයේ හින්දි තනු අනුවයි. ‘බයිජු බව්රා’ චිත්‍රපටියේ ගීතයක තනුව ඇසුරින් ලියවුණු ගීතයක් ලෙස ඒ චිත්‍රපටියට මොහිදින් බෙග් ගායනා කරනු ලැබූ මතු දැක්වෙන ගීතය සඳහන් කළ හැකිය. එහි පද පෙළ මෙසේ ය.

මායා මායා මායා මායා
කෝ සැපතා මේ සංසාරේ
දුක කෙළවර වේ නිර්වානේ...

මේ ගීතය මඟින් මිනිස් මනසට සංසාරය පිළිබඳ වූ හැඟීම මතු කරවන්නට රචකයා උත්සාහ ගෙන තිබේ. මිනිසා, රාගය, ද්වේෂය හා මෝහය නැමති අන්ධකාරයේ ගිලි සැබෑ ලෝකය නොදකින බව අවධාරණය කරයි. ලෝක යථාර්ථය මායාවක් බව මිනිසා තේරුම් ගත යුතු බවද ඉඟි කරවනු ලබයි.

බුදු දහමේ ලෝකය තුළ පවතින ධර්මතා අටක් පිළිබඳ ව දක්වයි. එය චක්‍රාකාර වූවක් ලෙස සඳහන් කරනු ලැබ ඇති අතර සැම පුද්ගලයා ම එයට නතුවන බවත් මිනිසා සිතන දෙය එලෙසින් ම ඉටු නොවන බවත් දහමෙහි උගන්වනු ලබන අදහස ගීතයකට කැටිවී අසන්නට ලැබෙන්නේ 1954 වර්ෂයේ තිරගතවූ ‘අංහකාර ස්ත්‍රි’ චිත්‍රපටියේය. කේ. හියුගෝ ප්‍රනාන්දු මේ චිත්‍රපටියේ ගීත රචනා කරනු ලැබූ අතර ආර්. මුත්තුසාමි සංගීත අධ්‍යක්‍ෂණය කරනුලැබීය. එහි පද පෙළ මෙසේ ය.

ලෝකය පෙරළෙයි කාලෙ ගෙවී යයි
මරුවා ළඟා වෙනවා
සිතු දේ නොමවෙයි - නොසිතු දෙයක් වෙයි
ලෝදම් කැර කෙනවා...

ඒ.ඇම්. රාජා ගැයූ මේ චිත්‍රපට ගීතය බෞද්ධ සමාජය තුළ බුදු දහමේ සමාජ පණිවිඩය සාමාන්‍ය ප්‍රජාව වෙත අරගෙන ගිය එකක් ලෙස දැක්විය හැකි ය.

1955 වර්ෂයේ තිරගතවූ “සුරංගනී” චිත්‍රපටයට ඇතුළත් වූ සිරීපාද ප්‍රජා භූමිය පිළිබඳ ව වූ ගීතය ද බෞද්ධ ගීත අතර සුවිශේෂ වෙයි. ඩබ්ලිව්. විල්ප්‍රඩ් සිල්වා රචනා කරනු ලැබූ මේ ගීතය ටී.ආර්. පාපා නැමති ඉන්දියානු ජාතික අධ්‍යක්‍ෂවරයකුගේ සංගීතයට ගායනා කරනු ලැබුවේ ජී.එස්.බී. රාණි පෙරේරා ය. එහි පද පෙළ මෙසේ ය.

ඕ සෑසී ලෝනා මාගේ
සම්බුදු සිරිපාදේ
දිලෙනා වූ බුදු රශ්මි විහිදමිනේ
බුදු සිරිපාදේ බුදු සිරි පාදේ
වඳනා ලෙසින් යමු සමනළයේ...

සිංහල බෞද්ධ ගීත වැඩි ම ප්‍රමාණයක් ගායනා කරනු ලැබූ අන්‍යාගමිකයකු ලෙස ප්‍රවීණ ගායන ශිල්පී මොහිදින් බෙග් දැක්විය හැකි ය. ඔහු විසින් ගායනා කරන ලද “තනිවයි උපන්නේ තනිවයි මැරෙන්නේ” නැමති ගීතය සුවිශේෂ වෙයි. 1955 වර්ෂයේදී තිරගතවූ “අශෝකා” චිත්‍රපටියට ඇතුළත් වූ මේ ගීතය ජී.එල්.ඒ. සෝමපාලයන්ගේ සංගීතයට ද කරුණාරත්න අබේසේකරගේ පද රචනයද සහිත විය. එහි පද පෙළ මෙසේය.

තනිවයි උපන්නේ තනිවයි මැරෙන්නේ
මේ ඩිංගෙදී ඇයි කෝලම් නටන්නේ...

බුද්ධාගමේ උගන්වනු ලබන උපත හා විපත පිළිබඳ ව වන විග්‍රහයන් ගීතයට පාදක වී තිබේ. පුද්ගලයා විවිධ ආකාරයෙන් ජීවිතය ගත කරනු ලැබුවද ඔහුට මරණයෙන් මිදී සිටිය නොහැකිය. ඊර්ෂ්‍යාව පුද්ගල මනස හා චරිතය අපවිත්‍ර කර දමන්නක් මිස ඉන් අර්ථයක් සැලසෙන්නේ නැත. මේ ගීතය සිංහල බෞද්ධ ගීත අතර සුවිශේෂතාවයකින් යුතු වූවකි.

1956 වර්ෂයේදී තිරගත වූ “දුප්පතාගේ දුක” චිත්‍රපටියෙහි ද බෞද්ධාගමික අදහස් රැගත් ගීතයක් ඇතුළත් විය. එනම්; “වෙසතුරු මහ රජිඳා” නැමති ගීතයයි. ඉන්දියන් ජාතික ඇස් දක්‍ෂිණ මූර්ති සංගීත අධ්‍යක්‍ෂණය කරනු ලැබූ මේ ගීතයේ පද පෙළ ආනන්ද සමරකෝන් ගෙනි. ගායනා කරනු ලැබුවේ මොහිදින් බෙග් විසිනි. එහි පද පෙළ මෙසේ ය.

වෙසතුරු මහ රජිඳා
පිරූ දාන පාරමී සපුරා මතු
බුදු බව ලබනා අභිලාෂේ
තම සතු වස්තුව කිරුළද දන්දී
තපසට නික්ම ගියෙ...

1950 දශකය සිංහල චිත්‍රපටියේ ද සුවිශේෂතාවක් පෙන්නුම් කරන දශකයකි. සිංහල ගීතය තුළ ද එකී අනන්‍යතාවය පෙන්නුම් කරනු ලබයි. ‘රේඛාව‘ චිත්‍රපටිය තිරගත වන්නේ ද 1956 වර්ෂයේ ය. ඒ චිත්‍රපටිය සඳහා ගීත නිර්මාණය කරනු ලැබුවේ මර්සලීන් ජයකොඩි පියනමයි. ඔහු විසින් රචනා කරනු ලැබූ “වෙසක් කැකුළු” නැමති ගීතය ද බෞද්ධාගමික අදහස් රැගත් ගීත රචනා කලාවේ සුවිශේෂතාවකි. එනම්; අන්‍ය ආගමික පූජකතුමකු ලියූ ප්‍රථම බෞද්ධ ගීතය වීමයි. ස්වාධීන තනු නිර්මාණයකින් යුතුව ගායනා කෙරුණු මෙහි තනුව නිර්මාණය කරනු ලැබුවේ සුනිල් ශාන්ත විසිනි. ගායනය, ඉන්ද්‍රානි විජය බණ්ඩාර විසිනි. ගීතයේ පද පෙළ මෙසේ ය.

වෙසක් කැකුළු අතු අග ඉඳ නටන විලාසේ
ඉරෙන් හඳෙන් සිරි විඳ විඳ රඟන විලාසේ
පියලි සලාලා - රේණු හලාලා...

ගීතය පුරා යන සමස්ත අර්ථය බෞද්ධාගමික අදහස් නොවූවද ගීතය බෞද්ධ අදහස්වලට සමීප වූවකි.

සිංහල ගීතයෙහි දක්නට ලැබෙන බෞද්ධාගමික අදහස් රැගත් පද රචනා පිළිබඳ ව මෙහිලා අධ්‍යයනයක් සිදු කොට තිබේ. නාඩගම්, නූර්ති ටීටර්, ග්‍රැමෆෝන්, චිත්‍රපට, නාට්‍ය ආදී විවිධ අංශ විෂයෙහි මෙහිලා අවධානය දක්වන ලදී.

මූලික බලාපොරොත්තුව වූයේ සිංහල බෞද්ධ ගීතය පිළිබඳ නිවැරදි අධ්‍යයනයක යෙදීම සඳහා මංපෙත් විවර කර ගැනීමය. මෙහිලා සාකච්ඡා කරනු ලැබුවේ 1950 දශකයේ අවසාන භාගය දක්වා වූ ගීත පිළිබඳව පමණක් වන අතර ඉන් ඉදිරි දශක පිළිබඳ කිසිවක් මෙහිලා සාකච්ඡා කරනු ලැබුවේ නැත.

මෙම අධ්‍යයනයේදී දැකගත හැකි වූ ලක්‍ෂණ කීපයක් වෙයි. ඒවා අතර බුදුරජාණන් වහන්සේගේ අනන්ත අප්‍රමාණ ගුණ කඳ පිළිබඳ ව සිදු කෙරුණු ගායනා, බුදු දහමෙහි උගන්වනු ලබන කරුණු ඇතුළත්වූ ගායනා, බෞද්ධ ආගමික පූජනීය ස්ථාන පිළිබඳව ගැයුණු ගායනා, ඓතිහාසික චරිත පිළිබඳව ගැයුණු ගායනා ආදී වශයෙනි. ගීත රචනා කරනු ලැබූවන් හැටියට, අන්‍යාගමිකයන් සහ අන්‍යාගමික පූජකයන් ද බෞද්ධාගමිකයන් ද දක්නට ලැබිණ. ගීත ගායනයෙහිද අන්‍යාගමික පිරිස් වැඩි වශයෙන් ද බෞද්ධාගමික පිරිස් අඩු වශයෙන් ද දක්නට ලැබේ.

ගීත තනු ඉන්දීය තනු වලට වචන යෙදීම සහ දේශීය තනු නිර්මාණ දැකිය හැකිය. සිංහල බෞද්ධ ගීතය 1950 දශකය පසුකරනු ලබන්නේ එහි කිසියම් වර්ධනීය අවස්ථාවක් ද පෙන්නුම් කරමින් ය. සිංහල බෞද්ධ ගීතයට දේශීය තනු නිර්මාණය ඇතුළත් වීම ඉන් එකකි. ගීත අන්තර්ගතය සාහිත්‍යාත්මක ස්වරූපයෙන් තොරවූ අවස්ථා බහුල වශයෙන් දැකිය හැකි අතර බෞද්ධ ගීත සඳහා එකී පද රචනා ක්‍රමය වඩාත් සාර්ථක වූවක් බවද කිව යුතුය.

http://www.silumina.lk/punkalasa/20110515/_art.asp?fn=ar11051515

Read More